O le fonotaga e pei ona tu’u fa’atasia e le Matagaluega o Tautua ma Auaunaga Lautele a le malo (DHSS), lea sa fa’ataunu’uina i le Fale Laumei i le vaiaso nei e avea ma polokalame e fa’ataua ai le masina lenei, o lo o fa’ataua ai le tete’e atu i sau’aga i totonu o aiga, ua manino mai ai i saunoaga sa folasia e ni isi o sui mai Faalapotopotoga o lo o galulue e tete’e atu i sau’aga i totonu o aiga, e aofia ai ma le sui mai Samoa, le fa’atupulaia pea lea o sau’aga i totonu o aiga i Samoa.

Na taua e le Faletua ia Mareta Savusa mai le vaega a le Samoa Victim Support Group (SVSG) le to’atele o fanau aemaise ai o Tina o lo o sulufa’i atu i le latou Ofisa mo se toomaga, ona o sauaga o lo o a’afia ai i latou i totonu o aiga nu’u eseese i le atunu’u.

“E tasi lava le mafua’aga na ala ai ona fa’avaeina le Ofisa o Sulufaiga mo e Puapuagatia i Samoa, o le taumafai lea ina ia ofo atu auala eseese e fesoasoani ai i soo se tasi e a’afia i sau’aga i totonu o aiga faapea ai nu’u ma afioaga eseese i totonu o Samoa, ma e ui o lo o maitauina le fa’atupulaia pea o nei uiga le manuia, ae o lo o galulue pea le SVSG ma isi fo’i ona lala ina ia faia auala uma e mafai ai ona foia lenei fa’afitauli”, o le saunoaga lea a Savusa.

E pei ona fa’amatalaina e Savusa i lana saunoaga, o le SVSG na amata afuafua mai i Samoa ina ua a’e se manatu i se tama’ita’i loia Samoa, sa gafa ma le taulimaina o le tele o mataupu e fa’atatau i sau’aga i totonu o aiga i luma o le fa’amasinoga, ua tatau ona i ai se Ofisa autu e sulufa’i i ai tagata o lo o pagafia i sau’aga soona fai ma le le alofa, e le gata e faia fa’asaga i fanau laiti, ae o Tina fo’i ma tagata matutua i totonu o aiga.

“O le moemitiga a lenei tama’ita’i loia Samoa na i’u ina manuia, ina ua latou malilie fa’atasi ma ni isi o tagata e fa’avae loa lenei Ofisa, ma o se Ofisa e le galulue mo se tupe fa’asili, ae ofo uma atu lo latou taimi, tomai ma le malosi e fesoasoani ai i soo se tasi e a’afia i sau’aga i aiga”, o le saunoaga lea a Savusa.

O se tasi o la’asaga o lo o fa’aauau pea ona faia e le SVSG i le taimi nei, o le oo atu lea i totonu o aiga o lo o tutupu ai fa’afitauli nei ma faia ai ni a latou aoaoga, ina ia mafai ai ona a’oa’oina mafaufau o fanau ma matua i auala e foia ai fa’afitauli nei mai le fa’aauau pea lea ona tutupu i aiga.

“Talu ona faia a matou a’oa’oga (training), ua silia i le to’a 300 ali’i ma tama’ita’i ua mafai ona fa’au’u manuia mai ai, fa’atasi ai ma le latou ta’utinoga masani, o le a latou vavalalata ma aiga o lo o a’afia i nei sau’aga, ina ia mafai ona fanau mai ai se suiga fou i totonu o aiga”, o le saunoaga lea a Savusa.

Saunoa atili Savusa e fa’apea, e leai se isi a’upega e sili atu ona lelei ma faigofie ai ona maua se mapusaga mo se tagata ua a’afia i ni sau’aga, nai lo le lelei o le feso’otaiga ma vave fa’ailoa le fa’afitauli, ona mafai ai fo’i lea ona a’apa atu le Ofisa e saili le fofo.

O fa’amaumauga na mafai ona fa’asoa e Ofisa eseese o lo o galulue mo le puipui atoa ai ma le tete’e atu i sau’aga i totonu o aiga ma le atunu’u, e aofia ai ma le Ofisa a le DHSS, na taua ai le to’atele o tagata eseese o lo o a’afia i sau’aga o lo o faia ma le le alofa i totonu o aiga.

“O i latou o lo o a’afia i sau’aga eseese nei e aofia ai fanau tama’ita’i, fanau laiti, fafine, tamaloloa, e o o lava fo’i Tama ma Tina tausi i totonu o aiga, ae o le itu e pito sili ona ofo ai le mafaufau, o le to’atele o fafine o lo o a’afia i nei sau’aga, o nai fafine mai Upolu”, o le saunoaga lea a se sui o le Ofisa o le DHSS.

O se ripoti fa’amomoi loto na fa’amatalaina e le sui o le Ofisa a le DHSS i luma o le aofia, i se Tina matua na sulufa’i atu i le latou Ofisa mo se fesoasoani, ina ua le lelei le tausiga o ia e lona aiga, fasi ma soona fai o ia, atoa ai ma le tuu lafoa’i o ia e aunoa ma le vaaia lelei poo saogalemu lona ola.

Na taua e le sui o le DHSS i luma o le aofia e aofia ai ma le Faletua o le ali’i kovana ia Cynthia Moliga e fa’apea, ina ua latou taunu’u i le fale o le Tina sa sulufa’i atu mo se fesoasoani, sa latou molimauina ai tulaga fa’aletonu i ona foliga, o le manogi o le fale e le fia nofo ai se isi, e oo fo’i i lona tino ua manu’anu’a ma leaga, e foliga mai o se tagata ua leva ona faia i ai sau’aga le alofa a lona aiga.

“O ni isi nei o lu’itau ma vaaiga faamomoi loto na matou te molimauina i le taimi na matou taunu’u atu ai i le fale o lenei Tina, ma o ni isi fo’i nei o lu’itau o lo o matou fetaia’i pea i le tele o aso matou te taulimaina ai telefoni mai ia i latou o lo o a’afia i sau’aga, e le gata e pagatia le tino ae a’afia fo’i le mafaufau, ma, o le taimi fo’i lea matou te tula’i atu ai ma fesoasoani loa e fa’atino auala uma ina ia fesoasoani ai ia te ia”, o le saunoaga lea o le sui a le DHSS.

O Tina mai Upolu e pei ona taua i le ripoti a le DHSS o lo o pito sili ona to’atele ai tagata o lo o a’afia i sau’aga i totonu o aiga, o Tina ia ua le toe mana’omia e aiga o lo o nonofo ai, ona latou faia ai loa lea o uiga nei, e aofia ai ma le fa’afefe o i latou i le toe tipoti i Samoa.

E le gata sa maua le avanoa e fa’afofoga ai le aofia i ripoti mai Ofisa o lo o galulue e fa’atino gaioiga uma e tete’e atu ai i le faia o sauaga i aiga, ae sa fa’apea fo’i ona maua le avanoa o le Ofisa o Aoga Fa’afaufautua a le Ekalesia Katoliko, e fa’ailoa ai a latou polokalame o lo o fesoasoani ai i tagata o lo o molia ma ta’usala i le faia o sau’aga i totonu o aiga.

Na taua e le sui o le Ofisa o le “Catholic Social Services” mai le Fatuoaiga e fa’apea, o le to’atele o i latou sa mafai ona latou galulue ma ofo atu i ai a’oa’oga fa’afaufautua ina ua ta’usala i latou i le faia o sau’aga i totonu o aiga, ua latou a’oa’oina le tele o lesona aoga mo latou olaga, e fesoasoani ai mo le toe fuata’iina o se isi olaga fou.

“E mafua ona a’afia le tagata i lona fa’atinoina o sau’aga fa’asaga i fanau ma tina, e le o taua ia te ia lana filifiliga o le a faia, po o se filifiliga e manuia ai lona aiga, po o se filifiliga fo’i e malaia ai lona aiga, ae i le mae’a ai ona matou galulue ma le to’atele sa ta’usala i le faia o sau’aga fa’asaga i aiga, ua manino mai ai lo latou a’oa’oina o se lesona taua i o latou olaga mo le lumana’i”, o le saunoaga lea a le sui o le DHSS.

O lenei aoaoga e na o le tasi lava le aso, sa fa’ataunu’uina fo’i ina ia mafai ai ona fetufaa’i auala ma metotia e mafai ai ona foia le fa’atupulaia o sau’aga i totonu o le atunu’u i le taimi nei.