Ads by Google Ads by Google

E LE O OE O SE SULI MONI

Vaega 67

 

Na pei o le emo o le mata gaioiga a le tamaloa o Meki ma lana auauna i le taimi lea ina ua la vaaia ta’avale a fitafita mai le malo o le tupu saua o Eteuati II ua aga’i sa’o atu lava ma paka i luma o le faitoto’a e ulufale atu ai i le auala o le falema’i tele a le malo, ae manatua le taimi lea, o le ta’avale a fitafita lea na o atu ai Meki ma lana auauna fa’apea ai ma le ali’i fitafita o le malo o Eteuati sa ia fa’afoeina atu le ta’avale, ua mae’a ona saisai e Meki ma lana auauna ona vae ma ona lima, ona nonoa lea ma fa’agatasi ma le faitoto’a pito i tua o le ofisa o le foma’i, e faigata ona iloa mamao atu. Ua seki le osofaiga a Meki ma lana auauna mai le isi itu o le auala e fa’afesaga’i ma le faitoto’a o le falema’i. E lei umi ae vaaia e le au alii ia le ta’ita’i atu i fafo e fitafita o teine foma’i ma isi ali’i foma’i, ona fa’atootutuli lea i le ogatotonu o le auala ae fa’alele i ai fana. “Ua tatau loa ona ta osofaia fitafita a le tupu saua”, o le musumusu atu lea a le auauna ia Meki, ae na fautua atu i ai Meki e fa’atali laititi ae sei tau vaavaai le tulaga tonu e tatau ona fai, ina nei vave ona la fa’avevesia le nofoaga ae avea ai ma itu e tula’i mai ai se tulaga fa’aletonu ma maliliu ai ni isi i le falema’i, aemaise ai si ona afafine lea o loo tau fa’aolaola i totonu o le falema’i. E fai gaioiga a Meki ma lana auaunoa i le isi itu ae o le ali’i pologa meauli lea sa laua sosola ese mai o loo fa’apuna mai fo’i i le isi itu o le auala, o loo lafi ai fo’i ma ana fulu a u ua uma fo’i ona sauni mo le osofaiga.

 

E fai lava tala a le tamaloa o Meki ma aapa atu lona lima ua toso mai i fafo ana fulu a u e lua o loo i totonu o lana ato o loo fa’afafa, ona ia toso mai lea i fafo ma fa’amaulu loa i lana aufana, ona amata loa lea ona seki lana tupu e foliga mai o le a alu se osofaiga, ae fa’afuase’i loa ona ia vaaia le toso fa’atata mai e se tasi o fitafita i fafo o le falema’i o lona to’alua, atoa ai ma le ali’i foma’i lea o loo vaaia lona afafine o Ianeta. Na ona toso fa’atata mai lava i fafo o Lucy ma le isi fafine foma’i ona fa’atootutuli loa lea o i laua i luma o le faitoto’a o le falema’i, ae fa’alala i ai fana i o laua ulu fa’atasi ai ma le fa’aupuga a le fitafita lea ua alaga leotele, “Ta’u mai poo fea ua sosola i ai tagata na o mai i le ta’avale fitafita lea o loo tu mai i luma o le falema’i”, o le fesili leotele lea a le fitafita ma lana fana o lo o u’u, ae sa na o le punonou i lalo o le fafine faiaoga o Lucy ma le foma’i ma taumafai e ufiufi o la ulu i le fefefe tele, ae ua atili ai lava ona tago atu le ali’i fitafita ua fa’atu i luga le fafine faiaoga o Lucy ma taumafai e kisi atu i ai ma tu’i fesili pe sa ia vaai i tagata na sosola mai i le ta’avale a fitafita, ae na tali atu i ai le fafine o Lucy ma le fefe tele, “Lau susuga a le fitafita, sa ou iloaina i laua o loo taufetuli atu i le itu le la, ae ou te le i iloaina po o ai i laua”, e fai lava le tala a Lucy ma tusi lona lima i le vaega tonu o le auala lea sa ia vaaia ai Meki ma le tagata meauli o tau fetuli aga’i atu i ai, ma e le i toe fa’atali isi fitafita e to’alua ae ua la tuua loa tagata faigaluega o le falema’i i le vaega o lo o tootutuli ai ma sisi’i lima ae ua la fa’anatinati atu loa i le pito o le falema’i lea ua aumai le avea’i o loo aga’i atu i ai le sola’aga. A o aga’i atu isi fitafita e to’alua ma le fa’amoemoe e saili mai le tamaloa o Meki ma lana tama meauli poo fea o loo lalafi ai, ae fa’afuase’i loa ona tu i luga le ali’i meauli o loo lafi mai i le isi itu o le auala ma tafana mai i laua i ana fulu a u ma pauu ai i lalo, ma vaaia ai loa le tau fai tuli oso atu o isi fitafita ma amata loa a latou osofaiga e fa’aaoga i ai a latou a’upega, peita’i e le i tuu mamaina e Meki ma lana auauna lea o loo lalafi mai i le isi itu gaioiga a fitafita, ae ua la tali mai ai fo’i e ala i le fa’aaogaina o a la fulu a u e tafana mai ai ali’i fitafita nei.