Ads by Google Ads by Google

Tatala tua ali’i se to’alua na ta’usala umia o fualaau fa’asaina

ausage@samoanews.com

E ui i le matuia o le solitulafono e pei ona ta’usala ai ali’i e to’alua mai Samoa, atoa ai ma le tulaga faaletonu o la pepa nofomau, ae na talia lava e le afioga i le ali’i Fa’amasino  ia Fiti Sunia le talosaga ina ia fa’aauau pea ona aumau i laua nei i le teritori mo le tausiga o la aiga.

 

O le vaiaso na te’a nei na tutula’i ai Tanielu Fagamalie ma Felise Kapei i luma o le Fa’amasinoga Maualuga mo le lauina o le la fa’asalaga.

 

O le tama’ita’i loia sili lagolago ia Christy Dunn sa tula’i mo le malo, ae o le ali’i loia fautua lagolago ia Ryan Anderson na tula’i mo i laua nei e to’alua, lea na taofia pea i le Toese i Tafuna talu mai le aso 17 o Aperila na pu’e fa’apagota ai i laua, ina ua le mafai ona la totogi le tupe e $5,000 sa fa’atulaga e tatala ai i laua i tua.

 

Na ulua’i molia e le malo ia Fagamaile ma Kapeli i le moliaga mamafa o le umia faasolitulafono o vaega o le laau fa’asaina o le mariuana,

 

Ae i lalo o se maliliega na sainia e le malo ma i laua ua molia, lea fo’i na talia e le Fa’amasinoga Maualuga i le masina o Oketopa o le tausaga nei, na malilie ai le malo latou te faia se suiga i moliaga sa latou tu’uaia ai i laua nei e to’alua, ma tali ioe ai loa i laua e to’alua i le moliaga ua toe suia e le malo, le solitulafono o le umia faasolitulafono o vaega o le laau fa’asaina o le mariuana, lea e mafai ona faasala ai se tasi i le toese mo le umi e le sili atu i le 5 tausaga, pe fa’asala i le salatupe e le sili atu i le $5,000, poo le fa’asala fo’i i fa’asalaga uma ia e lua.

 

I le tali ioe ai o Fagamaile ma Kapeli i le moliaga e pei ona ta’usala ai i laua, na la ta’utino ai e fa’apea, i se taimi o le aso 17 o Aperila, 2019, na la umia faasolitulafono ai vaega o le laau fa’asaina o le mariuana.

 

Na ta’utino i laua ua molia e fa’apea, ina ua aga’i atu Leoleo e faafilemu se vevesi na latou aafia ai, i le taimi o se latou inugapia sa faia i luma o se Faleoloa i Pava’ia’i, na maua ai e Leoleo ni sikaleti ta’itasi i totonu o la ofu sa faia.

 

O le vaiaso na te’a nei na tutula’i ai i laua ua molia i luma o le afioga i le ali’i Fa’amasino ia Sunia mo le lauina o le la fa’asalaga.

 

Ina ua maua le avanoa mai le Fa’amasinoga, na faatoese ai i laua e tusa ai o le solitulafono ua ta’usala ai i laua, ma la talosagaina ai se isi avanoa mo i laua se’i fa’aauau pea ona aumau i Amerika Samoa.

 

Na taua e Fagamaile i lana faatoesega e fa’apea, o po uma e moe ai i totonu o le sela, e mafaufau ai lava i lona to’alua ma lana fanau.

 

Na faatoese fo’i Kapeli i le Fa’amasinoga e tusa ai o lana solitulafono. “Faamolemole lau afioga i le ali’i Fa’amasino, pe maua se avanoa se tasi mo a’u se’i o’u toe fo’i ai i tua e tausi la’u fanau ma saili sa’u galuega e fesoasoani ai i le totogiina o la’u salatupe,” o le talosaga lea a Kapeli.

 

“O fea lou aiga lea e te fia alu i ai,” o le fesili lea a Sunia.

 

Na tali Kapeli, “O lo’u aiga i Amerika Samoa nei, ae le o Samoa.”

 

Na faailoa e Sunia ia Kapeli, e faigata ona vave tali atu le Fa’amasinoga i lana talosaga, ona o lo o manino i le ripoti a le Ofisa Faanofovaavaaia, ua tele tausaga talu ona mae’a le aoga o lona ID nofomau.

 

Na talosagaina e Anderson le fa’amasinoga ina ia faasala ia Fagamaile ma Kapeli i le faasalaga faanofovaavaaia, e aunoa ma le toe tuuina atu o se isi taimi la te tuliina i le toese i Tafuna.

 

E ui i tulaga faaletonu o pepa nofomau a Fagamaile ma Kapeli, ae na talosaga lava Anderson ina ia aua nei faia se poloaiga e toe faafo’i ai i laua i Samoa, a ia tuu le avanoa e tatala ai i laua i tua e toe faaleleia ai a laua pepa nofomau.

 

Sa i ai i totonu o le potu fa’amasino le sponsor a le susuga a Fagamaile, le tama’ita’i o Agamalu Alosio, o se tagata faigaluega i le Falema’i o le LBJ i Faga’alu.

 

Na taua e le tama’ita’i o Alosio i le fa’amasinoga lona faatamala ua mafua ai ona tuai na faafou le ID a Fagamaile. E tusa ai ma faamaumauga a le Faamasinoga, e 2 tausaga talu ona mae’a le aoga o le ID a Fagamalie, ae o Kapeli, ua tasi le tausaga talu ona le toe faafouina lona ID.

 

Na talia e Sunia le faamaualaloga a le sponsor a Fagamaile, o lona faatamala lea ua mafua ai ona tuai na faafou le ID a Fagamaile.

 

Saunoa Sunia e faapea, e faigofie atu i le Fa’amasinoga ona faia sana faaiuga e tusa ai o le solitulafono e pei ona ta’usala ai i laua nei e to’alua, ae faigata atu ona faia se faaiuga i le tulaga o le la nonofo ai pea i Amerika Samoa, talu ai, e le o tusa ma le tulafono tau Femalagaaiga o la pepa nofomau.

 

Na faailoa e Sunia ia Fagamaile ma Kapeli, e le o se tiute o le Fa’amasinoga le faataga pea o i laua e nonofo i le teritori, o le tiute lena a le Ofisa o Femalagaaiga faapea ai ma lana Komiti Fa’afoe. Pau le tiute a le Fa’amasinoga, o le faia lea o faaiuga e tusa ai ma le tulafono ua solia.

 

“Afai e talia e le Ofisa o Femalagaaiga poo lana Komiti Faafoe le lua nonofo ai pea i le atunu’u, ona faia lea o le tulaga lena, ae afai e le taliaina le lua talosaga, lona uiga, e tatau ona lua toe fo’i i Samoa,” o le saunoaga lea a Sunia.

 

Saunoa atili Sunia e fa’apea, o se tasi o faafitauli ua maitauina e le Fa’amasinoga i ituaiga mataupu faapenei, o le faaletonu lea o fesootaiga i le va o sponsor ma i latou mai fafo mo le faafouina o latou pepa nofomau. Ae sili ai ona faaletonu fesootaiga i le va o le Ofisa o Femalagaaiga ma sponsor, i le faatamala lea o le Ofisa o Femalagaaiga e saili i latou ua maea le aoga o aso e nonofo ai i le teritori.

 

O ni isi o tuutuuga o le nofovaavaaia e 24 masina a Fagamaile ma Kapeli, o le tuli lea o aso e 225 i le toese i Tafuna. E tusa ai o le ripoti a le Ofisa Faanofovaavaaia, e 225 aso na taofia ai i laua nei i le toese ao faatali ai se faaiuga o lenei mataupu.

 

O isi tuutuuga e aofia ai le aua ne’i o la toe tagofia fualaau fa’asaina poo le ‘ava malosi, ma ia avea i laua ma tagatanu’u e usita’i i tulafono a le Ofisa o Femalagaaiga, e ala i le faafouina lea o la ID nofomau i totonu o le 30 aso talu ona tatala i laua i tua.