Ads by Google Ads by Google

Tu’uaia Jonathan Fanene i lona fa’ao’olima i lona to’alua


Le afioga ia Aiolupotea Jonathan Fanene [ata AF]
ausage@samoanews.com

O le vaiaso na te’a nei na faila ai e le malo o Amerika Samoa i luma o le Fa’amasinoga Faaitumalo, moliaga fa’asaga i le Fa’atonusili o le Matagaluega o Autalavou, Tina & Tama’ita’i, le afioga a Aiolupotea Jonathan Fanene, e mafua mai i le fa’alavelave lea o lo o tu’uaia ai o ia i lona fa’ao’olima i lona to’alua ma lona tuafafine, ina ua salalau tala e fa’atatau i le la mafutaga fa’apouliuli ma se isi fafine ao i ai i lana malaga i Hawaii i le masina na te’a nei.

 

E 13 moliaga o lo o tu’uaia ai e le malo ia Fanene, o ia moliaga e aofia ai moliaga mamafa e 8 faapea ai ma moliaga mama e 5.

 

O moliaga mamafa e 8 e aofia ai moliaga e 2 o le taofia faamalosi lea o se tagata i se auala fa’amalosi; 2 moliaga o le faaoolima i le tulaga lua, faapea ai ma moliaga e 2 o le ave faamalosi o se tagata i se nofoaga e le mana’o i ai.

 

O moliaga mama e 5 fa’asaga ia Fanene e aofia ai, tasi le moliaga o le umia o se fana e lei lesitalaina;  ma le 2 moliaga o le umia faasolitulafono o se fana e le fa’atagaina i le atunu’u.

 

O le ali’i loia tua ia Marcellus Talaimalo Uiagalelei o lo o tula’i mo Fanene, ae o le tama’ita’i loia sili lagolago ia Christy Dunn o lo o tula’i mo le malo.

 

Ina ua tula’i Fanene i luma o le Fa’amasinoga Fa’aitumalo mo le taimi muamua, na teena ai e le afioga i le ali’i Fa’amasino ia Elvis P. Patea lana talosaga, tauala atu i lana loia fautua ina ia fa’aitiitia le tupe e tatala ai o ia i tuai le $100,000.

 

Na finau Uiagalelei i le fa’amasinoga e fa’apea, o ni isi o itu lelei e tatau ona taga’i i ai le Fa’amasinoga mo sana faaiuga e faaitiitia le tupe e tatala ai i tua Fanene, e le gata o ia o se tagatanu’u o Amerika Samoa mo le tele o tausaga, ae o ia fo’i o se tasi sa tautua malosi mo le manuia o le atunu’u.

 

Na tete’e le loia a le malo i le talosaga. Na taua e Dunn e fa’apea, e le gata i matuia tu’uaiga fa’asaga i le sui o le Kapeneta a le Kovana, ae sa molimauina fo’i e se tasi o lana fanau gaioiga uma sa tutupu.

 

O ni isi o tuutuuga ua tatala ai i tua Fanene, e auai i soo se taimi e valaau ai lana mataupu, ma ia aua ne’i ona toe taumafai i se isi lava auala e fa’afesoota’i i laua na a’afia i lenei mataupu. Ua faatonuina fo’i o ia ina ia tuuina atu lona tusi folau i le malo e taofi ai, a o fa’agasolo ai taualumaga o lenei mataupu.

 

O le vaiaso nei lea ua fa’atulaga e faia ai le ulua’i iloiloga o lenei mataupu.

 

O le mae’a ai ona faila e le malo o le latou tagi fa’asaga ia Fanene, na faia ai loa ma le fa’aiuga a le afioga i le Kovana Sili le tumau ia Lemanu Palepoi Sialega Mauga e fa’amalolo Fanene mai le toe avea ma Fa’atonusili o le Matagaluega o Tupulaga Talavou.

 

Saunoa atili Lemanu e fa’apea, o lana faaiuga e faate’a Fanene, na faia lea ina ua mae’a ona ia iloiloina ripoti a Leoleo e tusa ai o le latou suesuega, atoa ai ma ata o manu’a i le tino o le to’alua a Fanene.

 

O le tausaga e 2014 na fa’amaonia ai le avea o Fanene ma Fa’atonusili o le Matagaluega o Tupulaga Talavou.

 

TAGI A LE MALO

 

O lenei mataupu na tofu atu i le Ofisa o Leoleo i Tafuna, ina ua faila e le to’alua a Fanene sana tagi fa’asaga ia te ia i le aso 29 o Me, 2019, ona o sauaga matuia sa ia faia ia te ia i le aso 26 o Me.

 

Na taua e le fafine i Leoleo e fa’apea, sa fa’amatala atu e le tuafafine a Fanene lona vaaia o Fanene ma se tasi fafine i Hawaii. Sa taua fo’i le vaaia o ni tulaga le manuia i le ua o Fanene.

 

Na oso le to’alua a Fanene i lana ta’avale ma alu loa e ti’eti’e ina ua uma ona fa’amatalaga atu e le tuafafine a Fanene lea tala fa’anoanoa ia te ia. A o ti’eti’e solo i lana ta’avale, sa fesoota’i atu Fanene ia te ia ma fai atu ia te ia, e aua ne’i sau i le fale. E ui i lea fa’atonuga, ae na toe fo’i mai lava le fafine i le fale ma ia fesiligia loa Fanene e tusa ai o le tala e fa’atatau ia te ia ma le isi fafine i Hawaii.

 

Na tula’i atu ai loa Fanene o le a fa’aoolima i lona tuafafine. O le taimi lea na taua ai e le fafine lona tamo’e i le faitoto’a o le fale, peita’i na togi e Fanene o ia i le nofoa, sosoo ai ma le tago atu o Fanene ua toso atu o ia i totonu o le fale. Na fa’atonu e Fanene lona atali’i e 9 tausaga e alu e aumai le pate, peita’i na fo’i mai le tamaititi ma le paipa ma se laau.

 

E pei ona taua e le malo, na fa’aaoga e Fanene le paipa ma le laau e faaoolima ai i lona to’alua ma lona tuafafine. Na taua fo’i e le malo i le latou tagi le matuia o manu’a na a’afia ai le tino o le to’alua a le ua molia ma lona tuafafine, e mafua mai i lana gaioiga sa faia.

 

Na taua e le fafine i Leoleo le i ai o le taimi na ia aveese ai le paipa ma le laau mai ia Fanene, peita’i na tago Fanene ma fa’aaoga le uaea ma taumafai e saisai fa’atasi ai laua ma lona tuafafine.

 

Na taua e le fafine lona fefe i le taimi na faaoolima ai lona to’alua ia te ia, ma ua oo mai le lagona ia te ia, e i’u ina fasioti o ia e Fanene.

 

Sa faailoa atu fo’i e Fanene ia te ia, o ia e fiafia e fasi tagata, e mafai fo’i ona ia fasia laua ma lona tuafafine i le aso atoa lava e leai ma se malolo.

 

I le faaiuga o le gaioiga a le ua molia, sa ia fa’atonuina ai loa lona to’alua e tapena ana mea ma alu ese loa ma le fale. Ua ia mana’o la te tete’e, faitalia o ia ma tausi le la fanau, ae tapena lana ato, oso i le va’alele ma alu ese loa.

 

Ina ua mae’a, na fa’atonu e Fanene lona to’alua e alu i totonu o le potu e aumai lana fana. Na alu le fafine ma aumai le fana a Fanene, le ituaiga o le .357 ma tu’u atu i ai, ona oso lea o Fanene i lana ta’avale ma alu ese loa ma le fale.

 

E ese mai i lenei fa’alavelave, na fa’amatala fo’i e le fafine isi fa’alavelave na tutupu muamua i le la aiga talu ona la nonofo mai.

 

I le tausaga e 2009 ao nonofo i le setete Kentucky ao mamafa i le la tama lea ua atoa le 9-tausaga, na fasi ai fo’i o ia e Fanene ina ua ia maua o loo la talanoa ma le isi fafine i luga o le telefoni. Sa ia matua fasi fa’amo’amo’a ai lava o ia ma i’u ina manu’a tigaina ai.

 

Talu mai tausaga e tele o le la ulugali’i, e tele tala sa ia fa’alogo ai e fa’atatau ia Fanene ma isi fafine. Sa i ai fo’i se tasi o ali’i la te faigaluega fa’atasi, na talanoa atu ia te ia e fa’atatau i le faanunumi a Fanene ma lona to’alua.

 

I le tausaga e 2017, na tula’i mai ai fo’i se isi fa’alavelave i le latou fale i Malaeimi, ma i’u ina fa’alala ai e Fanene le fana i lona muaulu, e mafua mai ina ua ia maua se imeli a Fanene na ave i le isi fafine.

 

Na fesiligia e Leoleo le atali’i e 9 tausaga a Fanene e uiga i lenei mataupu, a o i ai ma lona Tina. I lea fa’atalatalanoaga, na fa’amatala uma ai e le tamaitiiti i Leoleo mea uma sa fa’amatala e lona Tina. Sa ia taua i Leoleo lona molimauina o gaioiga uma a lona Tama sa faia i lona Tina ma lona aunty, e aofia ai le fa’aoolima ia te i laua.