Ads by Google Ads by Google

E LE O OE O SE SULI MONI

Vaega 82

 

O le tausaga lona lua o le olaga aoaoina o Ianeta i totonu o le kolisi lea ua mae’a ona lesitala ai o ia e ona matua fai, na ausia e le tama’ita’i togi maualuluga atoa ai ma le fa’ailoga faapitoa na ia maua, e mafua mai i lana taleni o le fai ma Tusitala. O lona atamai na mafai ai ona ia tu’u fa’atasia ulua’i itula e 35 o le tala’aga o lona olaga, lea sa fa’aautuina, “O oe o le Tamafai, ae le o se Sulimoni.” O le Tusi lenei na tusia e le tama’ita’i o Ianeta i le ulua’i tausaga na ulufale ai i totonu o le Kolisi lea ua fa’aaoga ai o ia e ona matua. Na lilo i manatu o Meki ma lona toalua o Lucy, o le a avea le tamaitai o Ianeta ma Tusitala i totonu o le aai o loo latou nonofo ai. O lona poto ma le atamai na maua mai i le olaga aoaoina, atoa ai ma lu’itau na tuutaia ai lona olaga pologa, o ni isi ia o auala sa fesoasoani malosi ia Ianeta i le taumafai e tu’u fa’atasi lana ulua’i tusi. O le aso o lona fa’auuga i le fa’aiuga o le ulua’i 2 tausaga o lona olaga aoaoina, sa ia manatu ai loa e tatala ai le vaega muamua o lana Tusi lea ua mae’a ona tusi, atoa ai ma le fa’alauiloaina o lana meaalofa faapitoa mo le ali’i foma’i o Lavi.

 

Na fa’ateia le ali’i foma’i ao pisi i ana galuega masani i lona ofisa ina ua tu’itu’i atu le faitoto’a, ae ina ua tatala atu, o le tamaitai o Ianeta. O se feiloaiga i loimata na molimauina i lea taeao, ona ua lata i le 2 tausaga e lei toe fa’alogo atu lava le alii fomai i se tala e fa’atatau ia Ianeta. “O le a se tala mai i lou gasegase, o toe fa’alogoina tulaga faaletonu na aafia ai lou tino i le 2 tausaga talu ai,” o le fesili fia iloa lea a le ali’i fomai o Lavi, ae ua fa’amimini le tama’ita’i ma ata, ona fa’apea lea o lana fa’amatalaga, “O le agalelei o le Atua atoa ai ma lou loto fesoasoani, ua mafua ai ona ou toe maua le malosi”. O le fa’aiuga o le la talanoaga i lea aso, na tu’u aloaia atu ai loa e Ianeta i le ali’i foma’i lona tusi valaaulia i lona fa’auuga e faia i le aso mulimuli lava o le masina lea. “Fa’auuga,” o le fesili lea a Lavi ma lona fiafia tele. “O a mai nai ou matua,” o le isi lea fesili a le ali’i foma’i na ia vaaia ai loa le maligi o loimata o le tama’ita’i o Ianeta. “O i ai se mea o tupu i ou matua,” o le toe fesili atu lea a le ali’i foma’i, ae na lulu le ulu o Ianeta ma fa’apea ane, “E leai, ae ua maligi o’u loimata ina ua e fesili mai i o’u matua, ae o tagata moni ia ua mafua ai ona ou oo mai i lenei tulaga ua ou i ai, ua ou ola saoloto ai ma ola fiafia, i’u ma le manuia la’u aoga ona o le la tausiga alofa ia te a’u le tagata ese”. Na vaaia e Lavi lagona mafatia o Ianeta atoa ai ma lona alofa moni ia Meki ma Lucy. “Vaai oe Ianeta, ua silafia e le Atua le moni o lou alofa i ou matua, e le toe aveesea e se isi lena manatu mai ia te oe, pau le tatalo, ia faamalosi mo isi tausaga o loo totoe o le olaga aoaoina, ina ia maua ai se lumana’i manuia mo oe ma nai ou matua”.

 

O le vaiaso na sosoo ma le vaiaso o le fa’auuga, o se vaiaso pisi lea i tama ma teine aoga, e le gata ua fai a latou fiafia ma pati, ae ua faia fo’i mafutaga ma togalauapi i nofoaga eseese i totonu o le aai, o se tasi lea o tu ma aganu’u ua masani ai tupulaga pe a oo i taimi fa’ai’u o le olaga aoaoina, aua e uma loa le fa’auuga, ona le toe maua loa lea o se isi mafutaga ma uo, ae alu lava le tagata e atina’e lona olaga ma lona aiga. E le faapena le tama’ita’i o Ianeta ina ua oo i le vaiaso faaiu e sosoo ma le vaiaso o le faauuga, e lei alu lava i se mea, ae sa na o le nofo i le fale ma fesoasoani ia Lucy i feau o le aiga, o isi fo’i aso e tau mulimuli ai i le ofisa a lona tama i lana galuega, ma ua avea o se vaiaso sa sili ona fiafia ai le loto o le tama’ita’i. O le taeao tonu o le faauuga, na matua ese ai le vaai a matua, uo ma aiga atoa ai ma le au valaaulia, ina ua latou vaaia i luma o le Fale lea ua faatulaga e faia ai le fauauga, se ie tele lava o loo faapipii ai ata uma o tamaiti fa’au’u, ae o le isi itu, o lo o faapipii mai ai le isi ie o loo tusia ai le autu, “O oe o le Tamafai ae le o se Sulimoni” faatasi ai ma le ata o le teineititi o Ianeta o lo o fa’apipi’i ai i tafatafa o le autu.