Ads by Google Ads by Google

Falepuipui le ali’i na ia faia uiga mataga i se teineititi 12 tausaga

ausage@samoanews.com

O le ali’i e 20 tausaga le matua lea na ta’usasla e le fa’amasinoga maualuga i lona faia o amioga fa’asotoma i se teineititi e 12 tausaga le matua, ua poloaina nei o ia e le fa’amasinoga maualuga ina ia taofia i le toese i Tafuna mo le umi e 5 tausaga, o se tasi lea o tuutuuga o lana fa’asalaga fa’anofovaavaaia e 15 tausaga sa tu’uina mai e le fa’amasinoga i le taimi na lau ai lona fa’asalaga i le vaiaso na te’a nei.

 

Na ulua’i tu’uaia e le malo ia le ali’i o Ta’auso Fa’afetai Siliga i moliaga mamafa e 4 e aofia ai le moliaga pito sili ona mamafa o lona faia o uiga mataga i se teineititi e i lalo o le 12 tausaga le matua, moliaga o le faia o amioga fa’asotoma, faia o gaioiga mataga fa’afeusuaiga, ma le moliaga o lona tagofia lea o itutinosa o se teineititi laititi, fa’apea ai ma le moliaga mama e tasi o lona faia lea o ni gaioiga e lamatia ai le saogalemu o fanau laiti.

 

Ae i lalo o se maliliega na sainia e Siliga ma le malo ma talia fo’i e le fa’amasinoga maualuga, ua malie ai le malo e tali ioe Siliga i le moliaga mamafa e tasi o lona faia lea o uiga fa’asotoma i le teineititi na a’afia, ae solofua uma isi moliaga o loo totoe ai i le pepa o tagi sa latou fa’aulu, lea fo’i na talia e le fa’amasinoga.

 

Ina ua maua le avanoa o Siliga, sa ia fa’atoese ai i le fa’amasinoga atoa ai ma le aiga o le teineititi na a’afia e tusa ai o lana solitulafono sa faia. Sa ia ta’utino i le fa’amasinoga na te le toe faia se solitulafono fa’apenei i le lumana’i.

 

Sa ia taua atili e fa’apea, i le lata ai i le tausaga atoa o taofia o ia i le toese, sa ia a’oa’oina ai se lesona taua mo lona olaga, ma ua ia manatu ua aoga tele lea mo ia i le lumana’i. Sa ia taua lona a’oa’oina o se lesona taua mai le mea sese sa ia faia, atoa ai ma lona talitonuga o loo i ai, o loo mana’omia o ia e lona aiga ina ia latou toe mafuta, e fa’apena fo’i o ia, o loo ia mana’omia fo’i lona aiga.

 

“Ou te fa’atoese atu ia outou afioga fa’amolemole, tu’u mai se avanoa se tasi mo a’u se’i toe fa’aleleia ai lo’u olaga, fa’amagalo mai fo’i sa’u solitulafono sa fai”, o le fa’atoesega lea a Siliga, ae o le taimi lea sa fa’alogoina ai lagona mafatia o si ona Tina i totonu o le potu fa’amasino.

 

Na tutulu si ona Tina ao i ai o ia i luga o le nofoa molimau, i le taimi na taumafai ai e fa’amatala le olaga o Siliga ao tuputupu a’e o ia. Na taua e le Tina ma ona loimata e fa’apea, o le sese a lana tama o le sese fo’i lea a ia o le Tina.

 

I le tala’aga o Siliga e pei ona fa’ailoa e lona Tina i le fa’amasinoga, sa ia taua ai le amata mai o le olaga a’oa’oina o lana tama mai le aoga ECE seia oo atu lava i le aoga maualuga, sa ia taua fo’i ona mafaufauga sa i ai e pei fo’i o isi uma Matua, ia aua ne’i a’afia fanau i fa’aosoosoga ma mailei a le fili, a ia maua so latou lumana’i manuia. I le taofia ai o lana tama i le toese, na taua ai e le Tina le fai lea ma avega mamafa, ona o se taimi muamua lea ua tula’i mai ai se tulaga fa’apea ua taofia ai lana tama i le falepuipui, atoa ai ma le solitulafono e pei ona ta’usalaina ai lana tama.

 

Na fa’atoese le tina i lona afioaga ma le ekalesia, ona o le ta’uleagaina o latou igoa i le solitulafono a lana tama. Na fa’ailoa atili e le Tina i le fa’amasinoga, le mae’a lea ona faia o le fa’asalaga a ali’i ma faipule o le afioaga i lona aiga, ma ua mae’a fo’i ona tu’uina atu sa latou faatoesega i le aiga.

 

“Ou te talitonu ma lo’u agaga atoatoa, o a’u o le Tina e pau i ai le leaga ma le solitulafono a la’u tama, i lo’u fa’atamala lea e fa’atino o’u tiute fa’a Tina”, o se vaega lea o le fa’atoesega a le Tina i le fa’amasinoga, ma ia talosagaina ai se fa’asalaga mama mo Siliga. Sa ia taua atili e fa’apea, atonu o le isi mafua’aga o le solitulafono a lana tama, ona o loo toesea le Tama o le aiga mo ana talavai i atunu’u i fafo.

 

I le fa’aiuga o lana fa’atoesega, sa ia talosagaina ai ali’i fa’amasino ina ia toe tu’u se isi avanoa ia Siliga, ina ia mafai ai ona alu o ia e fa’aauau lana aoga ma saili ai sana galuega e fesoasoani ai i lona lumana’i atoa ai ma le lumana’i o le latou aiga.

 

Na taua e le loia a Siliga ia Douglas Fiaui i le fa’amasinoga, lona talitonu atoatoa ua matua salamo lava le ua molia e tusa ai o lana solitulafono sa faia, ma ua ia taliaina fo’i le sese o le gaioiga sa faia, lea ua mafua ai ona taofia o ia i le toese mo se taimi umi. I le fa’aiuga o le folasaga a Fiaui, na ia talosagaina ai le fa’amasinoga mo se fa’asalaga mama fa’anofovaavaaia mo Siliga, peita’i e fa’atuiese i ai le loia a le malo ia Bob Pickett.

 

Na taua e Pickett i le fa’amasinoga le matuia o le gaioiga sa faia e le ua molia, lea sa a’afia ai le saogalemu o se teineititi e 12 tausaga le matua, ma ia finauina le taofia lea o ia i le falepuipui mo le umi e 15 tausaga, poo le fa’anofovaavaaia fo’i o ia mo le umi e 15 tausaga, a ia aofia ai ma le tuutuuga o lona tuliina lea o le umi e 5 tausaga i le falepuipui.

 

Sa ia fa’aluaina le taua o le fa’atoesega ma le faatoesega a le aiga ua mae’a ona faia i le nu’u ma le Ekalesia, atoa ai ma lona talitonuina o fa’amatalaga uma e fa’atatau i le olaga o Siliga, o ia o se ali’i atamai ma lelei, peita’i o le matuia o le gaioiga sa ia faia o le mulimuli lea i le teineititi e 12 tausaga le matua.

 

Na taua e le afioga i le ali’i fa’amasino sili ia Michael Kruse i lana saunoaga ao lumana’i ai le tu’uina mai o le fa’asalaga a Siliga e fa’apea, ana tu’uina atu le mataupu lenei e fa’ataunu’u sona fa’amasinoga autu, ma ta’usala ai le ua molia i le moliaga e sili atu ona mamafa le fa’asalaga o le faia o uiga mataga i fanau e i lalo o le 12 tausaga le matua, e ono oo atu le fa’asalaga i le taofia lea i le toese mo le olaga atoa, e aofia ai le fa’amalosia o le tuliina o le 10 tausaga i le falepuipui.

 

Sa manatu le fa’amasinoga e fa’asala le ua molia i le falepuipui mo le umi e 15 tausaga, ae i le mae’a ai ona iloilo o fa’afinauga mai loia, o le fa’atoesega a le ua molia atoa ai ma le talosaga a lona Tina, na manatu ai loa le fa’amasinoga e fa’anofovaavaaia Siliga i le toese mo le umi e 15 tausaga, i lalo o tuutuuga ua lava le 5 tausaga e taofia mo’i ai loa o ia i le falepuipui.

 

Ae a mae’a ona ia tuliina masina e 18, ona mafai lea ona toe iloilo e le fa’amasinoga se talosaga e tu’uina atu e le ua molia ma lana itu, e fa’ailoa atu ai se fuafuaga a le ua molia mo le fa’aauauina lea o lana aoga. Ua poloaina fo’i le lesitalaina o ia i le lisi o tagata ua ta’usala ma fa’amaoonia i le faia o uiga mataga i fanau laiti.

 

O le afioga i le ali’i fa’amasino ia Fa’amausili Pomele ma Mausau Tasina Tofili na lagolago i le fa’amasino sili i le iloiloina o se fa’aiuga o lenei mataupu.