O le manulauti o le vaiaso fa’apitoa mo le fa’ataua o i latou e i ai afaina o le tino ma le mafaufau i le Aua Elementary School ua latou fa’amalosia le fanau fa’apitoa ina ia latou “Iloa ou Vaivaiga, Fa’aaoga ou Agava’a po’o ou Malosi’aga!”

O le polokalama na amatali ai lea fa’amoemoe sa vala’aulia ai sui o le Matagaluega o A’oga lea na oo atu ai le Fa’auluuluga o le SPEd i le matagaluega, Sauila Kava. Na vala’auina fo’i le afioga i le faipule ia Faimealelei Anthony Allen, ma le peresetene o le PTA Mrs Lopesi.

O i latou nei ae maise le faletua o le Faife’au ma o le faia’oga fo’i i lea i le aoga, Sina Talamoni sa si’itia le fa’afetai i le Atua e amatalia ai le sauniga, lea na faia i le Fale Ta’alo fou, e le’i fa’aulufaleina, ae ua fa’aaoga.

O le saunoaga fa’apitoa a Faimealelei, sa ia fa’amalo i le matagaluega o A’oga ma le latou una’iga malosi o lenei polokalama fa’apito augafa i le tautuaina “o fanau ua i ai mana’oga fa’apitoa i o latou soifuaga talavou ma le ma’ale’ale.”

“E leai so’u iloa o so’o se mea ou te aoga ai ia te outou le fanau fa’apitoa, ae pau o lea, ou te iloa, e tutusa lelei la outou aia tatau i so’o se mea o a’oa’oina, ma fa’aaoga mo le fanau lautele o atoatoa i lenei soifuaga, ma outou o lo’o i ai mana’oga fa’apitoa. Ona fa’afetai ai lea i le matagaluega o A’oga ma le SPEd ma lona pulega i le una’iga malosi o lenei galuega patino mo outou e tautuaina ai lo outou soifua a’oa’oina lelei. O le a fo’i se fesoasoani fa’alelava ua ou faia, ma finau ai i totonu o le tatou fono faitulafono e aoga mo outou fa’atasi uma ma isi o outou uso ma tuafafine o aooga i le tatou Laumua nei, fa’afetai i le Atua o manuia, ma le avanoa ua ou maua, e faia ai sa’u galuega lea ua tino ai se alofa fa’avalea mo outou le fanau.”

O ia fo’i sa mua’i fa’ailoa, “E le’i tatalaina le tatou fale a’alo lenei, ae o lea ua tatou fa’aaogaina, o le taua lea o outou le fanau fa’apitoa ia te’i matou uma lava!”

A’o le’i mae’a lana folasaga, sa ia toe fa’atepa le fanau fa’apitoa ma o latou faia’oga ma le pulega a le aoga i le avanoa o lo’o pito i tai ane o le faleta’alo, ma ia saunoa ai fa’apea, “O le avanoa le la, ua mae’a fa’atulaga fo’i le isi fale e fa’atuina ai, i lona fogafale muamua, o le a fa’atuina ai le potu mo le fanau fa’apitoa, e o i ai e malolo i ai ma aoaoina fa’apitoa ai fo’i i latou i nisi tomai e aoga mo le latou olaga matutua ane teisi, seia tu’ua le tatou laumua nei. O le a fa’aauupegaina lava mo lona fa’amoemoe, e ea malulu fo’i, ia aoga mo outou le fanau pe afai ua vevela tele le la.”

O lea poloketi, ua fa’alauiloa, e ao ina mae’a lelei mo lona fa’aaogaina i le tausaga a’oga fou. Peita’i, sa i ai avanoa na tu’uina i le vasega o Faia’oga o le SPED ina ia tolaulau ma tufatufaina fa’ailoga ua mae’a fa’atulaga mo le fanau a’oga i vasega taitasi sa a’oa’oina faapitoa i lenei polokalama.

O fanau sa agava’a mo fa’ailoga - Level 1: Iosua Fa’aliliu ma Cecil Lotu; Level 2: Alrenzo McFarland; Level 3: Timothy Lautolo, Grace Lautolo; Level 4: Fiapoto Leifi ma June Toatelegese; Level 5: Francisco Ume; Tone Elia ma Iverson Niuatoa. Level 6: Pelio Unutoa Taleni, Sagato Fa’aofo ma Iloilo Lusia. Level 7: Toe Pauia, Laila Matautia, Liaina Lautolo, Perenise Tufuga ma Molimau Saufoio. Level 8: Yolanda Ah Chong, Pulusi Fa’asua, K .J. Filipo, RJ Aunese  ma Gloria Vitale.

O le polokalama fa’ataoto mo le vaiaso atoa lenei - Aso Lua e fa’aalia ai le ituaiga Saini fa’apitoa e le fanau. E tusia lava e le vasega le latou fa’ailo po’o le Saini e fa’ailoa ai le taleni tusi ma vali ata a le fanau. E laei fo’i e i latou ofu o so’o se ituaiga tagata o mana’o ai i latou e fa’ataua i le aso lea.

Aso Lulu ua fa’atulaga mo Tautua Eseese e tali atu i fa’alavelave fa’afuase’i ma ua vala’auina ai le EMS, DPS ma le FIRE e fa’ailoa i le fanau mea e ao ina latou faia e fesoasoani ai i o latou aiga i taimi faigata e tutupu a’o aofia ai ma i latou i na ituaiga o siomaga. E laei e le fanau le lanu moana.

Aso Tofi ua laei e i latou le lana meamata, e fa’ailoa ai, lou fiafia i lou siosiomaga ma e asiasi fo’i i latou uma nei i le Land Grant - ASCC. Aso Faraile ua laei le Lanu Viole o le toniga a le a’oga i Aua, ma o atu loa i latou e faia le latou talotaloga i lumafale o le Paepaeulupoo ma Paepaeala i Aua, e fa’ailoa lo latou fiafia i lo latou afio’aga. O lea aso e sami ai loa i le latou aiga mo le BBQ i le malae o Paepae Ulupo’o.

Peita’i, o le mea sili ona patinata fa’atasi e faia’oga, le pulega o le A’oga i Aua fa’atasi ai ma le vasega o matua i le PTA, ona ua filifilia nei le galuega fa’atino o le HISTORY a le fanau e to’atolu mai le polokalama a le SPED i Aua e tauva i le HISTORY Day a le teritori i lenei tausaga. O le Tala’aga o Abraham Lincoln, ma ua fa’ailoa ma fa’amautu atili ai le mau, e i ai agava’a o i latou ua i ai afaina tumau o le tino ma le mafaufau.