Ads by Google Ads by Google

Fa’agasolo ulua’i iloiloga a le ali’i o Dean Fletcher i Honolulu


[ata: archive]
ausage@samoanews.com

O le aso Gafua o le vaiaso fou lea ua fa’atulaga e faia ai le ulua’i iloiloga a Dean Jay Fletcher i luma o le Fa’amasinoga Feterale i Honolulu, mo le iloiloina lea pe tatau ona fa’atulaga se vaega tupe e tatala ai o ia i tua e fa’atalitali ai taualumaga o lana mataupu, ae ua tu’uina atu e le malo feterale i le malo o Tonga masina e 2 e tu’uina mai ai sa latou talosaga aloaia, mo se avanoa e toe fa’afo’i atu ai Fletcher i Tonga mo le fa’aauauina o le mataupu o lo o tu’uaia ai o ia i le fa’alavelave lea na maliu ai lona to’alua.

 

E moliaga mamafa e 4 o lo o tu’uaia ai e le malo o Tonga ia Fletcher e aofia ai le moliaga o le fasioti tagata, fasioti tagata pa’ivalea, fa’aoolima matuia, atoa ai ma le sola ese mai lalo o le vaaiga a Leoleo.

 

I le talosaga fa’avaomalo sa tu’uina atu e le malo o Tonga i le Matagaluega o Setete a le malo tele o Amerika, mo se avanoa e toe fa’afo’i atu ai i Tonga ia Fletcher e tali i tu’uaiga ua faia fa’asaga ia te ia, sa fa’apipi’i fa’atasi atu ai ma fa’amaumauga o le tagi fa’asaga ia te ia, e tusa ai o le fa’alavelave lea na tula’i mai i le masina o Iulai 2016 i Neiafu, Vava’u, lea na vaaia ai e ni molimau se to’atolu lona fa’aoolima i lona to’alua.

 

Na taua i fa’amaumauga le iloa e ni ali’i tofu tofu i le sami (local diving operators) o Fletcher o lo o nofonofo i luga o le uafu i Neiafu Port of Refuge i Tonga, e fa’atalitali ai lona to’alua mo le pikiina o ia ma momoli aga’i i le la va’a faila o lo o taula i luga o le sami, le va’a o le ‘sea oak’.

 

Na taua e molimau i Leoleo i Tonga lo latou vaaia o le taimi na fasi ai e Fletcher lona to’alua ina ua la taunu’u i le la va’a faila.

 

Na taua e le molimau muamua lona vaaia o Fletcher ua tu’i ma kiki lona to’alua, soso’o ai ma lona ato o ia i lalo, i luga o le fola o le va’a. Sa vaaia e le molimau le fa’aauau pea lea ona ta tu’i ma ta kiki e Fletcher o foliga ma le tino o lona to’alua a o ta’atia o ia i lalo.

 

E tutusa lelei lava vaaiga na iloa e le molimau muamua, ma vaaiga na iloa e isi molimau e to’alua ina ua fesiligia i laua e Leoleo. Na taua e isi molimau e to’alua lo la vaaia o Fletcher o ia fa’aoolima i lona to’alua, e ala i lona kiki ma ta tu’i ona foliga.

 

Na taua e le molimau lona lua e fa’apea, ina ua ia vaaia le fa’alavelave, sa oso loa i luga o le pasika a Leoleo lea e fa’aaoga i luga o le sami (jet ski) ma taumafai e fa’alatalata atu o ia i le vaega o lo o taula mai ai le va’a a Fletcher ma lona to’alua, ina ia tau manino ai lana vaai i gaioiga o lo o tutupu mai ai.

 

Ina ua latalata atu lana pasika i le vaega o lo o taula ai le va’a a Fletcher ma lona to’alua na taua e le molimau lona lua i Leoleo lona vaaia o le ua molia o lo o ia ta tu’i ma ta kiki lona to’alua, peita’i ua ia le iloaina atu le tino o le fafine i le taimi lea, ona o lo o ta’atia i luga o le fola o le va’a, peita’i na taua e le molimau lona tolu i Leoleo le manino lelei o lana vaai i le taimi na ta tu’i ai e le ua molia o foliga ma le tino o lona to’alua seia oo ina pau i lalo, aemaise ai o lona fa’alogoina o Fletcher o ia alaga leotele e fa’apea, “O le a ou fasiotia oe”.

 

O le so 7 Iulai 2016 na alu ai Fletcher i le Ofisa o LEoleo i Neiafu ma ripoti i ai lona to’alua ua maliu, e mafua mai ina ua se’e o ia luga o le la va’a faila, peita’i o le aso na sosoo ai, Iulai 8 na maua ai e Leoleo isi fa’amatalaga fou e uiga i lenei mataupu, ina ua fa’ailoa e le molimau lona 4 lana molimau i mea sa ia vaai i ai.

 

Na taua e le molimau lona 4 i Leoleo e fa’apea, ua silia i le 10 tausaga talu ona la masani ma Fletcher, o le mafua’aga lea na ia alu i ai ma fesili i ai i le mafua’aga o le maliu o lona to’alua, ona e mafana la latou mafutaga, peita’i sa fa’ailoa i ai e Fletcher i le molimau lona 4 le mafua’aga na maliu ai lona to’alua, ina ua see o ia i luga o le va’a ao ‘ona ma mafua ai ona maliu.

 

A o fa’agasolo le talanoaga i le va o le molimau lona 4 ma Fletcher, sa maitauina e le molimau le pisia o se pito o le va’a i le toto, atoa ai ma se nofoa o loo i luga o le va’a.

 

O le aso lava lea ina ua mae’a ona talanoa le molimau lona 4 ma Fletcher, na vaaia ai e le molimau muamua le fa’amagoto e Fletcher o se meafale mai lana va’a faila i lalo o le sami.

 

Talu ai o fa’amatalaga ua mae’a ona tu’uina atu e molimau i Leoleo, na mafua ai loa ona faia le poloaiga e taofia faapagota ai le ua molia ae se’i fa’agasolo pea suesuega a Leoleo.

 

O le aso 11 Iulai ina ua mae’a ona taofia e Leoleo le ua molia, na talosaga ai le ua molia i Leoleo mo se avanoa se’i alu ai e fa’aaoga le fale taele, peita’i na fa’afuase’i ona iloa e le Leoleo ia le ua molia ua tamo’e i le atoa, ma fai ai loa ma tuliga i le taimi lea ma toe maua ai le ua molia.

 

O le aso 12 Iulai na tofu tofu ai tagata maulu a Tonga i le vaega o le sami sa taula ai le va’a a le ua molia, ma latou maua ai se nofoa i lalo o le alititai, ma o le nofoa tonu lea na taua e le molimau lona 4 sa ia vaaia i luga o le va’a a le ua molia, ma o lo o pisia fo’i i le toto.

 

Na aga’i atu Leoleo ma latou maua le tino maliu o le to’alua a le ali’i ua molia i totonu o le va’a, fa’atasi ai ma ni manu’a tuga i ona foliga, ae ina ua faia se taotoga faapitoa e saili ai le mafua’aga o lona maliu, na fa’amaonia mai ai e le foma’i fa’apitoa mai le Falema’i o Vailoa Hospital i lana ripoti, na maliu o ia ina ua tele se vaega o le toto o lona tino ua alu ese.

 

O le aso 29 Iulai na maitauina ai e Leoleo mai le Ofisa o Leoleo i Neiafu ia Fletcher ua sola ese o ia mai le sela sa loka ai o ia. Mulimuli ane na iloa ai fo’i ua leai se va’a faila a le ‘sea oak’ mai le vaega o le uafu sa taula ai, ma saili ai loa e le va’a a Leoleo a Tonga le itu ua aga’i i ai le va’a o le ‘sea oak’, ma maua atu ai i se vaega o le sami.

 

Ae ona o le puipuiga lava i le saogalemu o Leoleo, na faia ai le fautuaga ina ia taofia le tuliloaina o le ua molia ma lana va’a, ma fa’aauau mai ai lava le solaaga a le ua molia seia oo mai i Amerika Samoa.

 

O le aso 22 Novema na toe aveese atu ai ma Amerika Samoa ia Fletcher ma taunuu ai i Hawaii, ma taofia ai loa o ia seia oo mai lava i le taimi nei, e fa’atalitali ai taualumaga o lo o totoe o lana mataupu.