Ads by Google Ads by Google

Fa’asea Fuimu ma o latou aiga i le le amanaiaina o i latou Komesina

ausage@samoanews.com

Ua fa’aalia lagona fa’asea o ni isi o ali’i Fuimu mai le Vaega Fuimu a le Matagaluega o le Puipuiga o le Saogalemu Lautele atoa ai ma o latou aiga, i le le amanaiaina e le Komesina o Leoleo o le latou tautua.

 

O ia lagona fa’asea ma le le fiafia, na alia’e mai ina ua manino i le finagalo fa’aalia o le afioga i le Komesina o Leoleo ia Le’i Sonny Thompson, o le siitaga o lo o fuafuaina mo le Matagaluega i se taimi e le o toe mamao, o lo o fa’amuamua ai le sii o totogi o Leoleo.

 

Na taua e ni isi o ali’i Fuimu i le Samoa News e fa’apea, o le fonotaga a le Komesina ma sui uma o le Fuimu sa faia i le 3 vaiaso talu ai i le nofoaga autu a le Vaega Fuimu i Fagatogo, na fa’ailoa atu ai e le Komesina le ave o le fa’amuamua e sii ai totogi o leoleo, ae o se taimi mulimuli mai fa’atoa maua lea o sa latou si’itaga.

 

“Afai ua manatu le Komesina e si’i totogi o tagata uma o lo o galulue i le fa’amalosia o le tulafono, e tatau ona aofia uma ai leoleo, Fuimu ma leoleo o le toese i Tafuna, ae le o le ave o lana fa’amuamua i leoleo ae fa’atuatuana’i le Vaega Fuimu”, o le fa’asea lea a se tasi o ali’i Fuimu.

 

Na taua e ni isi o le Vaega Fuimu e fa’apea, e le taitai tutusa le auala o lo o faafoe ai e le Komesina o Leoleo le ofisa o leoleo, ma le auala o lo o tali atu ai i le Vaega Fuimu.

 

“E ave lava le fa’amuamua a le ali’i Komesina i ali’i ma tama’ita’i leoleo ae leai sona manatu popole mai i le Vaega Fuimu. O lea na matou tigaina uma e faatutumu avanoa mo le to’atele o Leoleo, ona ua tau fai aga’i uma atu Leoleo e galulue i le FEMA ma maua ai a latou fa’amanuiaga, ae tigaina ai Fuimu e fa’atutumu avanoa sa mana’omia”, o le saunoaga lea a se tasi o ali’i Fuimu sinia.

 

“E ave lava le faamuamua e fa’atau ai mea faigaluega mo leoleo ae fa’atuatuana’i le Fuimu. Ua tuai ma fa’aletonu a matou mea faigaluega, ao lea fo’i ua maua tala o le a fa’atau mai pasika fou a leoleo, o ta’avale, ma le anoanoa’i lava o isi fa’amanuiaga e ave ai le fa’amuamua a le Komesina i leoleo, ae le amanaia Fuimu”.

 

Na taua e se tasi o tama’ita’i o lona Tama o se ali’i Fuimu ua silia i le 10 ma ona tupu tausaga o tautua i lea galuega, o se vaaiga faanoanoa le galue faamaoni o lona Tama i lenei galuega, ae le o talafeagai lona totogi.

 

“O aso uma e alu ese mai ai lo’u Tama ma le fale, ou te tatalo i le Atua ina ia toe fo’i atu, ona e le faigofie lana galuega, ae foliga mai e le o manatu mamafa i ai le Komesina o Leoleo”, o le manatu lea o lea tama’ita’i.

 

O le lagona fo’i lea na fa’aalia e se tasi o Tina o lona toalua e galue i le Vaega Fuimu. Na taua e le Tina i le Samoa News e fa’apea, mai le tele o tausaga o tautua lona to’alua i le galuega, na te fa’alogoina lava lagona le fiafia i le auala o lo o pulea ai e Komesina ua mavae atu atoa ai ma le Komesina o lo o i ai nei le Vaega Fuimu.

 

“O lana lava molimau, e ave lava le fa’amuamua i leoleo ae fa’atuatuana’i ali’i Fuimu, ma o se lagona e mafatia ai le loto, ona ua leai se talitonuga o tagata faigaluega i Ta’ita’i”, o le molimau lea a le Tina.

 

Ina ua fesiligia e Faipule ia Le’i i se iloiloga sa faia a le Komiti o le Puipuiga o le Saogalemu Lautele a le maota o sui i le masina na te’a nei, na fa’aalia ai e Le’i le lagona lava fo’i lea e tasi, o le si’i muamua lea o totogi o leoleo ae mulimuli mai ai le Vaega Fuimu i se taimi o i luma.

 

Ina ua fesiligia e le Sui Fofoga Fetalai ia Fetu Fetui Jr le Komesina pe aisea ua le aofia ai le Vaega Fuimu i le siitaga o totogi a lana Matagaluega ua fuafuaina, na saunoa ai Le’i e fa’apea, e le lava le tupe e fa’atupe ai siitaga o totogi mo le matagaluega atoa, o le mafua’aga lena ua manatu ai e fa’amuamua siitaga mo totogi o leoleo, ae mulimuli mai ai Fuimu ma leoleo o le toese i se taimi o i luma.

 

Na taua atili e Le’i e fa’apea, afai e sii uma lava totogi o le matagaluega, e silia i le $9 miliona le tupe e tatau ona saili e le malo e fa’atupe ai lenei si’itaga.

 

Na taua e se tasi o Fuimu sinia e fa’apea, afai o le tulaga lea ua i ai le le amanaiaina o le latou tautua, ua tatau loa ona Tumaoti lava le Vaega Fuimu, aua ne’i toe i lalo o le ta’ita’iga a le Komesina o Leoleo.