Pago Pago - AMERIKA SAMOA

Na pasia e le Senate i lona faitauga faatolu, i le aso Lulu na se’i mavae atu, ia ni i’ugafono se lua a le Senate, lea sa soalaupuleina i iloiloga sa faia i le vaiaso atoa, ae o latou teena se pili e suia ai tupe maua a sui faitulafono, e aofia ai Senatoa ma Faipule, e ala lea i se siitaga o totogi, ae faaitiitia a latou alauni.

O le pili muamua e mo le tu’uina atu i le Mataupu tau Samoa, e mataituina mataupu tau i fanua ma suafa matai.

O lenei pili sa faaulufaleina e le afioga i le Senatoa ia Togiola T. A. Tulafono, ma sa auai ai sui Kovana o itumalo i Manu’a ma le Falelima i Sisifo, i le iloiloga.  Na pasia lenei pili, i se palota 15-0.

O le pili lona lua, sa faaulufaleina e le afioga i le Peresetene Tuaolo Manaia Fruean, e suia ai tiute a le Kovana a Samoa I le fa’agasologa o paketi, e faatulafonoina ai le fa’asoasoaina e le fono faitulafono o tupe maua e le i fuafuaina.

E pei ona lipotia e le Samoa News i le vaiaso ua mavae, sa tele se fete’ena’i i manatu fa’aalia a afioga i Senatoa, i le iloiloina o le $40 miliona lea na totoe mai i le tausaga faaletupe 2023, e pei ona molimauina e le Teutupe a le malo, le susuga Malemo Tausaga ma le Faatonusili o le Ofisa o Tupe Faasoasoa, le faletua ia Catherine Saelua.

Sa fa’aalia ai le le usita’ia o tulafono faavae, i le faiga o ‘peimeni’ a Ofisa ma Matagaluega a le malo, i a latou konakarate ma kamupani tua.

Ae sa te’ena e le Senate ia le pili lona tolu, lea sa faaulufaleina e le afioga i Senatoa ia Malaepule Saite Molina, Ma’o Faauma Gogo ma Poumele P. Poumele, e sui ai tupe maua a sui faitulafono, e faasili atu ai a latou totogi, i lo a latou ‘alauni’ mo a latou ofisa.

Ua faailoa mai i le Vaega 2.0102 ASCA, le le’i toe faia o se suiga fou i totogi a Senatoa, Faipule ma sui Faipule, talu mai le 1982, e ui i le fa’aauau pea ona si’itia tau o le soifuaga.  Ma i tausaga ua mavae atu, sa faapea ona si’itia tupe maua a sui faitulafono, e tali ai le leai o se siitaga o a latou totogi.

Ae o lenei pili, ua faamoemoe e fofoina ai lea faafitauli, e ala i le siitaga o totogi i se tulaga ua talafeagai ma tiute o sui faitulafono.  Faatasi ai ma se tupe maua e mafai ona faataunuu ai o latou tiute.

O nei suiga e pei ona faauluina, e aofia ai:

Totogi faaletausaga a le Peresetene o le Senate ma le Fofoga Fetalai - $85,000 (mai i le $30,000)

Totogi faaletausaga a isi sui o le Fono Faitulafono - $80,000 (mai i le $25,000)

Totogi faaletausaga mo sui o le motu a Swains - $75,000 (mai i le $20,000)

Tupe mo Ofisa mo sui faitulafono:

Totogi ta’i lua vaiaso, se alauni e:

$25,000 (mai i le $65,000) i le tausaga mo sui taitasi o le Senate ma le Maota o Sui

$30,000 (mai i le $80,000) i le tausaga mo le Peresetene o le Senate ma le Fofoga Fetalai

O lea alauni e totogi ai tupe fa’aaluina i le faatinoina o a latou tiute.  Ma e le manaomia ona faamaumauina nei tupe alu.