Ads by Google Ads by Google

Mataina Fa’aaliga lona lua a le Aufai Faiva a le atunu’u

ausage@samoanews.com

Na maitauina le to’atele o le aufai faiva sa mafai ona auai i le latou Fa’aaliga lona lua sa faia i le lua vaiaso talu ai, lea sa fa’ataunu’uina i le nofoaga autu o le maketi fou i Fagatogo i le vaveao o le aso To’ona’i, Tesema 3, 2016.

 

Na taua e se sui o le Asosi o le Aufai Faiva i Amerika Samoa i le Samoa News le toatele atu o le aufai faiva sa mafai ona fa’alauiloa a latou faiga faiva i le Fa’aaliga lona lua na mavae atu nei, nai lo i latou na auai i le ulua’i Fa’aaliga.

 

“O se tulaga taua lenei mo le aufai faiva a le atunu’u, ona o le to’atele ai o le aofa’i o i latou sa auai i le Fa’aaliga lona lua na mavae atu nei, aemaise ai o le to’atele o le atunu’u na lolofi mai e fa’atau le anoano o ituaiga i’a sa mafai ona fa’alauiloa, ua atagia mai ai le aga’i pea i luma o le taumafaiga a le aufai faiva e atina’e ma si’itia le tulaga o faiga faiva i le atunu’u”, o le saunoaga lea a le susuga ia Isitolo Malua, o se tasi o sui o le Aufai Faiva i le atunu’u.

 

O le agaga atoa o lenei taumafaiga e pei ona fa’amaonia mai e le Faatonusili o le Ofisa o le Puipuiga o le Vaomatua ma le Gataifale ia Ruth Matagi-Tofiga i le Samoa News, o le taumafai lea ina ia maua se avanoa e mafai ai ona fa’alauiloa galuega a le aufai faiva, ma maua ai fo’i e le atunu’u le avanoa latou te molimauina ai a latou galuega ma fesoasoani ai i le fa’atauina o i’a mai a latou faiga faiva.

 

O le mae’a ai o le ulua’i Fa’aaliga sa faia i le 2 masina talu ai, na taua ai loa e Ruth i le Samoa News le latou galulue faatasi ma le Matagaluega o Fefa’atauaiga ma Alamanuia, mo le faatulagaina lea o se isi Fa’aaliga i le lumana’i, ma vaavaai ai pe mafai ona fa’atinoina lenei fa’amoemoe i masina ta’itasi pe ta’i lua fo’i masina ma fa’ataunu’u.

 

Ae na taua e ni isi o le aufai faiva i le Samoa News lo latou naunau ina ia fa’atinoina pea lenei polokalame i masina ta’itasi.

 

“E ui o lea ua i ai le maketi o i’a i totonu o le nofoaga autu o le maketi i Fagatogo, ae o le mea moni lava ia e le o talafeagai le nofoaga lea o lo o i ai le maketi o i’a i le taimi nei, e le gata e faigata i le atunu’u ona afea, ae o le to’atele fo’i o tagata latou te le o silafia lenei nofoaga, e sili atu ai lava la le fa’atau pea o a matou i’a i tafatafa o le auala po o le la’u e fa’atau i faleoloa, ae a oo loa i fa’aiuga o masina ta’itasi, ona fa’atinoina loa lea o le Faaaliga a le Aufai Faiva e fa’alauiloa fa’atasi ai i’a ma maua ai le avanoa e fa’atau e le atunu’u”, o le saunoaga lea a le susuga a Afred Lavata’i, o se tasi o ali’i faifaiva i le atunu’u.

 

Na taua e le susuga a Lavata’i le to’atele o le aufai faiva a le atunu’u na fa’amanuiaina i le Faaaliga lona lua na fa’atoa mae’a atu, ona o le to’atele o le mamalu o le atunu’u na lolofi atu e fa’atau a latou i’a atoa ai ma isi figota o le sami.

 

“E ui lava i le taugata o le tau o i’a sa fa’atau ai, e mafua mai i le faigata ona fa’atino o lenei galuega o le fagota, ae sa molimauina lava le to’atele o le atunu’u na lolofi mai ma fa’atau a matou i’a, ma o le ituaiga lagolago lea o lo o mana’omia e le Asosi a le Aufai Faiva a le atunu’u, ina ia mafai ai ona maua tupe e atina’e ai pea la matou pito laau o faiga faiva”, o le saunoaga lea a Lavata’i.

 

Na taua e le sui o le Matagaluega o le Puipuiga o le Vaomatua ma le Gataifale sa auai i le fa’atautaiga o lenei Fa’aaliga, o le aoga o Fa’aaliga a le aufai faiva, o lo o mafai ai ona maua a latou fa’amaumauga i le aofa’i o i’a sa mafai ona fagotaina mai ma fa’atau atu i le atunu’u, aemaise ai o ituaiga i’a eseese sa mafai ona maua mai ma toe fa’atau atu, ina ia fesoasoani ai i taumafaiga a le latou Ofisa i le fesoasoani lea e saili auala eseese e fa’aleleia ai le tautua a le aufai faiva i le atunu’u.