E 5 moliaga mamafa ua mae’a ona faila e le malo o Tonga i luma o le Fa’amasinoga Maualuga  i lea malo fa’asaga i le ali’i o Dean Jay Fletcher, o se sitiseni o Amerika, e mafua mai i le fa’alavelave lea o lo o tu’uaia ai o ia, i lona fasiotia lea o lona to’alua i le aso 6 Iulai 2016 i Neiafu, i le motu o Vava’u.

O moliaga ua molia ai Fletcher, 53 tausaga mai Amerika, e aofia ai le moliaga o le fasioti tagata, fasioti tagata pa’i valea po o le fa’ao’o o manu’a tuga i se isi tagata, fa’alavelave i le malo i le fa’atinoina o a latou galuega, fa’apea ai ma moliaga e 2 o le sola ese mai lea i lalo o le vaaiga a Leoleo.

I se pepa o fa’amatalaga mai le Ofisa o le Loia Sili a Tonga, o lo o taua ai feutanaiga sa faia i le va o le malo o Tonga ma le Iunaite Setete o Amerika, ona o le taumafaiga ina ia maua se auala e toe fa’afo’ia tu ai lenei ali’i i Tonga mo le fa’aauauina o lana fa’amasinoga.

O lo o taua i totonu o lea pepa o fa’amatalaga e fa’apea, i le mae’a ai ona logoina e le Komesina o Leoleo o le Ofisa o le Loia Sili e fa’atatau i le taimi na sola ese ai Fletcher mai lalo o le vaaiga a Leoleo a Tonga, na fa’afeso’ota’i ai loa e le Ofisa o le Loia Sili le Matagaluega o Setete a le malo tele o Amerika i le aso 4 Oketopa 2016, mo se auala e mafai ai ona toe fa’afo’i atu lenei ali’i i Tonga.

O le aso 13 Aperila 1977 na sainia ai se maliliega i le va o Tonga ma le Iunaite Setete, mo le toe fa’afoiina atu o i latou e a’afia i solitulafono ae sosola ese mai i le va o atunu’u e lua, lea fo’i la o lo o aofia ai ma Amerika Samoa, ona o le teritori lea o le Iunaite Setete.

O le maua ai e le Ofisa o le Loia Sili a Tonga o se tali mai le sui o le Matagaluega o Setete a le malo tele e uiga i lenei mataupu, na fa’agasolo ai loa talosaga ma feutanaiga mo le tapenaina lea e le malo tele o Amerika o se poloaiga e taofia fa’apagota ai lenei ali’i, taua mai lea i le Fa’amasinoga Feterale a le malo tele, ma sauni ai loa mo le toe fa’afo’iina atu i Tonga.

O le gaioiga e toe fa’afo’i atu ai se tagata o lo o mana’omia i Tonga po o Amerika i se solitulafono, o se auala lea ua malilie i ai malo e lua ina ia fesoasoani ai i le fa’afaigofieina o gaioiga e toe pu’e fa’apagota ai i latou ua sosola mai atunu’u sa latou fa’atinoina ai ni solitulafono.

A o fa’atalitali mai ai le malo o Tonga i le taimi e toe taunu’u atu ai i ona laufanua le ali’i o Fletcher, mo le fa’agasoloina ai lea o taualumaga o lana fa’amasinoga e pei ona tu’uaia ai o ia, o le vaiaso nei na solofua ai e le Fa’amasinoga Fa’aitumalo a Amerika Samoa le moliaga mama e tasi sa tu’uaia ai e le malo ia Fletcher, ae ua taoto atu nei le fa’aauauina o lana mataupu i lalo o le vaavaaiga a le vaega o le Feterale.

E to’atolu sui o le Feterale sa i ai i le atunu’u i le vaiaso na te'a nei, o i latou fo’i ia na tu’u atu i ai le vaavaaiga o Fletcher ina ua aveesea mai o ia mai lalo o le vaavaaiga a le malo o Amerika Samoa.

Na fa’amaonia mai e se Leoleo Sinia o le toese i Tafuna i le Samoa News e fa’apea, o le po o le aso Gafua na te’a nei na momoli aloaia atu ai Fletcher i le malae va’alele i Tafuna, ma malaga fa’atasi atu ai loa ma sui e to’atolu o le Feterale i le malaga a le Hawaiian Air mo Hawaii.