Ads by Google Ads by Google

To’atolu na pu’e fa’apagota i le osofaiga a Leoleo i Petesa


[ata: foa'i]
ausage@samoanews.com

E to’atolu ali’i na pu’e fa’apagota e Leoleo ina ua latou osofaia se fale i Petesa atoa ai ma se ta’avale i se vaega o Tafuna. O ia ali’i e aofia ai Misi Siua, Sui Tago Jr ma Henry O’Brien.

 

O le aso Gafua na te’a nei na tutula’i ai i latou i luma o le fa’amasinoga fa’aitumalo, ma fa’atulaga ai loa e le afioga i le ali’i Fa’amasino ia Fiti Sunia tupe e tatala ai i latou i tua mai le toese i Tafuna.

 

O lo o tu’uaia i latou i moliaga o le umia fa’asolitulafono o vaega o le fualaau fa’asaina o le aisa, atoa ai ma le umia ma le fa’amoemoe e tulei ma fa’atau atu i isi tagata.

 

E $15,000 le tupe lea ua fa’atulaga e totogi ona fa’atoa mafai lea ona tatala Siua i tua, ae ta’i $5,000 lea ua fa’atulaga ona fa’atoa mafai lea ona tatala Tago Jr ma O’Brien.

 

O le aoauli o le aso Tofi o le vaiaso na te’a nei na aga’i atu ai Leoleo Suesue mai le Vaega e Suesueina Fualaau Fa’asaina e fa’ataunu’u poloaiga e 2 na sainia e le Fa’amasinoga, e su’e ai meatotino a le susuga a Suia ma O’Brien.

 

A o i ai Leoleo i luga o le alatele i Tafuna, sa latou molimauina ai se ta’avale pikiapu lanu pa’epa’e, le ituaiga o le Chevrolet Silverado o loo paka i luma o se Faleoloa. O le ta’avale tonu lava lea o loo aofia i le poloaiga e le fa’amasinoga e tatau ona su’e ona o lo o masalomia le i ai o fualaau fa’asaina.

 

E to’atolu ali’i sa i ai i totonu o le ta’avale i le taimi na taunu’u atu ai Leoleo, ma fa’atonuina ai loa le ave ta’avale o lea ta’avale, le susuga Siua e oso i fafo ae se’i su’e lana ta’avale. O ali’i e to’atolu sa i ai i totonu o le ta’avale e aofia ai Suia, Tago Jr ma le isi ali’i na mae’a ona saili e Leoleo lona tino, ona toe faataga lea o ia e alu i lona aiga, ona e leai ni fualaau fa’asaina sa maua ia te ia.

 

Ina ua saili e Leoleo le ta’avale, na maua ai fualaau fa’asaina o le aisa i totonu o se pepa iila, atoa ai ma se tino i tupe e $1,589.

 

O isi mea na maua e aofia ai vaega e fa’aaoga e utu ai le pauta o le aisa e aofia ai pepa iila e 3 o loo i ai vaega o le aisa; tasi le straw ua tipi tulimanu o loo tumu i le pauta o le aisa; 10 tama’i pepa iila e fa’aaoga e utu ai le aisa, ma se paipa tioata tele o loo iai fo’i vaega o le aisa.

 

A o saili e Leoleo le ta’avale a Siua, na fai Siua i le leoleo ina ia fesoasoani atu ia te ia.

 

O Tago Jr ma le ali’i lea na fa’ataga e Leoleo ona toe fo’i i lona aiga, na auina uma atu i laua i le Ofisa o Leoleo i Tafuna ma saili ai o la tino poo i ai ni fualaau fa’asaina. Ina ua saili le tino o Tago Jr, sa maua i le taga o lona ofu se pepa iila o loo i ai vaega o le aisa. Ae o le isi ali’i, e leai ni fualaau fa’asaina sa maua i lona tino.

 

Ina ua mae’a ona saili e Leoleo le ta’avale a Siua, na aga’i atu ai loa mo le sailia o lona fale i Petesa, ona o le isi lea nofoaga o loo taua i totonu o le poloaiga a le fa’amasinoga e tatau ona saili. E leai ni fualaau fa’asaina na maua i le fale o Siua i Petesa, se’i vagana ai straws e 28 ma tama’i fagu tioata e 18. Sa sailia fo’i e Leoleo le isi ta’avale a Siua sa paka ai i tafatafa o le fale, peita’i e leai ni fualaau fa’asaina na maua ai.

 

Ina ua fesiligia e Leoleo ia Tago Jr, sa ia taua ai e fa’apea, o latou e to’atolu sa i totonu o le ta’avale a Siua, na fa’atoa latou taliu mai i Vaitogi sa latou o e momoli fualaau fa’asaina o le aisa i le fale o se tasi o ali’i, lea e $100 lana fa’atau sa fai ia Siua.

 

Na taua atili e Tago Jr i Leoleo, lona molimauina o se vaega tele o fualaau faasaina, o se tinoitupe aemaise ai o vaega e fa’aaoga e utu ma faatau ai fualaau fa’asaina i totonu o le ta’avale a Siua.

 

Sa taua atili e Tago Jr i Leoleo, ua tusa ma le 4 masina o fesoasoani ia Siua e tulei ma fa’atau atu fualaau fa’asaina o le aisa i isi tagata. E fa’aaoga fo’i e Siua lona fale i Petesa e fa’atau mai ai fualaau fa’asaina, ae o isi taimi e alu e kiliva ai pe afai e le maua se avanoa e o atu ai tagata i lona fale e fa’atau mai fualaau fa’asaina.

 

O le mae’a ai ona fa’atalatalanoa o Siua ma Tago Jr, na taofia ai loa i laua i le falepuipui e fa’atali ai le taimi e tutula’i ai i luma o le fa’amasinoga.

 

O le afiafi o le aso Tofi o le vaiaso lava na te’a nei, na taofia ai e Leoleo se pikiapu lanu siliva, le ituaiga o le Chevrolet Silverado, o le ta’avale lea o loo i totonu o le isi poloaiga mai le fa’amasinoga e tatau ona saili.

 

O lea ta’avale sa fa’afoeina lea e le ali’i o O’Brien. Na saili e Leoleo le ta’avale e lei maua i ai ni fualaau fa’asaina, ae ina ua saili le tino o le ali’i o O’Brien, o ia lea sa aveina le ta’avale, na maua i ai i le taga o lona ofu se paipa o loo i ai vaega o fualaau fa’asaina.

 

Na taua e O’Brien i Leoleo, o le paipa sa i lana taga sa ia maua i luma o se faleoloa, ona ia tago lea ma tu’u i le taga o lona ofu.