Ads by Google Ads by Google

Tufatufaina mea’ai fanau a’oga & aiaiga e faia ai mo matua


Nai taulele’a tino malolosi na sa fa’asoasoa maia le tausami a le fanau a’oga i matua i le Laumua o le Manulele Tausala i Nuuuli. [ata: Leua Aiono Frost]

# Tufa Lunch

Ua oo i le aso lona lua talu ona tufatufaina mai mea’ai mo le fanau a’oga. Ua le manatu le matagaluega ma le Malo ina ia taofia lea tautua, ae ua manatu ina ia fa’aauauina. Ua talafeagai fo’i lea tulaga ma le polokalama aua ua mae’a ona toina mai vaega tupe mo le fa’atupeina o lea tautua mo le fanau a’oga mai le amataga se’ia oo i le fa’aiuga o lenei tausaga a’oga.

 

O le fa’atulagaga ua i ai, e gasolo atu na’o matua e taua’aina ane i ai mea tausami ua mae’a ona saunia e le vasega o ‘au kuka i umukuka uma i a’oga ta’itasi. O fea lava le a’oga ua tulata i ai lou maota ma e vave fo’i ona o’o ane i ai le matua, e mafai ona e afea ma avatu ai le mea tausami a lau tama, e lisia fo’i le igoa o le tamaititi ma le a’oga o a’oga ai fa’apea ma lana vasega.

 

“Ua le manatu ina ia o lava le a’oga latou i le latou falea’oga, ae ua manatu e fa’afaigofie mea uma i le to’atele pe fa’afaigata i matua ona feoa’i solo ona o nei mea taumafa mo le fanau, ae ua agaga fo’i ina ia fa’aauau pea le tausiga o fanau e pei ona fa’atulaga ai lenei polokalama mai lona amataga o le tausaga a’oga,” o se fa’apupulaga lea a le tamaita’i Faia’oga Sina Talamoa o le Manulele Tausala Elementary, lea na asia e le sui o le tatou nei nusipepa.

 

Ua fa’ailoa mai e nei tamaita’i faia’oga ma le pulega a le Aoga lea, “Ua taumafai e tatala faitoto’a i matua mai le itula e 8:00 i le taeao se’ia oo i le itula e 12:00 i le aoauli, o lo’o fa’atulaga e tufatufa ai le malu taeao ma le a’iga o le aoauli.”

 

Ua o atu le vasega o matua i le taeao lava, 8:00 - 9:00am ma ua fa’ailoa mai e ave le malu taeao a le fanau, ae fa’afesili atu mo le mea’ai o le aoauli, ae o le tali, “Leai o le pau lava lea o le mea’ai na tufa fo’i i le aso muamua o ananafi lea. O lona uiga o le mea’ai ua taua’aoina ia te outou i le taimi nei, ona pau lea o le tufa’aga mo le aso.”

 

Ua toe fa’amamafa atu i le vasega o Matua uma e le tatau ona e sau ma aumai lou alo e piki le mea’ai. Ua na’o oe lea e manana’o lenei faiga fou e te sau e avatu mea’ai a lau fanau uma lava. Ia lisia lelei fo’i lau fanau mo le silafia e le vasega o le pulega ma faia’oga ina ia tumau ai le tautuaina o oe i le toega o lenei vaiaso ma fa’aauau atu ai i le vaiaso fou.

 

Ua faailoa mai fo’i i se lipoti mai nisi a’oga i le ulua’i aso o lenei faiga fou mo le mea’ai a fanau a’oga, “Sa sioti le matou sapalai o le mea’ai i le ulua’i aso i nisi a’oga, ae o nisi sa ova, o lona uiga, o ulua’i fa’amaumauga na mua’i taua’aoina mai o le a fa’atulaga i ai le isi aso e soso’o ai, se’ia o’o lava ina mautu lelei mai le tele o le sapalai e mana’omia i lea a’oga ma lea a’oga.”

 

Ua saunoa fo’i Christine Fuala’au o le SLP e tusa o le ulua’i aso o lea fa’amoemoe fou, “O le aso muamua lava e sili ona faigata, ma ua va’aia lava le tumutumu fo’i o nofoaga, ae ua fa’amamafa lava i le vasega o le pulega ma faia’oga e galulue mo lea fa’amoemoe, ina ia tima’ia matua i mea e fa’amamafaina ina ia le to’atele nisi e auai fa’atasi i le a’oga i taimi uma.”

 

“O le vave lava ona taua’aoina o meaai a fanau a’oga, o le vave fo’i lea ona leai nisi e to’atele i le nofoaga o lo’o tufa mai ai le mea’ai. Ia fa’ailoa ma faamamafa lava i matua uma, e le tatau ona sau ma aumai lana fanau e avatu mea’ai nei. E malaga mai na’o le matua po’o se sui ua matua o le aiga e avatu mea tausami a le fanau,” o se toe fa’amamafa mai lea a Fuala’au e tusa o le tumutumu o le nofoaga e tufa mai ai meaai i le ulua’i aso.

 

O le aotelega o le fanau o le a lisia mai nofoaga uma i a’oga e tufa mai ai le meaai a le fanau a’oga, ua fa’ailoa mai e le tatau ona sili atu i le 13,000, o le aotelega lea o taga mea’ai na tapena mo le ulua’i aso na fa’atautaia ai le tufatufaga o mea’ai a le fanau a’oga.

 

O lenei fo’i fa’atulagaga ua fa’atautaia nei, e ono suia i se isi taimi i le lumana’i, pe afai o le a soalaupule mai fa’auluuluga o le matagaluega ma fa’ailoa mai se isi faiga vave atu e tufatufa ai meaai a le fanau.

 

I le taimi nei ua fa’afetaia lava le galulue fa’atasi o tagata uma i lea SLP mo lea faamoemoe, ma ua mae’a loa lea le uluai aso, ua maua fo’i manatu e fa’aleleia atili ai ma fa’avave le tautua mo Matua ma Fanau, ina ia fa’aoo atu le tausami ia i latou a’o lelei atoatoa pea.