Ads by Google Ads by Google

Talitonu Sanitoa e le talafeagai auala fa’aaoga ai malo tupe fesoasoani a le fetarale


[ata: foa'i]
ausage@samoanews.com

Pago Pago, AMERIKA SAMOA

 

E talitonu le afioga i le ali’i Faipule mai le Itumalo o Tualauta ia Larry Sanitoa, e le talafeagai ma le Tulafono auala o lo o fa’aaoga ai e le malo tupe fesoasoani mai fafo mo puipuiga o le fama’i oti o le COVID-19.

 

O lea saunoaga a Sanitoa na tuu sa’o atu lea i le Loia Sili a le malo ia Mitzie Jessop Taase i se feiloaiga a le Komiti o le Soifua Maloloina a le Maota o Sui ma sui o le Task Force o loo faatulagaina puipuiga mo le faama’i o le COVID-19 a le malo i le vaiaso na te’a nei.

 

O sui o le Task Force na i ai i lea fonotaga a eofia ai le Loia Sili, o le afioga a Faumuina J. Faumuina, o le Faatonusili o le Ofisa o le Medicaid ia Sandra King Young, faapea ai ma ali’i foma’i e to’alua ia Dr. Aifili John Tufa ma Dr. Saipele Fuimaono.

 

Ina ua oo le talanoaga a le Komiti a le Maota o Sui ma sui o le Task Force i le itu tau tupe e faatino ai auaunaga a le malo mo puipuiga o le atunu’u i le fa’ama’i o le COVID-19, na saunoa ai Sanitoa e fa’apea, na te le lagolagoina  le tau fesiligia o se vaega tupe e faatino ai nisi o auaunaga mo puipuiga o le fa’ama’i, ona o loo tele ma lava vaega tupe fesoasoani na tuuina mai e le malo tele mo Amerika Samoa.

 

Saunoa Sanitoa aga’i i le Loia Sili ma ia taua e faapea, o le feiloaiga a le Komiti o le Tupe Faasoasoa a le Maota ma le Teutupe faapea ai le Faatonusili o le Paketi i le 2 vaiaso talu ai, sa ia fesiligia ai vaega tupe mai le tulafono o le CARE Act lea ua faaavanoa mo nisi o atina’e tetele a le malo.

 

Na faailoa e Sanitoa i le Loia Sili e faapea, o le lisi o galuega e pei ona tuuina mai i luma o le Maota o Sui, na te le lagolagoina, ona o galuega uma nei e le fesootaga’i ma tulaga o le puipuiga o le faama’i o le COVID-19.

 

O ia galuega tetele e tusa ma le $7 miliona le tupe atoa e alu ai, lea e pei ona i ai le $2.5 miliona mo le auala i Nu’uuli; $2 miliona mo le tatalaina i lalo o le Fale Faamasino; $400,000 mo le Administrative Code Revision; $700,000 mo le Marine Resource Building; $1 miliona mo le E-Rate Center HUB Building; $300,000 mo le Tourist Revival Project, ma le $300,000 mo le Centralized Admin. Building a le Ofisa o Aoga.

 

Na taua e Sanitoa e fa’apea, a faitau manino le Task Force i le tulafono na pasia ai le CARE Act atoa ai ma auala e fa’aaoga i ai tupe nei, e leai ma se galuega o galuega ia ua faatulaga e le malo e fesootai ma le mafua’aga na ala ai ona aumai lenei vaega tupe mo Amerika Samoa.

 

“I lo’u lava taofi na o a’u, e le talafeagai ma le tulafono o le CARE Act auala ua fa’aaogaina ai e le malo tupe na aumai e faatino ai gaioiga mo le puipuia o Amerika Samoa mai le fa’ama’i o le COVID-19,” o le saunoaga tu’u sa’o lea a Sanitoa i le Loia Sili a le malo ia Jessop Ta’ase. 

 

“O le fesili lau afioga i le Loia Sili a le malo, na fautuaina e le Task Force le faatinoina o nei galuega uma poo se faaiuga lava na fai to’atasi e le Kovana,” o le fesili lea a Sanitoa ae le i maua se avanoa o le Loia Sili e saunoa mai ai e faamanino lea tulaga.

 

Na taua e Sanitoa e faapea, e mafua ona ia fesiligia lenei mataupu, o lea ua toe 4 masina o lo o totoe ona mae’a loa lea o lenei nofoaiga, ae o le popolega o lo o i ai, poo ai o le a toe totogia lenei tupe tele pe afai ae tula’i mai se faaletonu e pei ona tula’i mai i le $500,000 lea na ave i le Fono, lea ua uma ona toe faatonu e le Ofisa o le Tupe a le malo tele le malo ina ia toe totogi atu tupe ia.

 

Na faamanino atili e Sanitoa e faapea, e i ai le taimi e faia ai suega tusi mo le fa’aaogaina o nei tupe, ma, afai ae tuuina mai le ripoti a le Suetusi ma fautuaina ai le toe totogi o nei tupe ona e le o talafeagai ma le tulafono na mafua ai ona aumai tupe, lona uiga o le a pagatia le isi nofoaiga fou o loo mulimuli mai i le tau sailiina o se vaega tupe mai tupe lotoifale a tagata totogi lafoga e toe totogi ai lenei tupe.

 

Na saunoa Sanitoa e faapea, e le iloa poo le a le fesootaiga o le $2 miliona lea e fa’atupe ai le tatalaina i lalo o le fale a le Fale Faamasino ma puipuiga o le faama’i o le COVID-19.

 

“I lo’u lava taofi na o a’u, e matua le talafeagai lava nei galuega ua faaaoga i ai e le malo tupe ma le mafua’aga autu na ala ai ona faamanuiaina Amerika Samoa i nei vaega tupe,” o le saunoaga lea a Sanitoa. 

 

Saunoa atili Sanitoa e faapea, sa ia fesiligia le Teutupe a le malo i le 2 vaiaso talu ai e faatatau i lenei mataupu, o lana saunoaga i luma o le Komiti o le Tupe Faasoasoa a le Maota o Sui, o galuega uma nei e fesoota’i ma gaioiga mo puipuiga o le faama’i o le COVID-19.

 

Na fesiligia e le Komiti le Faatonusili o le Ofisa o le Medicaid ia King Young, pe i ai se isi vaega tupe mai lona Ofisa e faatupe i se isi malaga a le va’alele mo le auina atu o gasegase i fafo mo togafitiga. Saunoa King Young, e le o i ai se tupe lotoifale e faafetaui ai le tupe feterale o loo i ai, e pei ona moomia i lalo o le tulafono.

 

Saunoa atili King Young e faapea, mai le $84 miliona o tupe feterale na tuuina mai mo Amerika Samoa i le tausaga na te’a nei, e $30 miliona le tupe lotoifale e tatau ona saili mai e Amerika Samoa e faafetaui ai lenei tupe, ona fa’atoa mafai lea ona fa’aaoga mo manaoga i totonu o le teritori.

 

I le iloiloga sa faia i le 2 vaiaso talu ai, na fesiligia ai e Senatoa le Teutupe a le malo ia Ueligitone Tonumaipea i le mafua’aga ua le tuuina mai ai i luma o le Fono Faitulafono tupe fesoasoani mai le Feterale lea ua faamanuiaina ai Amerika Samoa i lenei vaitaimi o le fa’ama’i o le COVID-19. 

 

E tusa ai o le ripoti na tuuina atu i luma o le Komiti o le Tupe Faasoasoa a le Maota o Sui, na taua ai le aofa’i o tupe fesoasoani mo Amerika Samoa e $146.6 miliona. O lenei vaega tupe ua mae’a ona tufatufa atu i matagaluega ma Ofisa tumaoti o le malo mole fa’aaogaina e faatupe ai galuega mo le puipuiga o le atunu’u mai le faama’i o le COVID-19.

 

Saunoa Sanitoa i le iloiloga lea, o loo manino le Tulafono tau Paketi a le malo, soo se tuope fou lava e ulufale mai i totonu o le faigamalo, e tatau ona tuuina atu i luma o le Fono Faitulafono e pasia ma faasoasoa mai ai lona fa’aaogaina, ae le o le nonofo lava o le malo ma fa’asoasoa i la latou lava pule.

 

Saunoa atili Sanitoa e faapea, ana faamalie e le faigamalo le tulafono ma aumai tupe fou nei i luma o le Fono mo lona faasoasoaina, e le toe tau fesiligia e le Fono atina’e ma galuega tetele ua faataunu’uina, ae ua mafua ona fesiligia nei galuega ma nei vaega tupe tetele, ona e le o malamalama le Fono Faitulaafono.

 

I le ripoti lea na tauaao atu i le Fono Faitulafono, o loo manino mai ai le aofaiga o le tupe e $35.1 miliona mai le CARE Act e fesoasoani ai mo le faatinoina o galuega puipui mo Amerika Samoa.

 

O lea vaega tupe o loo aofia ai tupe sa totogi atu mo fale talimalo na fa’aaoga e nonofo ai tagata mai fafo na malaga mai i le atunu’u i le aofa’i e $136,000 mo potu e 44 sa fa’aaoga i le masina o Iuni ma Iulai, ae $11,578 na totogi mo potu e 22 na fa’aaoga mo lemasina o Aperila.

 

O le isi vaega tupe na totogi ai malaga a le va’alele mo Manu’a i le aofa’i e $147.240, ma le $10,467 na totogi e le malo mo le umi na nofo ai le Pailate i le falema’i o le Tradewinds.