O le mae’a ai ona filifilia o Kovana o le Falelima i Sisifo ma le Falelima o le Manu’atele i le vaiaso na te’a nei, ua atagia mai ai loa le mae’a aloaia lea ona filifilia Kovana o Falelima e 3 i le atunu’u, mo le tauaveina o tiute fa’atino i totonu o le Ofisa o Mataupu Tau Samoa i le isi 4 tausaga o lo o lumana’i nei.

Mo le Falelima i Sisifo, o le afioga a Lualemana E. Faoa lea ua toe filifilia na te tauaveina le nofoa mo le isi 4 tausaga, ae o le afioga i le Fa’atui ia Laolagi Fonoti Savali Vaeao lea ua filifilia e avea ma Kovana o le Falelima a Manu’a.

O le lua vaiaso talu ai na filifilia ai e le Falelima i Sasa’e le toe avea o le afioga i le To’afia ia Alo Dr. Paul Stevenson ma Kovana o le Falelima mo le isi 4 tausaga o lo o lumana’i nei.

I se fa’atalatalanoaga ma le Samoa News i le fa’aiugao le vaiaso na te’a nei, na fa’amaonia mai ai e le afioga a Laolagi le filifilia o ia e avea ma Kovana o le Falelima a Manu’a mo le isi 4 tausaga o lo o lumana’i nei. O Laolagi o lo o ia nofoia le isi nofoa o le itumalo o Manu’a i le Senate, e fai ai o ia ma sui o le Luanu’u ia Ofu ma Olosega/Sili.

Ae ona o fesuiaiga e pei ona i ai tofiga a le itumalo o Manu’a, ua filifilia ai loa le afioga i le ali’i Senatoa ia Laolagi e avea ma Kovana o le Falelima, e sui tulaga i le afioga i le Fa’atui ia Misaalefua John Hudson lea o lo o ia nofoia le nofoa o le Kovana o le Falelima i le taimi nei, ona o lea ua filifilia le afioga ia Misaalefua na te nofoia le isi nofoa o le itumalo o Manu’a i totonu o le maota maualuga a le Senate, e sui tulaga i le afioga ia Laolagi.

Na taua e le afioga a Laolagi lona agaga fa’afetai ma le loto maualalo ina ua filifilia o ia e le itumalo na te tauaveina lenei tofiga maualuga, ma fa’aauau ai pea lana tautua i le malo ma le atunu’u.

E tele tausaga o tautua Laolagi i le Fono Faitulafono, aemaise lava i le maota o sui lea sa tautua ai mo le tele o nofoaiga, ma avea ai o ia ma ta’ita’i o le Komiti o le Paketi a le maota o sui.

Ae ina ua filifilia o ia e avea ma Senatoa, sa toe fa’aauau fo’i lona tulaga o le ta’ita’i o le Komiti o le Paketi mo le maota maualuga, atoa ai ma isi tiute sa ia tauaveina, e aofia ai le avea ma Peresetene le tumau o le Senate i le taimi na toesea uma ai le Peresetene ma le Sui Peresetene i fafo ona o ni isi o tiute fa’alemalo.

O le fa’aiuga fo’i o le vaiaso na te’a nei na fa’amaonnia mai ai e le afioga a Lualemana i le Samoa News, le toe filifilia o ia e le Falelima i Sisifo e avea ma o latou Kovana i totonu o le Faigamalo Fa’alotoifale a Tutuila ma Manu’a.

E le fou le tautua a le afioga a Lualemaga i le faigamalo a Amerika Samoa. E le gata sa tautua o ia i le tofiga o le Fa’amasino Lagolago i le Fa’amasinoga Maualuga a Amerika Samoa, ae sa avea fo’i o ia ma Senatoa mo le itumalo o Leasina mo tausaga e 8.

O ni isi o vaega o lana tautua ao avea ma Senatoa, sa ia ta’ita’ia ai le Komiti Su’esu’e a le Senate sa latou su’esu’eina ni isi o mataupu e fa’atatau i le fa’aaoga le tatau o tupe a le malo.