O le aso 6 o Ianuari 2017 lea ua fa’atulaga e le fa’amasinoga maualuga e tu’u atu ai sana fa’aiuga fa’asaga i le ali’i o Mosegi Solia Jr, i le mae’a ai lea ona ta’usala o ia e le fa’amasinoga maualuga i le solitulafono lea ua ia tali ioe i ai, i lona soliina lea o tulafono tau i Vailaau ma Fualaau fa’asaina a Amerika Samoa.

O le ali’i o Solia Jr po o Joe Palagi fo’i e pei ona silafia ai o ia e le to’atele o tagata, na ulua’i tu’uaia e le mal i moliaga mamafa e lua, le moliaga o lona umia fa’asolitulafono lea o vaega o le pauta fa’asaina o le aisa, atoa ai ma le moliaga o le tete’e atu lea i Leoleo a o taumafai e pu’e fa’apagota o ia.

Ae i lalo o se maliliega na latou sainia ma le malo ma ua taliaina fo’i e le fa’amasinoga maualuga i le taeao ananafi, ua ia tali ioe ai i le moliaga muamua lea ua toe teuteu e le malo, ina ia fa’ailoa ai le solitulafono mamafa o lona soli lea o le Tulafono o Vailaau ma Fualaau a Amerika Samoa, o le vaega D lea o solitulafono mamafa, lea e mafai ai ona fa’asala se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000.

Na taua e le ali’i o Solia Jr, 25 tausaga le matua o lona soifua i luma o le fa’amasinoga maualuga e fa’apea, i se taimi o le aso 23 Mati 2015 a o taumafai Leoleo e saili o ia, e mafua mai i lona a’afia ai i le fa’alavelave lea na tafana ai e ni isi le Ofisa o Leoleo i Leone, sa ia umia ai fa’asolitulafono se vaega o le pauta fa’asaina o le aisa.

Ina ua vaaia e le ua molia se vaega to’atele o Leoleo ua aga’i atu e pu’e fa’apagota o ia, e mafua mai i se poloaiga ua mae’a ona sainia e le fa’amasinoga, na ia oso ai loa i lalo ma le ta’avale ma tamo’e i le atoa ma le fa’amoemoe ia le mafai ai ona maua o ia e Leoleo, peita’i sa tuliloa o ia e Leoleo ma i’u ina maua ai.

Ina ua taumafai Leoleo e fa’atu o ia i luga, sa talosaga le ua molia i Leoleo, pe mafai ona piki mai lana tupe o lo o ta’atia i luga o le mutia, ae ia ua tago atu i ai le Leoleo e piki mai i luga le tupe, sa molimauina ai le pipi’i fa’atasi o le tupe ma se tama’i pepa iila o lo o i ai vaega o le pauta pa’epa’e, lea na mulimuli ane fa’amaonia, o lea pauta pa’epa’e o se vaega lea o le pauta oona o le aisa.

Na ta’utino atili le ua molia e fa’apea, o lona tali ioe ai i le moliaga lea ua toe teuteu e le malo, na mafua mai lea ina ua mae’a ona fa’amalamalama atu e lana loia fautua ia Michael White tuutuuga uma o le maliliega, atoa ai ma le i ai lea o mau fa’amaonia a le malo e mafai ona lagolagoina ai la latou tagi e faia fa’asaga ia te ia i le aso e fa’amasinoina ai lenei mataupu.

E tele fesili na fesiligia ai e le fa’amasinoga le ua molia i le taeao ananafi, e tusa ai o tuutuuga uma o le maliliega lea ua latou sainia ma le malo, aemaise ai lava le naunau o le fa’amasinoga e fia mautinoa, pe ua malamalama atoatoa le ua molia i tuutuuga uma o le latou maliliega ma le malo.

Na taua e Solia Jr i le fa’amasinoga e fa’apea, o lana tali ioe fa’asaga i le moliaga lea ua ta’usala ai o ia, e lei faia ona o se taumafai o se tasi e fa’afefe o ia pe ofo atu fo’i se taui ina ia mafai ai ona suia lana tali tete’e i le tali ioe, ae ua faia ina ua ia malamalama atoa ia latou talanoaga ma lana loia atoa ai ma le loia a le malo.

Talu ai o Solia Jr le isi sa to’afa i ai ali’i ua ta’usala e le fa’amasinoga i le fa’alavelave lea na tafana ai le Ofisa o Leoleo i Leone i le 2 tausaga talu ai, ua poloaina ai e le fa’amasinoga le loia a le malo ia Gerald Murphy, ina ia faila aloaia atu i luma o le fa’amasinoga la latou talosaga e solofua ai moliaga o lo o totoe i le pepa o tagi sa latou fa’aulu fa’asaga ia Solia Jr ma isi ali’i ua ta’usala i le mataupu na tafana ai le Ofisa o Leoleo i Leone, atoa ai ma le talosaga e solofua ai le moliaga o lo o totoe i le tagi sa latou fa’aulu i le mataupu lea ua i luma o le fa’amasinoga.

Ua talosagaina fo’i e le fa’amasinoga le Ofisa Fa’anofovaavaaia ina ia saunia se ripoti e fuafua i ai se fa’asalaga a le fa’amasinoga fa’asaga i lenei mataupu, ae tusa ai ma fa’amaumauga a le fa’amasinoga, ua silia i le 20 masina talu ona taofia Solia Jr i le toese, e fa’atalitali ai se fa’aiuga i mataupu sa tu’uaia ai o ia e le malo.

O le afioga i le ali’i Fa’amasino ia Elvis P. Patea sa taulimaina lenei mataupu, fa’atasi ai ma le lagolagosua a le afioga i le Fa’amasino Lagolago ia Tunupopo Faleafaga.