Ads by Google Ads by Google

Onosa’i I Mea Tiga

Vaega: 106

 

Alo maia, o le a toe fa’aauau atu la tatou tala. Ua lua masina o le tama o Ali’ioaiga, ma o na masina, sa nofo ai pea Filipina ma fesili ifo i lona mafaufau pe ua le toe alofa ea Roger i a la’ua ma si ana tama. Ua fia iloa se tala po’o a mai si ona to’alua lea ua le lua vaiaso e alu ai, a’o lea ua lua masina, ua le maua mai se tala. O le isi itu ua toe manatu i ai Filipina, e alu lona to’alua i lana malaga lea, ae e le i o’o i le taimi e fanau ai.

 

Ua le mautonu le teine, ua le ‘asa ma alu i le fale o lona tuagane o Lilo ma lona to’alua o Loleta, e iloa mai loa e Filipina ua manava ane galuega a Lilo ma Loleta, alu ane loa i lo la fale. Ua avea lenei mea ma mafatiaga o Lilo, i lona va’ai ane i si ona tuafafine ua mafatia tele, ona ua le maua mai se tala mai i lona to’alua. O le aso lava lea na lagona ai e Lilo, ua tatau ona iloa e Filipina le mea ua tupu ia Roger.

 

O a lava tiga ma mafatiaga o le a o’o i ai lona tuafafine, ae o ia e tatau ona loto tele, ma ia iloa loa e Filipina le mea ua tupu. O tiga ma faigata, fai mai le upu, o le taimi e fa’agalogalo ai, ae i le loto o Lilo, o se avega mamafa o le a amo nei e Filipina. O le itu o lo’o mafatia ai ma popole ai le loto o Lilo, ona ua toe manatua le tulaga se manu e o’o i ai Filipina ina ua fanau i lana tama o Ali’ioaiga.

 

Fai mai, ua ulufale Filipina i le fale o lona tuagane o Lilo, e taunu’u ane, o lo’o sofa’i Lilo i luga o le laulau, ae o lo’o fai le malologa a Loleta, ona ua ma’itaga. Na ona ulufale lava o Filipina savali sa’o atu loa i le mea o lo’o nofo mai ai lona tuagane.

 

“Lilo, ua lagona lava le mafatia o lo’u loto, ua ou le maua se tala mai ia Roger, po’o le a le mea ua tupu i si o’u to’alua, sa fai mai ia te a’u, e na o le lua vaiaso e alu ai, a’o lea o le a alu le tolu masina, fa’amolemole Lilo, tautala mai ia te a’u, ma ou te fia maua fo’i le numera o le telefoni, se i o’u vala’au ai e su’e po’o fea o i ai.”

 

“O le isi mea, ou te mana’o ia ta’u ia Roger o lea ua ou ola, ma o le tama le ma tama, o le isi lea mea lea ou te fia talanoa ai i si o’u to’alua, fa’amolemole lava Lilo.”

 

Fai mai, ua le iloga se mea e liliu solo ai le tama, “Pina, fa’atali lava, se i o’u alu e va’ai Loleta o lo’o fai lana malologa.” Ua nofo nei na o Filipina, ua fa’asolosolo lana va’ai i totonu o le fale o lona tuagane, fai mai, o se fale ua sili ona matagofie, ua fa’asolo le va’ai a le teine, tau loa i le la ata ma Roger, na pu’e i le la fa’aipoipoga. O se ata ua sili ona manaia i le va’ai, o lo’o i ai fo’i ma ata o nai o latou matua, o ata o nai a la fanau.

 

Na fa’atei’a Filipina ina ua o mai le solo a Lilo ma Loleta i fafo, na i ai le manatu o Filipina, o lo’o alu Lilo e asi Loleta po’o a mai, ona ua lata fo’i le aso e fanau ai, peita’i, o lea ua o’o ane i fafo. Na saofa’i ifo nei i lalo Loleta ma tilotilo ane ia Filipina, ua suia lava foliga o Filipina, o lona lalelei sa i ai ua amata lava ona va’aia ona foliga ua matua.

 

“Pina, o a mai oe, o e malosi, a’o a mai le tama, ai fo’i o usuusu pese i ai le lo’omatua, a ea.?” Ua ata Filipina ma fa’apea ane ia Loleta, “ia ua oulua iloa fo’i le lo’omatua, e le mana’o lava e toe ave’ese mai si a’u tama, e le o toe mana’o fo’i ou te toe nofo umi i lo la fale.”

 

Ua talie nei Filipina ma Loleta, ae ua na o le punou o Lilo i lea taimi, fai mai na iloa lelei lava e Filipina o lo’o i ai le mea o lo’o mamafa i le loto o si ona tuagane. “Lilo, ia avea ia lenei taimi tatou te talatalanoa ai ma Filipina, Pina, o le a tu’u atu i a Lilo e fai atuina le tala.” Fai mai, e le i fai ane Lilo, ae ua iloa e Filipina e tele lava le mea lea e tupu, ae se i fa’alogologo pea se i fai mai se tala a lona tuagane i a te ia.

 

E faia pea...