Ads by Google Ads by Google

Onosa’i I Mea Tiga

Vaega: 132

 

Alo maia, o le a toe fa’aauau atu la tatou tala. Ua o’o nei i le aso e fa’atino ai fuafuaga a aiga galua, mo le fa’aipoipoga a le ali’i Faifeau o Peniamina ma le tama’ita’i o Onosa’iimeatiga, fai mai, ua matua’i fa’atumulia le malae atoa o le nu’u.

 

E le gata i lea, ae o le maota e afio ai Lilomaiava ua leai se ofi, e fai o tagata o le nu’u lava ia, ae ua fa’apea le lolofi ane o aiga, o lea ua va’aia ai le matagofie o mea uma. Fai mai, e leai se mea na fa’aletonu mai i le amataga se o’o i le fa’aiuga, aua o lea ua tutu nei le lo’omatua o Filipina ma Luisa e fa’afoefoe malie mea uma.

 

O si o tatou atunu’u, a o’o loa i tulaga fa’apenei, e lagona le popole, ina ne i i ai se mea e fa’aletonu. O nisi fo’i, e le mafai lava ona iloa se mea lelei, pe afai e le faia se mea fa’aletonu, aua o na mea fa’aletonu, e a’oaina ai le mafaufau o le tagata soifua. Ae fai mai, o le aso fiafia o le tama’ita’i o Onosa’iimeatiga ma le susuga i le Fa’afeagaiga ia Peniamina, o se aso ua sili ona matagofie i ona itu uma, ma sa va’aia fo’i le mamalu o mea uma.

 

O le va’aiga a le aiga o le Faifeau i le tama’ita’i o Onosa’iimeatiga, fai mai, e matua’i selau pasene mea uma. O uiga o le tama’ita’i sa fa’aalia i lea aso, ua maualuga ai mea uma, aua fai mai o se tama’ita’i e ‘ese le tamali’i o ona uiga. Fai mai, ua sau soli le aiga o le Faifeau, ma sa auai ma ona matua.

 

Fai mai, ua musumusu ane nei le tina o Peniamina i lona uso lea o lo’o latou fa’atasi, “Litia, ua sili atu le tama’ita’i lenei, na i lo le isi fo’i lea se manu e ma’imau ai si a’u tama, a ea.”

 

Ua ‘ata lona uso ma tilotilo ane i le tina o Peniamina, na fa’apea le tala a le lo’omatua, “Analosa, va’ai oe, amuia Peniamina ua ia maua se to’alua lelei, e tasi lava la’u va’ai i le tagata, o’u iloa ona uiga, e ‘ese le tamali’i o uiga o lenei teine, ia tatou tapua’i ae se i alo atu Peniamina mo lana galuega.”

 

Fai mai, o le to’atele o Auauna a le Atua e ala i Lana galuega, sa auai uma i le aso fiafia o le Faifeau. i le va’ai a tagata i lea aso, fai mai, ua tu’u atoa e Lilo ma lona aiga mea uma, mo le aso o lona afafine o Onosa’iimeatiga. O le mafua’aga, ua lagona le fiafia o le loto o Lilomaiava ma lona to’alua o Loleta.

 

O le tele o mea, sa fa’alu uma i lea aso, ua leai se mea e toe tu’ua, o le tali atu fo’i a aiga galua i le fa’atinoina o le aso fiafia o Peniamina ma Onosa’iimeatiga, e le i fa’atafa lava. O le ‘ofu fa’aipoipo o le tama’ita’i, lea sa fai e le tuafafine matua o lona tama, le lo’omatua o Luisa, fai mai, o se ‘ofu ua sili ona matagofie i le va’ai.

 

Ina ua uma le fa’apaiaina o le ulugali’i fou, sa liliu loa mo le ‘aiga fiafia, na va’ai atu tagata sa auai, ua toe sui le ‘ofu o le tama’ita’i, o se ‘ofu fo’i ua sili ona matagofie i le va’ai, ma o le ‘ofu la lea na fai e le tuafafine la’ititi o Lilomaiava, le lo’omatua o Filipina.

 

Fai mai, e le i fa’ama’ima’i lava le siou a lo’omatutua i lea aso, e fai fai, tau malolo le aiga o Peniamina, ae va’ai mai, e le o malolo lo’omatutua, o le pese lava e ta mai e le fa’ili a le Polynesian Beat, e sogi fa’asolo atoa ai lo’omatutua. O le isi lea mea na mata’ina e tagata.

 

Manatua fo’i, o Luisa e pa’epa’e pei o se Palagi, aua o lona tama o le Palagi, a’o le tuafafine o le toeaina o Mose, ua leva ona maliu le tina o Luisa, o lea na tausi mai ai e Mose ma Malia, ma ua avea ma ulumatua i le la fanau. O le tausiga fo’i a Luisa sa fai i a Mose ma Malia, o se tausiga ua sili ona malie ai le loto.

 

E fa’apea fo’i le to’alua o Luisa, le tamaloa o Vesi, e maliliu Mose ma Malia, ae ua  malilie atoatoa i le tautua tuavae a le tamaloa o Vesi. O le ala fo’i lea e auau ai lava Lilo i le to’alua o si ona tuafafine matua, o Luisa.

 

E faia pea...