O se tasi o mataupu na lalafo i ai afioga i Senatoa i le taimi o folafolaga a le maota maualuga ananafi, o se avanoa e mafai ai ona fa’amuta le lafoga o totogi e 2% o loo totogi e tagata faigaluega i le atunu’u mo le falema’i, ae vaavaai loa i se auala e mafai ai ona fa’aaoga le 2% lea e avea ma tupe e fa’aopoopo i le teugatupe o le litaea a le malo.

Na taua e le afioga i le ali’i senatoa ia Tuaolo M. Fruean e fa’apea, e tusa ai o lana faitau atu i le tulafono, e i ai lona talitonuga atonu ua mae’a ona toe totogi le aitalafu na mafua ai ona fuafua le lafoga e 2%, mo le toe fa’atumuina o le vaega tupe lea sa aumai i le Teugatupe a le Ofisa o Taui mo Fa’alavelave fa’afuase’i e $3 miliona, lea sa ave e fesoasoani ai mo le falema’i o le LBJ i Faga’alu, ae manaia loa e fa’aaoga le 2% lea e fesoasoani ai i le fa’atuputeleina o saofaga mo le teugatupe o le litaea a le malo.

Saunoa atili Tuaolo e fa’apea, e le tau fesiligia e le maota le tulaga moomia o loo i ai le fafagaina o le teugatupe o le litaea, e pei ona fa’afofoga i ai afioga i Senatoa i le fonotaga sa usuia i Hawaii i le lua vaiaso talu ai, lea fo’i sa malaga atu i ai sui o le Fono Faitulafono a le atunu’u.

“O le mea moni lava e pei ona tatou silafia uma, ua matua mana’omia lava e le teugatupe a le litaea se fesoasoani ina ia fa’atupu ai saofaga o loo aga’i i totonu o le teugatupe o le litaea a le malo”, o le saunoaga lea a Tuaolo.

Ae na taua e le Peresetene o le maota maualuga ia Gaoteote Palaie Tofau e fa’apea, e i ai lona talitonuga ua mae’a ona toe totogi le tupe sa fa’aaitalafu e le falema’i, peita’i o le tulaga o loo i ai le lafoga e 2% i le taimi nei, o lo o fa’aauau pea ona tu’uina atu uma mo le atina’e a le falema’i e le o taofia, ona o le manatu alofa fo’i i le fa’aleleia o le tautua a le falema’i.

I le fesiligia ai e Tuaolo o le mataupu i le lafoga o totogi e 2%, na taua ai e Gaoteote le tatau lea ona talanoaina e le Fono Faitulafono lenei mataupu, ona o se tasi lenei o mataupu o loo to’atele tagata o loo fia malamalama i ai, e mafua mai ona e na o tagata faigaluega o loo tipi la latou tupe e fesoasoani ai mo le falema’i, ae le fa’apea e na o tagata faigaluega e a’afia i gasegase, ae gasegase uma lava tagata o le atunu’u.

O se tasi lenei o mataupu sa lalafo i ai le afioga i le kovana ma lana kapeneta i le ulua’i 4 tausaga o le nofoaiga, fa’apea ai fo’i ma afioga i senatoa ma faipule o le fono faitulafono, i se auala e fa’amuta ai loa le toe totogiina atu e tagata faigaluega o lenei lafoga, peita’i e o o mai lava i le taimi nei e lei faia lava i ai se gaioiga.

Soo se taimi e fesiligia ai e le maota maualuga atoa ai ma le maota o sui o sui o le Pulega a le falema’i o le LBJ e uiga i le lafoga o totogi e 2%, e talosagaina ai lava e le Pulesili o le LBJ ia Taufete’e J. Faumuina le Fono ina ia fa’aaua pea ona totogi atu le tupe lea mo le falema’i, ona o loo matua mana’omia e le falema’i le fesoasoani tau tupe a le malo.