Ads by Google Ads by Google

Karlinna Sanchez avea ma fofoga Fa'au'uga JSA, Princeton


Le tamaitai ia Karlinna Suluama Lutu Sanchez. [ata foai]

O lo ua fa'aauau atu le agava'a fa'afailauga o Karlinna Suluama Lutu Sanchez i le Iunivesite o Princeton, ina ua tofia o ia e fai ma fofoga o le vasega Fa'au'u o le Polokalama JSA ia Iulai 30, 2017.

 

O le au fa’auu e eseese setete ma teritori e o mai ai. O Sanchez ua ia mua'i mauaina le fa'ailoga taua "Samala a le Fa'amasino" ina ua tulaga muamua i le tomai e finau malosi ai lafoga a le latou itu e fa'asaga i le mataupu fa'apitoa na filifilia mo fefinaua'iga.

 

"O se fiafiaga ia te a'u, ona ua mafai ona tofia lo'u sui fa'atauva'a mai le tatou teritori e avea ma fofoga o le matou vasega fa'au'u mai le polokalama JSA 2017, ua mafai ona ou tu ai i nei lotoifale fa'asetete, ma tautala e fa'aleo se lagona mo le matou vasega fa'au'u. Ou te mua'i fa'afetaia ai le agalelei o le Atua, ae maise o le avanoa ua ou maua! O le poto ma le atamai, ae maise o le tomai e tautala ai, o mea ia e fa'aosofia mai e le agaga e tautala atu ai,” o  sana fa'afetai pu'upu'u lea ua ia lagona e ao ina fa'ailoa atu i tagata uma o Amerika Samoa e ala i lenei tala.

 

O Karlinna sa auai atu i le polokalama o le JSA 2017 fa'atasi ai ma isi sui e to'atolu, o le tasi fo'i o ia avanoa sa maua e Yasminna Leativaosalafai Lutu Sanchez, lona uso la'ititi. O avanoa nei e fa, e tauva i ai fanau a'oga i a'oga maualuluga, peita'i, o le lona tolu ai lea o tausaga, o lo'o maua pea e Karlinna lea avanoa, aua o ia o se tama'ita'i e fiafia e tauva i so'o se polokalama fa'ataoto a le Matagaluega o A'oga a le tatou Malo, ina ia ausia ai e ia tapula'a fa'atulaga mo nei avanoa taua.

 

O Karlinna Suluama, o le a ulufale atu i le vasega 12 i lenei tausaga a'oga i Samoana High. Ua atoa le 17 tausaga o le soifua ma ua tofia fo'i e avea ma Peresetene o le Sosaiete NHS. Na filifilia o ia e avea ma se tasi o le to'afa o fanau a Amerika Samoa mo le Polokama JSA i Princeton University i lenei taumafanafana. O mataupu sa tau'avea i le kosi i Princeton, o mataupu tau Upu Fai Fa'avaomalo.

 

I lea fonotaga ua ausia ai e ia togi maualuluga e fa'amau fa'ailogaina ai lona maua o le "Samala a le Fa'amasino" mai le aotelega o le fanau sa auai fa'atasi ai mai isi setete ma teritori uma o le Iunaite Setete o Amerika. O se tulaga fou lea ua ausia e se tasi o alo o le atunu'u o lo'o malaga atu i nei avanoa i tausaga ta'itasi.

 

O le fa'atolu ai lenei ona maua e ia le avanoa e malaga ai i le polokalama a le JSA ma ua fa'ailoa ai, ma ua lava tapena ai fo'i lenei talavou mo nei ituaiga o lauga i fa'atasiga faitele. I kosi nei a le JSA i tausaga ta'itasi, e faia'oga ai polofesa mai Iunivesite ua mae'a fa'atulaga. O se tasi o avanoa e faamasani atili ai fanau ua i'u mai a'oga maualuluga i ituaiga o a'oa'oga e la'asia e i latou pe a o atu i fafo i avanoa e fa'aauau ai sailiga o tusi pasi maualuluga i a latou kosi eseese.

 

O isi tausaga e lua na aiai Karlinna i le Iunivesite o Georgetown i Washington DC ma le Iunivesite o Stanford i lona ulua'i tausaga. Ua fa'amauina mai lona togi "A" i mataupu Fa'aupufai Fa'avaomalo.

 

E aoga foi lenei avanoa ma taumafaiga a nei fanau, e fa'aosofia ai le naunau o matua uma ia auina atu o latou fanau i nei avanoa, peita'i e le faigofie ona maua e fanau uma, pe afai e le ola tauva ma filiga i a'oa'oga. E le o maua i le tatou kolisi iinei avanoa fa'apea mo fanau a'oga maualuluga, e o atu ai e faamasani ona fa'alogo i tautalaga mai polofesa eseese ina ia iloa ai ala o a'oa'oga i kolisi ma iunivesite.

 

I nei malaga, ua sapaia fo'i e le Faigamalo a Kovana Lolo Moliga, ma sa latou ofoina mai se isi vaega o le pili o nei sikolasipi e fa'atupe e le Malo o Amerika Samoa. Ua fa'ateleina fo'i avanoa ma ua auina atu ai ta'ito'afa ma le ta'ito'atolu i isi malo e pei o sui fo'i o lo'o malaga atu i Saina.

 

Ua mautu fa'amaumauga o taumafaiga a Karlinna e afua mai lona ulua'i tausaga i Samoana se'ia o'o i lana vasega 11. E tauva i so'o se tauvaga lava a a'oga maualuluga, Fa'aaliga Fa'asaeanisi, Fa'aaliga o le Tala Fa'asolopito, Tauvaga Lauga ae maise lava i Lauga taito'atasi i mataupu e le'i sauni i ai, lea na fa'ato'a toe maua se isi e taua'ao aloaia i ai le John Kneubuhl's Award, talu mai le 10 tausaga talu ai. E sailia gata se tasi e agava'a mo lea fa'ailoga, aua e ao ina tolu tausaga soso'o e mauaina le togisilia i lea ituaiga o lauga i Tauvaga Lauga a A'oga Maualuluga.

 

I le taumafaiga fo'i a lona uso la'ititi o Yasminna Leativaosalafai, sa mauaina fo'i lona togi "A" i lana a'oa'oga fa'apitoa sa auai ai i le JSA i Stanford University, le sa latou tauavea ai le mataupu tau le "US Government." Na faia fo'i lona fa'au'uga i le aso 30 Iulai, 2017.

 

O i la'ua nei o alo e fa'asino i le tama'ita'i Utulei Christina Afoa Lutu ma Carlos Sanchez o Utulei.