Ua filifilia nei e le Itumalo o le Maoputasi ona sui e to’alua e avea ma Senatoa i le maota maualuga a le Senate, i le mae’a ai o ni fonotaga sa faia i afioaga ta’itasi mo le filifilia o ni o latou sui i le Senate.

O i laua ua filifilia e aofia ai le tofa a Tuaolo M. Fruean, lea ua fai ma sui o le afioaga i Pago Pago, ma le afioga i le Maopu ia Fano M. Shimasaki, lea ua fai ma sui o afioaga i Faga’alu, Utulei/Gataivai ma Fagatogo.

Toe tasi le nofoa o le Itumalo o le Maoputasi i totonu o le Senate e le i filifilia sona sui, toe o le sui mai afioaga i Aua, Leloaloa ma Atu’u, lea o lo o nofoia e le afioga i le Maopu ia Uti Petelo.

Na taua e le afioga i le ali’i Senatoa ia Uti i le Samoa News i le vaiaso na te’a nei e fa’apea, o lo o i ai le fuafuaga a le Itumalo o se taimi o le masina lenei o Novema e tatau ona fono ai loa mo le sailia o se tasi e nofoai le nofoa o le itumalo mo le isi 4 tausaga.

O le fonotaga sa faia i le maota o le afioga Afoa L.S. Lutu, na tasi ai le fa’afitiga o aleaga, o le afioga i le Maopu ia Fano ua filifilia e fai ma Senatoa o le itumalo i le nofoaiga o le a soso’o nei, e sui tulaga i le afioga i le Aloali’i ia Afoafouvale Moega Lutu sa ia tauaveina le nofoa o le itumalo talu mai le masina o Ianuari 2014.

I se talanoaga ma le afioga i le Maopu ia Fano i le aso ananafi, sa ia taua ai lona agaga fa’afetai ina ua filifilia o ia e avea ma sui o le itumalo i le maota maualuga.

“Fa’afetai i le Atua ina ua fa’aaogaina lo’u tagata fa’atauva’a i lenei tofiga, fa’afetai fo’i i le itumalo mo lenei fa’aeaea maualuga, o se avanoa lelei lenei e fa’aauau ai pea la’u tautua i le aiga, nu’u, itumalo ma Amerika Samoa”, o le saunoaga lea a Fano.

O le aso Sa na te’a nei i le To’ona’i masani a le afioga i Pago Pago na toe filifilia ai le tofa Tuaolo e avea ma Senatoa, ina ua fulisia sui o le afioaga atoa e aofia ai ma le afioga i le Maoputasi ia Mauga Tasi Asuega e toe avea Tuaolo ma sui o le itumalo.

Na taua e le afioga i le Maoputasi ia Mauga i le Samoa News e fa’apea, talu ai o Tuaolo sa ia fa’aauauina le nofoa sa ia tauaveina mai, o le mafua’aga lea ua ia manatu ai e tatau ona tofia ia Tuaolo e avea ma sui o le itumalo mo le isi nofoaiga a le maota maualuga o lo o lumana’i nei.

E tofia Tuaolo na te fa’aauauina le tofi Senatoa a Pago Pago, o lo o avea o ia ma Komesina o le Ofisa o Palota a le malo, ma filifilia ai loa e le ali’i kovana le afioga a Uiagalelei Dr. Sialofi Uiagalelei na te tauaveina le tofi Komesina o Palota seia oo mai i le taimi nei.

“E le fesiligia le agava’a o le tofa a Tuaolo, sa tautua o ia i vaega e 3 o le Faigamalo a Amerika Samoa i le tele o tausaga, sa avea ma Fa’amasino mo le tele o tausaga, sa avea ma sui o le Kapeneta i le nofoaiga a Togiola ma Faoa fa’apea ai ma le nofoaiga lenei a Lolo ma Lemanu, sa avea fo’i o ia ma Senatoa o le afioaga i Pago Pago i tausaga ua mavae, ma ua lava lona silafia i soo se auala e fa’afoe ai le malo, fa’amasinoga fa’apea ai ma le Fono Faitulafono”, o le saunoaga lea a le afioga i le Maoputasi ia Mauga.

Na taua e le tofa a Tuaolo lona agaga fa’afetai i le afioaga ma le Itumalo i lo latou fa’atuatuaina o ia e fai ma o latou sui i le maota maualuga a le atunu’u, ma ua ia sauni fo’i e fa’aauau lana tautua mo le afioaga ma le itumalo, fa’apea ai le atunu’u atoa.

Sa ia taua i le Samoa News le tele o mataupu taua e tatau ona finauina ma talanoaina, mo le manuia o Amerika Samoa i le lumana’i, aemaise ai o le fausiaina lea o tulafono e manuia ai tupulaga o lo o fa’amoemoe i ai le lumana’i o le atunu’u.

Mai  nofoa e 18 i totonu o le maota maualuga a le Senate, e na o le 3 nofoa ua mae’a ona fa’amaonia mo le nofoaiga lona 35 o le a sosoo nei, o ia nofoa e aofia ai nofoa e 2 mai le Itumalo o le Maoputasi, fa’apea ai ma le nofoa mo le itumalo o le Vaifanua, lea e pei ona toe filifilia i ai le afioga i le Tama’ita’i o le Ao ia Gaoteote Palaie Tofau e le itumalo i lana fonotaga i le amataga o le masina lenei.

O le tele o itumalo ua fa’amoemoe e faia a latou fonotaga e saili ai ni o latou nofoa i le maota maualuga a le Senate i le masina lenei o Novema.