Ads by Google Ads by Google

E LE O OE O SE SULI MONI

Vaega 94

 

“.. ae vaai oe si o’u afafine, ia tumau pea le malosi o lou loto atoa ai ma lou fa’atuatua i le Ali’i, na te faia le mea sili mo oe.” Na motu fa’afuase’i le lauga fa’a Faifeau Toeaina a le tamaloa o Meki i lona aiga ina ua vaaia le aga’i atu o le tama’ita’i faigaluega ma a latou meainu, ona sosoo ai loa lea ma le okaina o le latou meaai, ma latou aai fiafia ai lava i lea aso. E sauni loa le aiga o le a latou tuua le fale’aiga ae aga’i atu i le fale e sauni ai mo le feiloaiga faapitoa ma le aiga o Laneselota i le afiafi o le aso lea, ae fa’afuase’i ona latou vaaia ua savali atu se tamaloa e laei mama ma ona laufofoga fiafia, ua ofo alofa atu i le aiga ma fa’ailoa atu i ai lona igoa. “O a’u o Willie, ou te pulea le Faletusi tele i totonu o le aai i lo tatou atunuu nei. Ou te fia iloa poo oe moni lea o Ianeta, le Tusitala o le Tusi ua fa’aigoaina o “O lo’u olaga ma le Siosiomaga.” o le fesili lea a le ali’i lenei, ona luelue atu lea o le ulu o le tamaloa o Meki ma fa’apea atu i ai ma ona foliga fiafia, “Lau susuga Willie, o lea lava, o lo’u afafine lea o Ianeta, o ia lea o le tusitala o le tusi e pei ona e taua. O le taua tele o le mataupu a Willie, na mafua ai ona manatu le aiga e toe nonofo i lalo mo sina taimi, ae se’i fa’asoa atu le manaoga o lenei ali’i. Na faamatala e Willie le to’atele o tagata latou te mana’omia kopi o le tusi a Ianeta, peita’i ua mae’a kopi e 100 sa tuuina atu e fa’atau i le Faletusi. O le mafua’aga lena o lona taumafai e saili Ianeta, pe i ai se avanoa e mafai ai ona toe maua atu se isi sapalai o ni kopi o tusi mo lana Faletusi, peita’i na fa’ailoa i ai e Meki, pau lava ia o kopi sa mafai ona lomia i le taimi na fa’alauiloa ai le tusi. O le tuutuuga o loo iai, afai e mana’o Ianeta e toe lomia nisi ana kopi fa’aopoopo, e sili lava e ia le nofoaga poo se fale lomitusi e lolomi ai, peita’i o le fa’afitauli, e le maua e lo latou aiga se kamupani lomitusi e lolomi ai nisi kopi o le tusi, ae ua to’atele fo’i isi tagata ua talosaga atu moni a latou kopi.

 

“Vaai oe Meki, e mafai ona ou fesoasoani, e i ai la’u kamupani lolomi tusi, e mafai ai ona ou fesoasoani atu i se tau taugofie mo Ianeta, a ia mafai ai ona lomia ni isi kopi se tele e toe fa’atau atu i la’u Faletusi, atoa ai ma ni kopi a i latou o loo fia maua ni a latou kopi o le tusi. Ua taape fiafia le ulugali’i ma le talitonuga, o loo fesoasoani atu lava le Alii i taumafaiga a le tama’ita’i o Ianeta. “Na ou fai atu fo’i ia te oe si o’u afafine, aua e te loto vaivai pe e te vaai maualalo fo’i oe ia te oe, o loo soifua le Atua, o ia na te aumai le manuia mo oe ma lou lumana’i. E fai lava le talanoaga fiafia a le aiga ma latou aga’i atu lava i le latou taavale ma aga’i atu ai loa i le fale i lea taeao. Pe tusa o le toe 5 minute ta le taimi na atofaina atu i le tusi, ae taunu’u loa le aiga i luma tonu o le fale’aiga lea o loo tusia atu i le tusi latou te feiloa’i ai ma le aiga o Laneselota. O le taimi muamua lea ua aga’i atu ai Meki ma lona aiga i le fale’aiga lea, ma o se nofoaga e matua matagofie lava, e foliga mai e na o tagata milione e aga’i i le nofoaga lea.

 

“Faamolemole poo se valaaulia o loo outou malaga mai ai, poo sa outou lava mafutaga faaleaiga,” o le fesili atu lea a le Leoleo faitoto’a i le tamaloa o Meki o loo ia fa’afoeina le ta’avale, “Lau susuga, o matou o loo malaga mai i le valaaulia.” Na tuu atu e le Leoleo Faitoto’a ia Meki le pepa o loo i ai se lisi o igoa, ina ia li’o atu le igoa o loo aofia i le latou valaaulia. Na vaaia e Meki i le lisi, e pito lava i luga le igoa o le ali’i o Laneselota Uatisone, ona ia tago lea ua li’o le igoa lea ma toe fa’afo’i atu le pepa i le Leoleo faitoto’a. Na ona mae’a lava ona vaai o le Leoleo faitoto’a i le pepa, ona ia fa’atonu loa lea o le Meki ina ia afe le ta’avale i le itu taumatau ma alu sa’o ai lava seia taunuu i le faitoto’a o loo fa’asaga mai i le isi itu. Na fa’ateia le aiga ina ua taunuu atu i luma o le faitoto’a o le pa lea, ae latou vaaia ai ni ali’i Leoleo o le malo o lo o tiute mai ai, ae le o ni Leoleo faitoto’a.