Ads by Google Ads by Google

E LE O OE O SE SULI MONI

Vaega 64

 

Na ona uma atu lava o le tala lea a le tamaloa o Meki, ona ia sogi atu loa lea i le alafau o le teineititi meauli pologa ma ia tuua ai loa totonu o le potu ae savali aga’i atu i fafo i le vaega o loo vevesi mai ai fetauiga i le va o fitafita o loo totoe a le tupu saua o Eteuati ma ana tama e to’alua ia o loo lalafi mai i le iti itu o le lotoa. E taunu’u loa Meki i le faitoto’a pito i tua o le falema’i ae ona vaaia loa le savali mai o lana tama pologa meauli ma le isi ana auauna mai le vaega o le lotoa na lalafi ai, e tofu mai lava le tagata ma le aufana i le isi lima ae o fulu a u i le isi lima. Na faliu le tamaloa o Meki i le isi itu o le lotoa ma ia vaaia ai ta’atitia mai o fitafita a le tupu saua o Eteuati, ma ua foliga mai ua manumalo le latou itu. “E le tatau ona tatou nofoa’i i le taimi lenei, ae ua tatau loa ona tatou aga’i ese ma le nofoaga lenei manu e le’i taunu’u mai isi fitafita a le tupu ona faigata atili ai loa lea o le mataupu”, o le talanoa atu lea a le ali’i pologa meauli ia Meki, ma sa talia fo’i e le tamaloa o Meki le fautuaga, ma ia fa’atonuina ai loa lana auauna e to’atasi o loo totoe ina ia fa’anatinati atu loa i totonu o le falema’i ma tapena ese mai Lucy ma Ianeta, ao lea o le a la fa’ata’alise atu e tapena mai le ta’avale na malaga atu ai fitafita latou te sosola ese ai.

 

“Lucy ma Ianeta, ua mana’omia e Meki i tatou ina ia tatou sosola ese loa mai le nofoaga lenei i se taimi vave lava, manu e le i taunu’u mai se isi vaega tele o fitafita a le malo o le tupu saua o Eteuati, ina ne’i fasiotia i tatou i lenei nofoaga”, o le tatope atu lea o tala a le auauna ma aapa atu ona lima e tau tapena ese mai ato a Ianeta o lo o i totonu o le potu sa taofia ai, ae na fa’afuae’i ona vaaia e le fafine faiaoga o Lucy ma le auauna le tagi o le teineititi meauli o Ianeta ma fesili atu ia Lucy, “Tina, o le a se tala mai i la’u foma’i, ua toe malosi o ia pe leai”. Na vaaia e Ianeta le tu o le fafine faiaoga o Lucy mo ni nai sekone e le gagana, ona oso ai loa lea o lona manatu e i ai le fa’aletonu ua tupu i lana foma’i. “Lucy si o’u Tina, e le mafai ona ou alu ese ma le falema’i lenei se’i vagana ua ou iloa ua toe malosi la’u foma’i, ana leai o ia ou te le aulia mai lenei taimi, ou te le toe maua fo’i le ola”. E fai lava tala a Ianeta ma oso i lalo ma le moega sa taofo ai, ona savali loa lea i le potu o lo o taofia ai lana foma’i, peita’i e taunu’u atu ae fa’ailoa ane i ai e se tasi o tama’ita’i tausima’i, o lana foma’i lea ua fa’anatinati atu i le falema’i tele a le malo i le taulaga, ona o le tulaga tuga o le manu’a sa a’afia ai o ia i se pulufana. E le i toe fa’atali Ianeta i le taimi lea, ae ua ia toe fa’anatinati atu loa i le potu o lo o i ai Lucy ma le auauna ma ia fa’ailoa i ai, “O le a tatou malaga ese ma le nofoaga lenei i le taimi nei lava, ou te fia i ai i le falema’i lea ua avatu i ai la’u foma’i fa’amolemole”, e fai lava tala a Ianeta ma tago atu ua toso mai lana atopa’u ma savali telea’i atu loa i fafo i le vaega o lo o i ai Meki ma le ali’i meauli pologa, ae mulimuli atu ai i tua le auauna ma le fafine faiaoga o Lucy.

 

“Fa’amolemole Meki si o’u Tama, ou te fia i ai i le falema’i tele o lo o i le taulaga lea ua fa’anatinati atu i ai la’u foma’i, ou te fia iloaina le tulaga o lona ma’i ae ou te lei alu ese”, e fai lava tala ia a le teineititi meauli o Ianeta ma savali atu ua oso i totonu o le ta’avale a fitafita lea ua tapena e alu ai le latou sola’aga, ma tau fai tulioso uma atu ai ma le latou au malaga ma alu ese loa le ta’avale. E alu fua le ta’avale ae o le mafaufau o le tamaloa o Meki e le o mapu i le taimi lea, ona o le popole ina ne’i fa’afetaui mai le latou sola’aga e ni ta’avale a fitafita a le malo i la alatele, po o ni isi fo’i o tagata faomea o lo o saili solo ni tagata malaga latou te osofa’i ma fasioti. E malu ifo loa le afiafi ua amata ona tagi alisi ae taunu’u loa ma le ta’avale a Meki ma lana au malaga i le ogatotonu o le taulaga o le malo, i le vaega tonu o loo i ai le falema’i lea ua auina atu ia i le foma’i sa ia tausia ma togafiti le teineititi o Ianeta.