O le fa'aiuga lea na tu'uina mai e le fa'amasinoga maualuga i le vaiaso na te'a nei, ua le fa'amaonia e ali'i fa'amasino tu'uaiga a le malo sa faia fa'asaga ia Michael Tolmie, ina ua mae'a ona iloilo lelei e alii fa'amasino mau faamaonia o lenei mataupu sa tu'uina atu i le taimi na iloilo ai ia Oketopa na tea nei, ma fa'ai'uina ai le le nofosala o Tolmie i le moliaga mamafa o lona ave fa'agaoi lea o mea a le kamupani o le New Dimensions Corporation [NDC] sa tu'uia atu na te vaaia ma tausia lelei.

O tu'uaiga a le malo fa'asaga ia aTolmie, na afua mai i le taimi a'o avea o ia ma pule o le lala a le kamupani i Amerika Samoa nei, talu mai le tausaga e 2009 e oo atu i le 2010, e pei ona taua i le faaiuga a le fa'amasinoga sa tuuina mai i le aso Tofi na te'a nei, Novema 13, 2014.

O afioga i ali'i faamasino e to'atolu na gafa ma le iloiloina o mau faamaonia o lenei mataupu e aofia ai le afioga i le fa'amasino sili ia Michael Kruse, faapea ai afioga i fa'amasino lagolago ia Logoai Siaki ma Fa'amausili Pomele.

O mau faamaonia sa tuuina atu e le malo e lagolago ai la latou tagi fa'asaga ia Tolmie, sa latou taua ai le fa'aaoga le tatau e le ua molia o tupe a le NDC e totogi ai tagata faigaluega sa ia faa faigaluegaina e aofia ai ma le ua avea nei ma ona faletua o Marilyn Tolmie, toe faatau ai ma le Lincoln Navigator mai le kamupani ta'avale a le Haleck Motors.

O isi vaega na taua e le malo na fa'aalu e Tolmie e totogi i tupe a le NDC e aofia ai le siaki sa tuuina atu i le ekalesia Metotisi a Amerika Samoa, atoa ai ma isi siaki sa saini mai ai tinoitupe mai le teugatupe a le NDC i le faletupe o Hawaii.

Na taua e afioga i ali'i fa'amasino i le latou fa'aiuga e fa'apea, i mau faamaonia uma sa tu'uina atu e le malo, ua atagia mai ai le le mafai lea e le malo ona latou fa'amaonia tuuaiga uma fa'asaga i le ua molia, atoa ai ma le leai o ni mau latou te lagolagoina ai le tuuaiga, o gaioiga sa faia e Tolmie e fa'aaoga le tatau ai tupe a le NDC, sa ia faia ma lona iloa atoatoa.

I mau na tuuina mai e le fa'amasinoga e lagolagoina ai la latou faaiuga, ua latou taua ai e faapea, o mau o lenei mataupu o lo o atagia mai ai se faiga paaga faapisinisi sa faia i le va o Tolmie ma isi, lea na alu alu tula'i mai ai se tulaga fa'aletonu pe ua le mafai fo'i ona toe fa'aauau.

O lea mafutaga fai faapaaga e pei ona taua e alii faamasino i le latou faaiuga e tusa ma le 9 itulau le umi, sa faia i se gaioiga ina ia mafai ai ona maua se avanoa e maua mai ai tulaga o tupe fesoasoani mai le malo feterale, lea na mafai ona sasa'a mai mo Amerika Samoa ina ua tuana'i le galulolo na a'afia ai le teritori i le masina o Setema 2009.

Na taua e le faamasinoga e faapea, ao finau mai ai le malo o Tolmie o se tasi o tagata faigaluega a le NDC, ua maua e le faamasinoga i ana suesuega faavae mai i mau ua latou tauaaoina, o le ua molia, o se tasi lea o totino o le kamupani na galulue i tulaga o konekarate i lalo o tupe na auala mai i tupe feterale.

Na taua e le faamasinoga e faapea, sa tuuina atu e Tolmie lona tomai ma le agavaa e fesoasoani ai i tulaga o galuega a le kamupani, ae o Billy Vaouli, lea sa avea ma peresetene o le NDC sa galue mo le tu'uina atu o tupe mo le kamupani.

O le mafutaga foi i le va o le ua molia ma le NDC, e leai ni faamaumauga tusitusia e faamaonia mai ai sa iai mo'i se feagaiga sa sainia.

Na talitonu alii faamasino i mau sa tuuina atu i le taimi o le iloiloga, o Tolmie, o le isi lea sui tofia o le NDC, o oloa uma foi sa faatau ma tuuina atu ia te ia, sa faia i lalo o le talitonuga o ia sa avea ma pule i le faatautaiga o galuega fa'atino.

I le tulaga o le faa faigaluegaina lea e le ua molia o ni tagata faigaluega i lalo o tupe a le NDC, na atagia mai ai i mau a le faamasinoga le tuuina atu e le NDC o le malosi ia Tolmie na te faaaogaina ai tupe e faatino ai galuega, atoa ai ma lona talaina mai o tupe mai teugatupe a le kamupani i le faletupe o Hawaii.

Na finau le malo e faapea, o le malosi na faaaoga e le ua molia na te faafaigaluegaina ai ni tagata ae totogi i tupe a le kamupani, o se tulaga lea ua le tausisia ai faiga faavae o le talanoaga sa faia.

O le molimau foi sa tuuina atu i luma o le fa'amasinoga e fa'atatau lea i le fa'aaoga sese e Tolmie o tupe e totogi ai tupe a le kamupani i fafo, o se taumafaiga sa faia ina ia faatula'i ai se molimau le lelei fa'asaga i le alii ua molia nei.

Na taua fo'i e ali'i fa'amasino le le mafai lea e le itu a le malo ona fa'amaonia i le fa'amasinoga, sa iloa e Tolmie e le mafai ona ia faaaogaina tupe pe faa faigaluega ni tagata ae totogi i tupe a le kamupani.

O mau uma la sa tuuina atu i luma o le fa'amasinoga, na talitonu ai ali'i fa'amasino ma latou fa'ai'uina e fa'apea, e le talitonu i latou i le manatu lea, e le mafai e Tolmie ona faa faigaluega ni tagata faigaluega fou ae totogi i tupe a le kamupani.

O siaki ia na finau mai le NDC sa saini e le ua molia ae tuuina atu i le fale taavale a le Haleck Motors, e le talitonu le fa'amasinoga sa ia faia lea tulaga ae le o mafai ona ia fa'atinoina.

I le faaiuga la o le faaiuga a alii faamasino e faatatau i lenei mataupu, ua latou taua ai lo latou le lagolagoina o mau uma sa tuuina atu e le itu tete'e, e lagolago ai le tagi faasaga ia Tolmie.