Ua fa’amalumalu le tu’uina mai o se fa’aiuga a le fa’amasinoga maualuga fa’asaga i le fa’afinauga a loia e to’afa o lo o fautuaina aia tatau o ali’i e to’afa, ia o lo o tu’uaia i le fa’alavelave lea na tafana ai le Ofisa o Leoleo i Leone, e fa’apea o le tagi atoa a le malo fa’asaga ia i latou e to’afa o lo o tu’uaia, “o loo fa’avae lea i luga o fa’amatalaga fa’alogo” e aunoa ma se tasi na vaai tino i ai.

A o le i amata aloaia taualumaga o le fa’amasinoga autu a i latou e to’afa i le taeao nei, o le taeao ananafi na faia ai le iloiloga mulimuli o lenei mataupu, mo le tau fa’amautuina o ni fa’aiuga i talosaga sa fa’aulu e le itu tete’e faasaga i lenei mataupu, aemaise lava i le talitonuga a le itu tete’e, o le tagi a le malo o lo o fa’avae i fa’amatalaga fa’alogo na maua mai e Leoleo mai isi tagata.

E to’atasi le molimau na valaau e le malo i le iloiloga mulimuli sa faia ananafi, o le ali’i Leoleo Su’esu’e lea ia Det. Savelio Vaofanua, lea na ia fa’amatala i le fa’amasinoga le la talanoaga ma le ali’i lea ua avea nei ma molimau autu a le malo i lenei mataupu, e fa’atatau i taupulepulega sa faia ina ia osofa’i le Ofisa o Leoleo i Leone.

Na taua e Det. Vaofanua, o ia lea o le Leoleo o lo o autu i ai le su’esu’eina o le mataupu i lana molimau e fa’apea, ao fa’agasolo ai pea su’esu’ega a Leoleo e tusa ai o le fa’alavelave lea na tafana ai le Ofisa o Leoleo i Leone i le po o le aso 1 Novema 2014, na ia maua mai ai se faamatalaga tusitusia mai i se ali’i e fa’atatau i tala sa ia fa’alogo i ai e uiga i lenei mataupu.

Na fa’auilavea loia a itu tete’e i le molimau a le ali’i Leoleo e fa’atatau i tala sa fa’alogo, peita’i na fa’ataga e le fa’amasinoga le ali’i Leoleo e fa’aauau lana molimau e fa’atatau i tala sa fa’alogo i ai Futiga.

Na taua e Det. Vaofanua i lana molimau e fa’apea, e tusa ai o le fa’amatalaga a Jeff Futiga ia te ia, o le aso 29 Oketopa 2014 sa faia ai se BBQ i le nofoaga o le Aute, lea fo’i sa i ai i latou uma o lo o tu’uaia e le malo i lenei mataupu, sa fa’alogo ai Futiga i se talanoaga sa faia i le va o Turky ma Manu Lefatia, lea na fai ai Turky ia Lefatia, e tatau ona faia sa latou gaioiga i le mataupu lea ua loka ai Elsarina.

O Elsarina Lefatia, o le tuafafine lea o Manu Lefatia, lea na taofia e Leoleo i le taimi lea ma molia i lona umia o vaega o fualaau fa’asaina.

Na fesili le loia a le malo ia Gerald Murphy ia Det. Savelio poo le a se tala a Futiga e tusa ai o se tali a Manu Lefatia i le tala a Turky, ae na tali le ali’i Leoleo, “Fai mai Futiga sa tali atu i ai Manu ia Turky e faapea, ua lelei, o le mea e tatau ona fai le mea lena”.

Na taua atili e Det. Vaofanua i lana molimau e fa’apea, pe tusa o le 2 i le 3 aso na va ai le talanoaga lea sa faia i le Aute, ae tula’i mai loa ma le fa’alavelave lea na tafana ai le Ofisa o Leoleo i Leone.

Na fesili le loia a Lefatia o Sharron Rancourt i le ali’i Leoleo pe fa’afia ona la talanoa am Futiga, ae na tali le ali’i Leoleo, na te le manatuaina pe fa’afia, ae ina ua toe fesili Rancourt i le molimau pe sa la toe talanoa lata mai nei ma Futiga, na tali le ali’i leoleo, “ioe, pe tusa o le 3 vaiaso talu ai sa ma talanoa ai i luga o le telefoni”.

E tusa ai o le molimau a Det. Savelio, o Futiga o loo i ai nei o ia i Hawaii, peita’i e le o mautinoa pe auai mai o ia i le fa’amasinoga autu lea ua fa’amoemoe e amata i le taeao nei, peita’i na taua e le loia a le malo ia Murphy e fa’apea, e auai mai Futiga i le taimi o le fa’amasinoga, ona o ia le molimau autu a le malo i lenei mataupu.

Na fesili le isi loia a le itu tete’e ia Michael White i le ali’i Leoleo, pe sa i ai i le taimi na fa’alogo ai Futiga i le talanoaga a Turky ma Lefatia, na tali le molimau “e leai”.

O le itula e 9:00 i le taeao nei lea ua fa’amoemoe e amata aloaia ai taualumaga o lenei mataupu.