Ads by Google Ads by Google

ATUNU’U: Fa’afetai i fitafita tuai mo le latou tautua toto


Le afioga i le Maoputasi ia Mauga Tasi Asuega ma lona faletua, fa’apea ai le faipule i le konekeresi ia Aumua Amata, ma le Senatoa mai Manu’a ia Nuanuaolefeagaiga S. Nua i le taimi o le tula’i fa’aaloalo i le sauniga e fa’ataua ai le aso mo Fitafita tuai i le taeao nei. [ata AF]

Ni isi o sui o Fitafita tuai sa auai i le fa’amanatuina o le aso o Fitafita tuai i le taeao nei, i le latou nofoaga autu i Tafuna. [ata AF]

Fanau aoga mai le Kolisi Tuufaatasi i le taimi na sauni ai mo le sisiina o tagavai i le fa’amanatuina o le aso o Fitafita tuai i le taeao nei. [ata AF]
ausage@samoanews.com

Na fa’aalia e le to’atele o le atunu’u na maua le avanoa e mafuta atu ai i le sauniga a le malo lea na faia i le taeao o le Faraile nei, e fa’amanatu ma fa’ataua ai le sao o Fitafita tuai i le puipuiina o le filemu o le atunu’u ma le lalolagi lo latou agaga fa’afetai ma le fiafia, ina ua maua le avanoa latou te molimauina ai lenei aso e fa’apitoa mo Fitafita tuai o le taua, i latou ua a’e malo la latou tautua e ala i le ofoina atu o latou ola e tautua ai vaega ‘au a le malo tele o Amerika.

 

E ese mai i ta’ita’i o le atunu’u ma le malo sa auai i le molimauina o lenei sauniga taua, sa fa’apea fo’i ona auai atu i ai ni isi o le atunu’u lautele i matua ma fanau, mo le fia ofoina atu o le latou lagolago e fa’afetaia ai Fitafita tuai o le taua.

 

Na taua e le Tina matua ia Eterei Lalau, 60 tausaga o Tafuna lona fiafia ina ua mafai ona ia aulia mai le fa’amanatuina o le aso fa’apitoa lenei mo Fitafita tuai i lenei tausaga, ma avea o se aso e momoli atu ai ona alofaaga i si ana tama o lo o tautua i vaega ‘au a le malo tele. SSG US Army Andy Lalau.

 

“E ui o le aso lenei e fa’ataua ai le tautua a Fitafita tuai uma o le taua i Amerika Samoa fa’apea ai vaega eseese o le Iunaite Setete o Amerika, ae ua ou manatu fo’i e avea lenei aso e momoli ai le agaga fa’afetai i le Atua, ina ua mafai ona aulia mai e si a’u tama o lo o tautua i vaega ‘au a le malo tele lenei tausaga o lana tautua”, o le saunoaga lea a Lalau.

 

“E le fesiligia le faigata o le tautua sa ofoina atu e Fitafita tuai i taimi ao latou tautua i vaega ‘au a le malo tele, o le latou tautua lea ua mafai ai ona tatou maua lenei saolotoga, o le latou tautua ua mafua ai ona tatou maua le saolotoga e tapua’i fiafia ai, le saolotoga e mafuta fiafia ai ma aiga, uo ma e masani, le saolotoga ua mafai ai ona tatou molimauina le tele o fa’amanuiaga ua maua mai e Amerika Samoa mai le malo tele o Amerika, e fesoasoani ai i le atina’eina o si o tatou atunu’u”, o le saunoaga lea a le Tina matua ia Lalau.

 

Na taua atili e Lalau i le Samoa News ma ona loimata lona manatuaina pea o le aso 11 Novema 2015, lea sa ia fa’amanatuina ai le aso mo Fitafita tuai i totonu o se falema’i i Niu Sila, ina ua fa’ataotolia ai o ia i ma’i o le tino, peita’i ua ia fiafia ina ua mafai ona ia aulia mai lenei tausaga i le malosi mai le Atua.

 

O le lagona fo’i lea na fa’aalia e le faletua ia Margaret Hollister, 63 tausaga le matua o Iliili, i lona faafetaia lea o le tautua sa mafai ona ofo atu e Fitafita tuai i Amerika Samoa ma Amerika, lea ua mafai ai ona maua e tagata uma le saolotoga e ola fiafia ai.

 

I le toe tepa ai i le tele o tausaga ua mavae a o fa’amanatu mai pea e le malo o Amerika Samoa le aso mo Fitafita tuai, na taua ai e le faletua ia Hollister e faapea, tusa lava pe fa’amanatu i tausaga uma le aso fa’apitoa mo Fitafita tuai, e pei lava o se aso fa’atoa fa’amanatu i lona lagona, ona o le taua o le tautua a i latou i loto ma agaga o tagata uma o Amerika Samoa.

 

“E le i tautua lo’u to’alua i vaega ‘au a le malo tele, se’i vagana ai la’u fanau e to’alua o lo o tautua nei i vaega ‘au a le malo tele i le taimi nei, ma o se tulaga lea ou te fa’afetaia ai le agalelei o le Atua, ona o le tautua toto o lo o ofo atu e tama fanau a Samoa ua mafai ai ona maua e le atunu’u le sa’olotoga”, o le saunoaga lea a Hollister i le Samoa News.

 

Ina ua fesiligia po o le a se vaega taua e faigata ai ia te ia ona fa’agalo le tautua a Fitafita tuai, na maligi loifofoga o le Tina ia Hollister ma saunoa e fa’apea, “E le gata i latou ua maliliu ona o le ofoina atu o lo latou soifua e tautua ai vaega ‘au a le malo tele, ana leai lo latou lotonu’u ma le naunau e puipui le sa’olotoga ma le saogalemu o le lalolagi ma Amerika Samoa, e le motusia a latou mafutaga ma nai o latou aiga, amuia i tatou o lo o mafuta fiafia pea ma o tatou aiga, matua ma fanau, ae talofa i ni isi o Fitafita tuai ua motusia le mafutaga ma aiga, ona o le ofoina atu o latou soifua e tautua ai le atunu’u, o se tautua e le mafai ona fa’agaloina i loto ma agaga o tagatanu’u uma o Amerika Samoa”.

 

Na o o lava fo’i i fanau aoga na maua le avanoa e mafuta atu ai i le sauniga a le malo e fa’ataua ai le tautua a Fitafita tuai, sa maua fo’i le avanoa e fa’aleo ai o latou lagona e fa’atatau i lenei aso taua.

 

Na taua e le susuga a Neil Teofilo, 20 tausaga le matua mai Masepa ae o lo o aoga nei i le Kolisi Tu’ufa’atasi le taua i lona loto o le tautua a Fitafita tuai ua mafai ona faia mo tagata uma o Amerika Samoa ma le lalolagi.

 

“Ou te lagonaina le taua o le tautua a Fitafita tuai aemaise ai o le misia o le mafutagama aiga, ona o lo’u tuaa o se tasi sa tautua i vaega ‘au a le malo tele, ma o aso uma e motusia ai le mafutaga ona o tiute i totonu o vaega ‘au, e vaaia ai le motusia e le Tina ma le fanau o le mafutaga, peita’i o le viiga i le Atua ina ua mafai ona tatou fa’amanatuina i lenei tausaga le aso e fa’apitoa mo Fitafita tuai”, o le saunoaga lea a Teofilo, lea sa ia taua i le Samoa News lona fa’anaunauga o lo o i ai, i le fia avea lea o ia ma Faipule i le Fono Faitulafono a Amerika Samoa i le lumana’i.

 

“E taua le tautua a Fitafita tuai, ae mo a’u lava ia, ou te tatalo i le Atua ina ia foa’i lo’u ola ina ia mafai ona ou maua le avanoa ou te tautua ai i le Fono Faitulafono i le lumana’i”, o le saunoaga lea a Teofilo.

 

Na taua e le susuga ia Sapati Lauti, o se tasi o totino o Fitafita tuai na tautua i vaega ‘au a le malo tele lona fiafia ina ua mafai ona fa’amanatuina lenei aso e fa’apitoa i Fitafita tuai sa tautua i vaega ‘au a le malo tele.

 

“O le taua o lenei aso, o le toe tepa lea o Samoa ma le lalolagi i le tautua sa ofoina atu e Fitafita tuai e ala i le tautau i totonu o vaega ‘au a le malo tele, e ui ua le mafai e ni isi o Fitafita tuai ona aulia mai lenei aso taua, ona ua fai i lagi le folauga, ae o le agaga fa’afetai i le Atua, ua aoga ola o Fitafita tuai e tautua ai mo le atunu’u, tatalo ia maua pea e Amerika Samoa le filemu ma le ola saoloto o ona tagata i tausaga o lo o lumana’i”, o le saunoaga lea a le susuga a Lauti, 65 tausaga le matua o Tafuna.