Ads by Google Ads by Google

Toe Tatalaina day care centers Iulai 6, 2020


[ata: foa'i]

Pago Pago, AMERIKA SAMOA - I se pepa o fa’amatalaga, ua fa’ailoa ai e le Matagaluega Tautua ma Alagamanuia mo Tagata Lautele (DHSS), fuafuaga e toe tatalaina day care centers - nofoaga o loo tausi ai le fanau - ia Iulai 6, 2020. 

 

O nofoaga nei o loo fa’atupeina e le Polokalama mo le Tausiga o Alo ma Fanau i Amerika Samoa i lalo o le vaaiga a le DHSS. 

 

Mo matua o lo’o ‘auai fanua i le Levalasi’s Daycare in Nu’uuli, fa’afesootai le Ofisa o Child Care e fa’amautinoa le toe tatalaina o lea nofoaga i le vaiaso fou. 

 

O le to’atele o nei daycare, e tatala ma i le 6:00 taeao – 6:00 i le afiafi mai i le Aso Gafua aga’i atu i le Aso Faraile i vaiaso ta’itasi. Ona o le fa’ama’i o le Koviti-19, o loo galulue pea le Ofisa o le Child Care ma e o loo fa’afoeina daycare ta’itasi ina ia fa’amautu tulaga o loo fa’amamafaina i fautuaga mai i le CDC ina ia malu-puipuia le fanau mai i lea fa’ama’i mata’utia. 

 

E fa’amanatu atu foi e le Fa’atonu Sili ia Muavaefa’atasi John Suisala, ona o le a toe tatalaina daycare centers, o le a fa’apitotasi nei le tautua o le In-Home Child Care, po o le fesoasoani lea mo matua ua agava’a ina ia filifili se tagata matua o loo talafeagai ma aiaiga o lea tautua na te tausia le fanau i totonu o le maota o loo nofo ai le tamaititi.

 

Ua limiti le In-Home Child Care i matua po o le ulugali’i e fa’amaonia ai aiaiga nei: Muamua, e galulue uma i la’ua i se i se matafaioi e taua tele i le fa’asologo o galuega o Matagaluega, Ofisa, po o se Kamupani aua le saogalemu ma le soifua maloloina o le lautele, fa’apea ma e o lo’o gafa ma fa’alavelave tutupu fa’afuase’i, atoa ma nisi gasologa taua mo le Atunu’u. Lona lua, o nei galuega e iai ona sifi (shifts) e masani ona fa’atulagaina i le tele o aso o le vaiaso, i le va o le 6 i le afiafi aga’i i le 6 i le taeao (24/7). O le uiga o le manatu, e ao ona faigaluega uma matua i ni galuega e fai ona sifi ona agava’a lea e fa’atumu se pepa talosaga mo le In-Home Child Care. Ma e ave le fa’amuamua i matua o loo galulue i matafaioi o le soifua maloloina, puipuiga o e le saogalemu lautele, ma nisi e masani ona tula’i e fesoasoani ma lavea’i i fa’alavelave tutupu fa’afuase’i. 

 

Mo matua ua tau’a’aoina se tusi e fa’amaonia agava’a mo le In-Home Child Care e amata mai ia Iuni 1, 2020, e mana’omia ona fa’ao’o mai i le Ofisa o le Child Care se fa’amaumauga e fa’amautinoa ai e te ausia aiaiga e pei ona ta’ua i luga mo le fa’aauauina o le tautua o le In-Home Child Care mo ‘oe ma lou ‘aiga. Afai e leai, ae tusa ma lou finagalo, o le a tu’uina atu le 30 aso e filifili ai se daycare center e tausi ai le fanau a’o e feagai ma galuega. A le maua mai se feso’ota’iga mo nei tulaga, o le a fa’amuta le tautua a le In-Home Child Care mo ‘oe ma lou aiga ia Aukuso 1, 2020. 

 

Mo ni fesili, valaau i le Ofisa o le Child Care i le 633-1571/ 1572/ 1573.