Ads by Google Ads by Google

Onosa’i I Mea Tiga

Vaega: 44

 

Ia manuia lou alo atu i faiva ma tiute o le a feagai ai i lenei aso. Ae alo maia, o le a toe fa’aauau atu la tatou tala. Na muta mai la tatou tala, o lea ua alu le fa’amalamalamaga a Lilo i le aiga o Loleta, o lea fo’i ua fa’atali mai e matua o Loleta ma lona aiga. Ae fai mai le tala, ina ua logo e le teine ona matua e tusa ai ma le fanoga ua i ai nei, na fa’ata’alise loa ona logo e le toeaina o Falaniko le failauga po’o le matai taule’ale’a o lona aiga, e o’o ane e tali le savali lea o le a taunu’u atu i lo latou aiga.

 

O lona uiga e fa’apea lava le tu ma aganu’u a Samoa, a alu atu se fa’amalamalamaga, e fetalia’i matai o aiga, o le Fa’aSamoa moni lava lea, o le tulaga la lea e fai, pe afai e maualuga suafa matai o lo’o umia e se tama o se teine po’o se tama. O le tulaga tonu lava lea ua o’o i ai lea afiafi.

 

Fai mai, na iloa mamao mai lava e Loleta le alu atu o le ta’avale ma ua ia iloa fo’i o Lilo lea ua alu atu. Ua pei oni ufi e tutupu mo’omo’oga ma manatu ua lolofi ifo nei i le loto o le tama’ita’i. Ua lagona le fiafia, ae salani i le mimita, aua o lea ua o’o ane si ana manamea fa’apelepele e fai le fa’amalamalamaga, ma ua aloa’ia ai loa le la mafutaga.

 

E le i tu lelei le ta’avale, ae tamo’e ane Loleta e fa’afeiloa’i le au malaga lea ua taunu’u nei. O le taimi lea, ua le iloga se mea e minoi solo i ai le lo’omatua o Susitina. O teuga uma a le lo’omatua i lea afiafi, ua matua’i selau pasene, alu ane i le toeaina o Falaniko, ua matua’i lua pasasa teuga a le toeaina latou.

 

E le o iloa atu e Loleta, ua matua’i tula’i i luga lona tina ma autilo mai i fafo i le alu atu o le ta’avale. Na fa’apea mafaufauga o le lo’omatua o Susitina ina ua iloa mai lana tama o tamo’e fiafia mai e fa’afeiloa’i le ta’avale lea ua alu atu, “Se i va’ai atu ia, leaga lava le teineititi e mata tane tele, se i va’ai, o lea ua muamua tamo’e a’o lea ma te nonofo atu, ai ua leva ona fia fai to’alua, e le lalolagi e, ma mea o tumu ai.”

 

Ua ‘ata’ata le lo’omatua ma toe fa’apea ifo i lona loto ma lona mafaufau, “Loleta, ua tasi si au mea sa’o, la lea, la lea, o mea tonu lava ia e fefete ai le loto o lou tina, aua o mea sasa’o lava mea ia, e le o ni mea pipi’o.”

 

Ae fai mai, na tauautilo nei le lo’omatua pe fa’apei foliga o le tama ua fa’ananau i ai le loto o lana tama teine e to’atasi. Na oso mai nei i fafo le tamaloa o Vesi, ua tilotilo le lo’omatua ma fa’apea ona mafaufauga, “Oka, oka e, ua pei o se tama e amo popo lenei tama, pe fa’apefea ona alu le loto ma le mafaufau o lenei teine, se i va’ai atu ia, ua pei o foliga o se fa’ataulaitu lea ua ou va’ai atu nei i ai.”

 

Ua liliu nei le lo’omatua ma tilotilo atu i le toeaina ma le matai o lo latou aiga lea ua saofafa’i nei e fa’atali le malaga lea ua alu atu i lea afiafi. “Niko, oka, oka e, se ou te ofo lava a’u, po’o ga fea lava o lenei tama ua alu i ai le ulu o lenei teine, e, ua tau oso mai lo’u ma’i suka ma lo’u toto maualuga se, ua a la Niko, o le mea lea e te maua i lou afafine lea, o le leaga o le faiga, ia o lea la, ou te le mana’o lava i lenei tama ua sau, Niko, ou te le mana’o i ai, ua pei o se tamaloa lenei tagata, ae le o se tama.”

 

Fai mai, ua nofo ifo nei i lalo le lo’omatua ma soloi ona mata, “Niko, o la’u tali le na ua fai atu ia te oe, oka, ai o se tamaloa ua to’a sefulu se fanau, a’o lenei ua fa’amaopo e lenei teine, o le mea lava le e maua e Loleta, leaga e le usita’i ia te a’u, na o oe lava e fa’alogo i ai, o fua la ia e fua mai ai.”

 

Ua le tautala le toeaina o Falaniko ae ua na o le punou, “Susi, malie maia oe, fa’atali se i o tatou va’ai, ua faigata, o lea ua taunu’u mai, ae onosa’i mai, teuteu mai lau va’alele, teuteu mai lau va’alele, ‘aua e te mateletele fa’apena, to’a mai le tai.

 

E faia pea...