Ua talia e le Fa’amasinoga Maualuga le talosaga a le ali’i loia fautua lagolago ia Ryan Anderson, ina ia fa’aauau pea le tatala i tua o Sierra Isaia e fa’atali ai le aso e lau ai lona fa’asalaga.

O le vaiaso nei na tulai ai Isaia i luma o le Fa’amasinoga Maualuga, mo le fofogaina lea o le latou maliliega aufa’atasi ua mae’a ona sainia ma le malo, lea fo’i ua talia e le Fa’amasinoga.

O le tama’ita’i loia sili lagolago ia Laura Garvey na tula’i mo le malo, ae o le ali’i loia fautua lagolago ia Anderson na tula’i mo Isaia.

E 2 tagi eseese na faila e le malo fa’asagaia Isaia. I le tagi muamua, sa tu’uaia ai o ia i moliaga mamafa e 2, le moliaga o le umia fa’asoltulafono o aisa ma le fa’amoemoe e tulei ma fa’atau atu i isi tagata; faapea ai ma le moliaga mamafa o le umia faasolitulafono o aisa.

Ae i le tagi lona 2, sa tu’uaia ai Isaia i le moliaga mamafa o lona umia fa’asolitulafono lea o vaega o le pauta fa’asaina o le aisa.

Ae i lalo o le maliliega lea na sainia e le ua molia ma ua talia foi e le Fa’amasinoga Maualuga, ua malie ai Isaia e tali ioe i moliaga mamafa e 2 ua uma ona toe teuteu e le malo.

I le tagi muamua, ua malie ai Isaia e tali ioe i le moliaga o lona umia faasolitulafono o vaega o le pauta o le aisa, o se solitulafono e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le siliai le $5,000, poo le fa’asala fo’i i fa’asalaga uma ia e lua.

Ae i le tagi lona lua a le malo, ua malie ai le ua molia e tali ioe i le moliaga muamua lea ua toe teuteu lona mamafa, ina ia faailoa ai le solitulafono o le umia faasolitulafono o vaega o le pauta faasaina o le aisa.

I le tali ioe ai o Isaia i moliaga o lo o i le tagi muamua, ua ia ta’utino ai e fa’apea, i se taimi o le aso 26 o Aokuso 2017, sa ia umia faasolitulafono ai se paipa tioata o lo o i ai vaega o le pauta fa’asaina o le aisa.

Sa ia ta’utino fo’i e fa’apea, a o tatala ai o ia i tua e faatalitali ai taualumaga o lana mataupu muamua, na taofia ai e Leoleo lana ta’avale i le aso 11 o Tesema 2017. Ae ina ua sailia e Leoleo lona tino, sa maua i ai se paipa tioata o lo o i ai vaega o le pauta fa’asaina o le aisa.

E $15,000 le tino i tupe na totogi e Isaia e tatala ai o ia i tua mai le toese i Tafuna, e fa’atali ai taualumaga o lana mataupu.

Ina ua valaau lana mataupu i le aso 1 o Tesema 2017, e le i auai le ua molia i totonu o le Fa’amasinoga, o le mafua’aga lea na poloaina ai loa e le Fa’amasinoga le tusi saisai e pue faapagota mai ai le ua molia.

O le aso 11 o Tesema 2017 na aga’i atu ai Leoleo e saili Isaia mo le tuuina atu o le tusi saisai e loka mai ai o ia. A o taamilo solo Leoleo e tau saili le ua molia, na maua i se ripoti mai le isi ta’avale a Leoleo ni ta’avale se 2 o lo o lavevea i luma o le Fale o Louisa Laundromat i Iliili.

Na aga’i atu Leoleo ma latou iloa ai, o se tasi o ta’avale na a’afia i lea fa’alavelave o le ta’avale a Isaia, sa maua atu ai fo’i Isaia i totonu o lana ta’avale i le taimi lea, ma taumafai ai loa Leoleo e fa’amatala ia te ia le mafua’aga o le tau sailia o ia, ona o se poloaiga mai le Fa’amasinoga e pu’e faapagota ai o ia, i lona le usitaia lea o le poloaiga e auai ai i soo se taimi e valaau ai lana mataupu.

Na musu Isaia e oso i fafo ma lana ta’avale. Sa umi se taimi o fai finauga a Leoleo ma Isaia, peita’i sa tumau pea le musu o le ua molia e alu i fafo ma lana ta’avale. Na faafuase’i ai loa ona tatala e se tasi o Leoleo le faitoto’a ae toso mai i fafo le ua molia.

Na saili e Leoleo le tino o Isaia mo ni aupega ina ia mautinoa ai lo latou saogalemu. I le taimi na saili ai le tino o Isaia, sa maua i ai se paipa tioata i le taga o lona ofu o lo o i ai vaega o le pauta faasaina o le aisa.

Ina ua mae’a ona talia e le Fa’amasinoga Maualuga le maliliega a le ua molia ma le malo, na fautuaina ai loa e le afioga i le Faamasino Sili ia Michael Kruse le alii loia fautua ia Anderson, pe i ai se vaega e fia talosaga ai mo le fa’aauau pea lea ona tatala o Isaia i tua, ona o lea ua i ai le manatu o le Fa’amasinoga e taofia loa o ia i totonu o le toese e fa’atali ai le aso e lau ai lana fa’asalaga.

Na faailoa e Anderson i le Fa’amasinoga e fa’apea, o Isaia o loo tumau pea ona tatala i tua, ina ua mae’a ona ia totogi vaega tupe sa fa’atulaga e le Fa’amasinoga Fa’aitumalo.

E le gata sa ia totogi le tinoitupe e $15,000, ae sa ia toe totogi fo’i le isi tinoitupe e $2,000 ina ua faila e le malo le latou tagi lona lua fa’asaga ia te ia. I se isi faaupuga, e tusa ma le $17,000 le tinoitupe a Isaia lea ua i lalo nei o le vaavaaiga a le Fa’amasinoga ao faagasolo ai lana mataupu.

Na talosaga Anderson i le fa’amasinoga mo se avanoa e fa’aauau ai pea ona tatala Isaia i tua. E le gata o ia o se tagata e galue malosi mo le tausiga o lona to’alua ma lana fanau, ae leai fo’i se poloaiga a le fa’amasinoga na ia solia talu ona faagasolo mai ana mataupu.

Na talia e Kruse le talosaga a Anderson ma poloaina ai loa Isaia ina ia tumau pea le tatalaina o ia i tua e faatalitali ai le aso lea ua fa’atulaga e lau ai lana fa’asalaga. E i ai fo’i le poloaiga faapitoa na tuuina atu e Kruse ia Isaia e ao ona ia usita’i i ai, o le poloaiga lea, e tatau ona saini i le Ofisa Faanofovaavaaia i aso Gafua o vaiaso uma i le itula e 8:00 i le taeao.

E le gata i lea, ia fa’aauau pea lona usitaia o le tuutuuga o le faasa lea ona ia toe tagofia fualaau faasaina poo le ‘ava malosi.

Na faailoa e Kruse ia Isaia e faapea, afai na te le usitaia se tuutuuga o tuutuuga nei, e le gata e toe ave o ia i le toese e faatali ai le aso e lau ai lana fa’asalaga, ae o le a ave fo’i e le Fa’amasinoga lana tupe e $17,000 o lo o tatala ai o ia i tua.

O le aso 11 o Oketopa 2019 lea ua fa’atulaga e lau ai le fa’asalaga a le ua molia.