Pago Pago, AMERIKA SAMOA

O le alii ave ta’avale o le pikiapu lanu uliuli lea na taofia e Leoleo i le masina na te’a nei, ona o tu’uaiga i le ave ta’avale ‘ona i luga o le alatele, ua molia nei o ia e le malo i le moliaga mamafa o lona umia fa’asoltulafono lea o vaega o le pauta fa’asaina o le aisa ma le mariuana.

O le masina na te’a nei na tula’i ai Amosa Valaau i luma o le Fa’amasinoga Fa’aitumalo mo lana ulua’i iloiloga. O le tama’ita’i loia sili lagolago ia Kristine Soule o lo o tula’i mo le malo i lenei mataupu, ae o le ali’i loia fautua lagolago ia Ryan Anderson o lo o tula’i mo le ua molia.

O moliaga e 3 ua tu’uaia ai e le malo ia Valaau e aofia ai le umia fa’asolitulafono o vaega o le pauta fa’asaina o le aisa ma le moliaga e tasi o le umia faasolitulafono o vaega o le laau faasaina o le mariuana, o n solitulafono mamafa e mafai ona fa’asala ai se tasi i le toese mai le 5 e oo atu i le 10 tausaga, pe fa’asala foi i le salatupe e mai le $5,000 e oo atu i le $20,000; faapea ai ma le moliaga mama o le ave ta’avale ‘ona, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala i le salatupee le silia i le $1,000, poo le fa’asala fo’i i fa’asalaga uma ia e lua.

E $5,000 lea vaega tupe lea ua fa’atulaga e le Fa’amasinoga e tatala ai i tua le ua molia. Afai ae tatala o ia i tua, e le mafai ona ia toe faafoeina se ta’avale pe na te toe solia foi se tulafono a le malo, e aofia ai ma tulafono tau taavale afi. E le mafai foi ona ia taumafai e faafesootai molimau a le malo e aofia ai Leoleo na taofia lana ta’avale.

TAGI A LE MALO

Pe tusa o le itula e 1:00 i le vaveao o le aso 14 o Ianuari, 2021, na maitauina ai e se vaega o ali’i ma tama’ita’i Leoleo sa tiute i luga o le alatele i Tafuna se ta’avale pikiapu lanu uliuli o alu saoasaoa i luga o le alatele, ma e foliga mai fo’i e i ai se mafua’aga ua ala ai ona alu saoasaoa lenei ta’avale.

E le gata i le alu saoasaoa o le ta’avale, ae sa maitauina fo’i e Leoleo le tifa solo o le ta’avale i luga o le alatele, toeitiiti lava fetoai ma se tasi o ta’avale na la fetaui i luga o le alatele.

O le maitauina ai e Leoleo o lea tulaga faaletonu, na aga’i atu ai loa ma tuli le ta’avalea le ua molia, seia oo ina maua ma taofia loa. Na taofi e Leoleo le taavale ma iloa ai, o le susuga a Amosa Valaau, o ia lea o loo faafoeina le ta’avale. Na faailoa e Leoleo ia Amosa le mafua’aga ua ala ai ona latou taofia lana ta’avale, ona ua masalomia lona tagofia o le ‘ava malosi ao ia faafoeina se ta’avale.

Na faia se suega faapitoa i le ali’i ave taavale e ala i lona savali i luga o le laina ma atagia mai ai, e le pasi le suega na faia e le ua molia, ma faamaonia ai loa le ova o le ‘ava malosi sa ia tagofia.

O le mae’a ai ona fa’amaonia o le tagofia e le ua molia o le ‘ava malosi ao ia faafoeina le ta’avale, na taofia ai loa o ia i lalo o le vaavaaiga a Leoleo, ma auina atu i le Ofisa o Leoleo i Tafuna mo isi suesuega faaopoopo.

Ina ua taunu’u le alii ave taavale i le Ofisa o Leoleo i Tafuna, na faatonuina loa o ia e Leoleo ina ia sailia lona tino mo ni a’upega poo nis fualaau fa’asaina fo’i. Ina ua saili e Leoleo le tino a le ua molia, sa latou maua i ai i le taga o lona ofuvae sa fai se paipa tioata o lo o i ai vaega o le pauta faasaina o le aisa.

Ina ua fesiligia e Leoleo le ua molia e tusa ai o le paipa sa maua ia te ia, sa ia taua ai e fa’apea, sa faia le la inugapia ma lana uo i Faleniu, ma tuu atu ai loa e lana uo le paipa tioata o lo o i ai vaega o le pauta fa’asaina o le aisa na te ulaina.

Ina ua mae’a ona ia ulaina le paipa, sa ia tago loa ma teu i totonu o le taga o lona ofu o lo o faia, ma le fa’amoemoe e alu ma ia i le fale.

Na faia e Leoleo se suega faapitoa i vaega o le pauta sa i totonu o le paipa tioata ma faamaonia ai, o vaega ia o le pauta fa’asaina o le aisa.

Na faaauau suesuega a Leoleo ma maua ai se sikaleti mariuana ua mae’a ona taai i totonu o le ato tupe a le ua molia. Na taua e le ua molia i Leoleo, na te le iloa le taimi na tuu ai e lana uo le sikaleti mariuana i totonu o lana ato tupe. Na faia se suega ma faamaonia ai, o vaega ia o le laau faasaina o le mariuana.

Na faailoa e le ua molia i Leoleo, o lo o i ai fo’i se isi tagi a le malo fa’asaga ia te ia i le umia o fualaau faasaina i luma o le Fa’amasinoga Maualuga. O lea tagi e pei ona taua e Livisitone, na tula’i mai i le masina o Me o le tausaga e 2019.

TAGI MUAMUA FA’ASAGA IA LIVISITONE

E pei ona taua e le malo i le latou ulua’i tagi fa’asaga i le ua molia e fa’apea, i le masina o Me o le tausaga e 2019, na aga’i atu ai se vaega o Leoleo Suesue e fa’ataunu’u le poloaiga a le Fa’amasinoga, e saili ai le fale ma le ta’avale a le ua molia, ina ua masalomia lona a’afia i le tulei atoa ai ma le fa’atauina atu o fualaau fa’asaina i tagata lautele.

O le mae’a ai ona faatinoina e Leoleo o le poloaiga e saili ai le fale a le ua molia, na faila ai loa e le malo moliaga mamafa e 4 fa’asaga ia te ia. O ia moliaga e aofia ai le moliaga o le umia faasolitulafono o le pauga o le aisa; umia faasolitulafono o le aisa ma le fa’amoemoe e faatau atu i isi tagata; umia faasolitulafono o le laau faasaina o le mariuana; faapea ai ma le umia faasolitulafono o mariuana ma le fa’amoemoe e fa’atau atu i isi tagata.

I  le taimi o le osofaiga e pei ona taua e le malo i le latou tagi, o lo o tu’uaia ai le maua e Leoleo o fualaau fa’asaina faapea ai ma mea e fa’aaoga mo le faatauina atu o fualaau fa’asaina, i se tama’i fale tu’ufua o lo o pito i tua o le fale e nofo ai Valaau ma lona aiga.

Na taua e le malo e fa’apea, i se taimi o le masina o Oketopa o le tausaga e 2018, na faailoa atu ai e se molimau fa’atuatuaina (CI) i Leoleo ni fa’amatalaga e lagolagoina ai le a’afia o Valaau i le pisinisi o le fa’atauina atu lea o fualaau fa’asaina o le aisa ma mariuana i tagata lautele.

Na taua e le molimau fa’atuatuaina lea i Leoleo e fa’apea, o le isi tagata e suafa ia Uili Tagaloa, o ia lea o lo o fesoasoani ia i le ali’i ua molia i le tulei atoa ai ma le fa’atauina o fualaau fa’asaina o le aisa ma le mariuana mai le fale a le ua molia. O isi taimi e fa’aaoga ai le ta’avale a le ua molia e kiliva ai fualaau fa’asaina i tagata e le mafai ona oo atu i le fale a le ua molia e piki mai ai a latou oka.

Na taua atili e le molimau i Leoleo e fa’apea, o ia le isi tagata e masani ona alu ma fa’atau mai ana fualaau fa’asaina mai le fale a le ua molia i Tafuna. O isi taimi e pei ona taua e le molimau, e fa’aaoga ai e le ua molia lona tama’i fale i le pito i tua o lona fale tele e tulei ma fa’atau mai ai fualaau fa’asaina, ina ia aua ai ne’i iloa e lana fanau gaioiga o lo o ia faia.

O le to’atele o tagata fa’atau, fa’atoa o lava i le fale a le ua molia i le po e piki mai a latou oka, o le mafua’aga lena e ala ai ona to’atele tagata ma ta’avale e aga’i atu i lea fale i aso uma o le vaiaso.

O le mae’a ai ona tauaao e Leoleo o fa’amatalaga mai le molimau fa’atuatuaina, na faatulaga ai loa se gaioiga e ala i le tuli e Leoleo o le molimau fa’atuatuaina e fa’atau mai ni fualaau faasaina mai le ua molia i le tau e $50.

Sa maitauina uma e Leoleo le taimi na aga’i atu ai le molimau fa’atuatuaina i le fale a le ua molia mo le pikiina mai o le oka, atoa ai ma le tuuina atu o le tupe i le lima o le ali’i ua molia.

O fualaau fa’asaina na fa’atau mai e le molimau fa’atuatuaina mai le fale a le ua molia, na tuuina atu uma i Leoleo. Na talosagaina e Leoleo se faatanaga mai le Fa’amasinoga e su’e ai le fale a le ua molia ma lana ta’avale.

O le masina o Me o le tausaga e 2019, na osofaia ai loa e Leoleo le fale a le ua molia ma lana ta’avale, ma latou maua ai se vaega tele o fualaau fa’asaina, o tupe, faapea ai ma mea e fa’aaoga e i latou o lo o tulei ma fa’atau atu fualaau fa’asaina.

E $25,000 le tupe na totogi e le ua molia e tatala ai o ia i tua i le mataupu lea. O le aso 21 o Iulai o le tausaga e 2023 lea ua faatulaga e faia ai le fa’amasinoga autu o lenei mataupu.