Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

32 FANAU A’OGA FAAU’U MAI MANUMALO ACADEMY VASEGA 8 - ME 27

 

O le taeao ananafi na ala usu matua ma aiga o fanau pele ua faamae’a nei latou a’oa’oga tulaga muamua mai le a’oga a le Manumalo Academy i Malaeimi, ma ua faitaulia e to’a 32 i latou ua fa’au’u ma tusi pasi mai le vasega 8.

 

O i latou nei ua tele fo’i a latou matati’a ua mae’a fa’atutuina i le latou taumafai i a’oa’oga tulaga muamua i le teritori o Amerika Samoa ma ua fa’aeaina ai fo’i le Laumua o le Manumalo Academu, Laumua o le Malamalama.

 

Ua a’ailoa mai o le tauvaga i le Numera i le teritori, ua maua uma lava e le fanau mai lenei vasega le tulaga muamua, lua ma le tulaga tolu i le teritori o Amerika Samoa. O i latou nei ua fa’amauina le tulaga muamua o Jamal Fono Tauese, tulaga lua o Chang Yu Tang ma le tulaga tolu o Katelyn De Lara.

 

I le sauniga sa fa’atautaia mo le fa’amoemoe o le fanau fa’au’u o lenei tausaga, sa tutula’i ai le susuga le Faife’au Pr Aumua Semurana Temese o le faife’au fesoasoani a le Manumalo Baptist mo le tatala amata o le sauniga pa’ia ma soso’o ai ma le vi’iga o le Atua ma fa’agasolo ai le polokalama o le Tutu fa’aaloalo mo Tagavai a le Malo tele ma le tatou nei malo fa’ateritori o Amerika Samoa. 

 

O le tautoga sa faatino e le vasega i le latou tula’i fa’aaloalo, ma soso’o ai loa ma le tolaulauina o i latou ua agava’a mo fa’ailoga  fa’apitoa a le Manumalo Academy, fa’apea ma sui totino o le Level 8 ua ausia le Togisilia, Tulaga lua ma le Tulaga tolu o le vasega fa’aiuaso.

 

O fa’ailoga sa saunia mo le Taitai sili ona mata’alia o lenei tausaga a’oga ua mauaina lea e le tamaitai o Kimberly Lagaseu. O le fa’ailoga fo’i o le Amio Lelei,  ua taua’aoina lea i le sui ua agava’a ai, Kalelyn De Lara.

 

Mai le vasega fa’aiuaso 2021 o le ua maua le togisilia i mataupu ma ua ausia le GPA e 4.0 ua mauaina lea e Katelaynne De Lara, o le ua soso’o ai lna GPA 3.96 ua maua lea e Johnny Siliva ma le sui ua ausia le GPA e 3.95o Renee Dunson.

 

O le pese na soso’o ai ma sa usuina lea e le fanau fa’au’u, “SOAR High” poo le “Lele Maualuga!”

 

O le tufatufaga o Tusi pasi o le fanau sa vala’auina ai le afioga Leota Wanda Ala Papali’i Alofa na te taua’aoina tusi o le fanau. Ma sa tuu avanoa fo’i i lea lava taimi e fa’aulaina ai i latou e nai o latou matua ma aiga, ina ua mae’a taua’aoina latou tusi pasi.

 

O le vi’iga o le Atua na fa’amae’a ai le polokalama ona tuu lea o le avanoa i le afioga Papali’i Lauli’i Alofa mo lana saunoaga o le Taitaifono o le Komiti Fa’afoe ma o le Fa’atonu fo’i o le Manumalo Academy. “Ia avea a’u ma sui o le Komiti Fa’afoe ma le Pulega fo’i o le Laumua o le Manumalo Academy e avatu ai le malo ma le fa’afetai tele ia te outou matua o le fanau o lo’o a’oa’oina i lenei A’oga. Pe ana leai la outou lagolago mai ia i matou le aufaigaluega i lenei a’oga, le vasega o le pulega fa’apea le mamalu o faia’oga ma e uma ua tofu tiute mo le aoaoga ma le saogalemu o le fanau aoga, e tatou lava ona matou avatu le fa’afetai tele ia te outou.”

 

Sa saunoa o ia e tusa ai ma lu’iga o le galuega i lenei tausaga ua mae’a, “E leai lava se galuega e sao ma ni lape, e leai  fo’i se faiva e asa ma se maumau, ae fa’afetai ai ia te outou matua, ae maise fo’i o le Ekalesia Manumalo Baptist i lo outou onosa’i ma le alofa faitama e malu ai le aufaigaluega atoa i ni fitaotuga o le galuega a’oa’o o le fanau.”

 

“Sa matou faia lava le galuega i le mea e gata ai le iloa ma le mafai a le tagata fa’atauva’a. Ia te outou le vasega o faia’oga, fa’afetai mo lo outou faiva alofilima ma le onosa’i e a’oa’o. Lea ua fua mai nisi o mea lelei i lenei tausaga, a lea ua pale le Laumua lenei i le tulaga muamua lua ma le tolu i le tauvaga numera a le teritori atoa o Amerika Samoa.”

 

“E moni ai upu o le Salamo a Tavita, Fa’auta o le fanau o le tofi lea mai le Alii, ao le fanau ua fanau mai, o le taui lea mai le Atua.” “O le fanau o le taui lea o a outou galuega lelei mai le Atua, A lelei ona tatou a’oa’o i latou, e fa’apea fo’i ona fua tele mai i latou i fua lelei ma fua e fiafia ai i tatou.” O ana toe upu ia, ona usuina lea o le vi’iga o “Lota Nuu” na ou fanau ai, ma le tatalo fa’ai’u o le fa’amoemoe maualuga o le fanau ma aiga i le Laumua o le Flames i Manumalo Academy.

 

VAIASO FA’APITOA FA’ATAUA AI TAMA & TINA MATUTUA I LE TERITORI - TAOA:

 

Ua fa’agasolo pea lava le vaiaso e fa’ataua Tama ma Tina matutua o le atunuu, ma ua iloga mai fo’i le matagofie o latou taumafaiga i lenei vaiaso ina ia fa’aosofia le naunau o le mamalu o le atunuu e fia faatasi atu e fa’amanatu fa’atasi lo latou vaiaso ma i latou.

 

Ua le “fua tasi le manu ia tasi,” ae ua vala’auina tama ma tina matutua uma o le atunuu ina ia fa’atasi mai. O le aso Gafua sa faia ai le latou talotaloga fa’apitoa mo le faatalofa ma sa va’aia ai i latou uma ua faataua lea fa’amoemoe i le Malae o Siugaula i Utulei. O le fa’amoemoe amata lena e mafai ai ona latou fa’amautuina lo latou fa’amoemoe mo le vaiaso atoa. Ona soso’o lea ma le aso Lua sa faia ai le latou aso ma le Matagaluega o le Soifua Maloloina, ina ia tima’ia i latou i nisi o mea taua tau le tausiga o le latou soifua Maloloina. 

 

Ua faatasi ane le DOH Tobacco Diabetes Coalition mo a latou folasaga e fa’ailoa ma tima’ia ai pea i latou uma nei ina ia taofiofi mai le ulaula tapa’a a i latou ma le tele o gasegase fita e poia ai lo latou soifua ma’ale’ale i le vaitau ua tino matutua ai i latou.

 

“Afai e fia fa’aumiumi lava mafutaga ma fanau ma latou aiga, ia alofagia tausia lelei le soifua maloloina, va’aia lou suka ma le maualuga pe maulalo lou suka ina ia fa’aumiumi le soifua. To’aga e faia talavai, o le mo lou gasegase ua e maua tumau ai, ina ia fa’aumiumi mafutaga mamae ma pelega i tou aiga.” O nisi ia o timaiga mai sui totino o lea Koalisi sa fa’atasi ane. Sa fuaina fo’i le maualuga o latou toto, ma faia suega o latou suka mo le silafia lelei o le mea e ao ina fai i lea aso ma lea aso. 

 

Na oo ane fo’i le matagaluega o le DOH le vaega o lo’o faia tuiga o le Influenza, ma ua fa’ailoa ane, “E ese lava le tui puipuia o le Covid-19, ae aoga fo’i le tui latou mo le Flu, e puipuia mai ai i tatou i le maua vave i le Flu, ae a le togafitia vave le Flu, e oo ina Nimonia.”

 

Mo le tulaga o tui puipuia o le Covid, o i latou uma lava ua mae’a i ai mo lea fa’amoemoe i Utulei, ua fa’ailoa mai ua mae’a uma latou tui ta’ilua mo lea fa’ama’i fita. “Na matua asia lava le matou nofoaga fa’apitoa i Tafuna e le vasega o e faia nei tui mo le faia o matou tui puipuia, ma ina ua mae’a le tolu vaiaso ona toe oo atu fo’i lea o i latou mo matou tui puipuia lona lua.”

 

O se tala fiafia lea a se tasi o tina matua aua ua nofo sauni i latou mo le aso Tofi lea e faia ai le fa’aaliga o fua o latou fa’ato’aga, ma mea’ai poo tausami Samoa ma isi lava e fia avane mo le Fa’aaliga o Fua o Fa’aeleeleaga ma Mea Taumafa Samoa lea e faia i le latou Ofisa Tutotonu i le Paka Liona.

 

O le aso ua fa’atasia uma ai i latou mo le tufatufaina o fa’ailoga fa’apitoa ua tapena i ai sosaiete eseese, le Malo faapea le Matagaluega o Tautua eseese mo Tagata Matutua uma o le atunuu.

 

O le a faia ai ma le latou fiafia e pei ona sami ai a latou vaiaso fa’apitoa i tausaga ta’itasi. O le a lautogia ai le sui pito i matua lava i totonu o le malo atoa, ae maise o le a faia ai isi faailgoa mo le sui o lo’o ua matua lava ae o lo’o faigaluega pea. O nisi o nei fa’ailoga o le a taua’aoina mo le sui ua iloga lana auaunaga i totonu o le atunuu ma ua tele naua tausaga o tautua pea.

 

LAUTOGIA ENS KALALA L. JENNINGS FA’AILOGA USNAVY - AUVA’A USS TRUXTUM 

 

O le tamaitai Lauli’i, na soifua a’e i Lauli’i, ma a’oa’oina i Lauli’i, ma sa matua auai i le A’oga Aso Sa, A’oga Samoa a le Faifeau EFKAS i Laulii, auai i le Aufaipese a le EFKAS, toe avea o le totino o le Autalavou a le EFKAS, peita’i sa fa’amanuia le Atua i a’oa’oga sa ia savalia mai. Tulaga togisilia mai le Level 8 Lauli’i Elementary, maua e ia le avanoa e avea ai sui o le Elementary e tauva ai i le Tauvaga a le Iunaite Setete o Amerika i le Spelling Bee i lona tausaga lava lea ina ua siamupini i le tauvaga sipela fa’aperetania.

 

Na fa’amanuia atili le Atua i lona soifua a’oa’oina i Fagaitua High ina ua mae’a le aa’oga tulaga muamua i Lauli’i, ma ua ausia le Togisilia o lana vasega fa’aiuaso. Ua maua ai ma le avanoa e malaga atu ai e ulufale i le USNaval Academy, lea ua fa’ai’u ma le manuia nei lona 4 tausaga, fa’afetai ua ia mauaina le fa’ailoga o le ENS.

 

O lea ua toe atofa e malaga i le va’a o le USS Truxtum, o le aso o lo ua fa’au’u mai ai ma lona tulaga tofi ENS a le USNavy ma amata ai lana galuega i luga o le va’atau tele o le Fuava’a a le malo tele ae fa’amautu i Norfolk i Virginia.

 

O ona matua o le susuga le Sui Fa’atonu o le matagaluega o a’oga, Fatuletoga Philo Jennings ma le faletua o Epenesa Te’o Jennings o Lauli’i, Amerika Samoa.