Ads by Google Ads by Google

Tala I Vaifanua


O se vaaiga i le tama'ita'i ua lauiloa i le Bluesky, Sherry Sele, ma o lo'o ia fofola le polokalama fa'atautaia o le taeao matagofie o le maimoaga a le fanau i le Nofoaga o Masini Feso'ota'i fa'atekonolosi a le Bluesky i Iliili. [ata: Leua Aiono Frost]

ASIASI PACIFIC ISLAND FOUNDATION - NOFOAGA GALUEGA BLUE SKY

 

O le toe ta lava a le Pacific Island Foundation ina ia maua'a a'oa'oga fa'atekonolosi sa aoa'oina ai le fanau iti ua taumafai nei e tauva i a latou galuega fa'atino e fa'aaogaina ai komipiuta e pu'e ai latou ata fa'asolo pupu'u e tauva ai i le Fa'asamoa Initiative a Troy & Thoedora Polamalu 2018, na o'o atu ai e maimoa i le nofoaga o masini feso'ota'i fa'atekonolosi fou i Iliili a le Bluesky.

 

"O lo outou va'ai i nei masini ma latou faiva ua fa'atino i taimi uma e le malolo ai, o lo outou malamalama lea i le faigata ona outou maua feso'ota'iga fa'aonaponei lea ua matele ina outou fiafia i ai, peita'i e le'i a'oa'oina lelei ai,” o se tala lea a le susuga Ethan Lake, o le Pacific Island Foundation, i lana tautalaga amata i le fanau ma latou malo fa'aaloalogia na auai.

 

I le asiasiga i lea nofoaga a le Bluesky, o se fa'amanuiaga mo le fanauiti, a'o se avanoa lelei fo'i o le Bluesky e fofola mai ai a latou fuafuaga i le fanau, ina ia maua'a lo latou naunau e fia galulue i nei fo'i ituaiga o galuega.

 

Ua le na'o fanau sa auaina atu, ae na auai ma susuga i ali'i na malaga fa'apitoa mai fafo, le ali'i pese o John Payne, Margot Bingham ma Andrew & Delhia Stein lea e ona le Orphan Starfish Foundation lea sa latou fa'atupea atoa le fa'atauina o Masini Komipiuta mo le Pacific Islands Foundation ina ia mafai ona latou pu'ea latou ata faasolo pupu'u mo le tauvaga pese ma ata faatino a le Fa'asamoa Initiative Arts Festival a le ali'i lauiloa o Troy & Theodora Polamalu i lenei tausaga.

 

O le tauvaga na faia i le afiafi o le aso Toanai ua te’a, ma sa aotelega i ai le mamalu o i latou na fa'atau a latou pepa ulufale ma laulau e nonofo lelei ma maimoa ai. O le a maua i le lomiga o le aso a taeao, le tala'aga o i latou ua maua le fa'amanuiaga, lea e malaga i Niu Ioka mo le fa'aaliga lea a le a le ali'i o Tony Black.

 

Ua le auai mai Black ma Troy Polamalu i le fa'atasiga lea i le Lotoa o Masini a le Bluesky ona o tulaga fa'aletonu o feoa'iga i le va o Hawaii ma Amerika Samoa nei. Ua malaga mai pea i la'ua ma ua uia mai le alava'a i Niu Sila, sau ai i Samoa ma o'o mai ai i le teritori.

 

Ua fa'ato'a maua le avanoa o Polamalu ma Black e maimoaina ai le Festival i le afiafi o le aso Toanai ua te’a i le Fale Laumei i Utulei.

 

"UILAOLESAMI" MAFULIFAO I LE VASA - TOE PIKI MAI E LE MV SILI

 

Ua mafai nei ona toe fa'ataliaga le "Uilaolesami" le tama'i va'a a le Port Administration lea e la'u ai uta ma pasese mai le MV Sili po'o le Manu'atele i le Uafu i Ta'u, ina ua taula mai le MV Sili i le aso Faraile na te'a nei.

 

Na fa'ailoa e se tasi o le auva'a i le Samoa News, "Na fuli fao le Uilaolesami i le vasa i le matou malaga aga'i atu i Manu'a, peita'i na le mafai ona faia se gaoioiga i luga o le vasa i lena taimi, ona tu'u ai loa lea i le vasa e fa'aopeopea ai ae matou o e fa'ao'o pea uta i Manu'a. O le matou toe fo'i mai Manu'a lea na fa'ato'a toe toso mai ai loa ma ua fa'ato'a fa'ataliaga ai iinei."

 

E tusa ma le itula e 12:00 ae ua mae'a toe fa'asagatonu le "Uilaolasami" ma ua galulue fo'i ali'iva'a e fufulu, ma va'ai toto'a po'o a mea ua fa'aleagaina ona sa toso mai lava a'o fao.

 

E tusa lava ma le fa'amatalaga a lea ali'iva'a sa ia fa'ailoa ai, "Ua fa'aletonu le tama'i fale o le va'a, ae o isi mea uma lava o lo'o lelei, aua o le va'a apa fo'i, e leai fo'i se afi e tu'uina i le va'a lea pe a o'o ina taumafai e ave i Manu'a e la'u ai uta."

 

O le fa'afetai, e le o afaina se soifua o se tasi ao taumafai e toe saili lea va'a i le moana sausau.

 

MAE'A TOLAUAPI A LE TAUSAGI - DYWA, ASEPA, DOE & NPAS

 

E silia i le 60 fanau na auai i le Tolauapi Fa'aletausaga a le Le Tausagi lea sa fa'ataunu'uina i le Fale Ta'alo i Pago Pago po'o le Ofisa Autu o le Matagaluega o Tina ma Tupulaga Talavou. I le vaitau fo'i lenei i le tausaga ua te'a sa auai ai fo'i nisi o lenei vasega o fanau i lea lava Tolauapi.

 

Na auau fa'atasi nisi o Matagaluega a le Malo i lenei taumafaiga a Le Tausagi. O i latou masani o le ASEPA, lea sa matua momoe ma fa'atasi atu nei tina ina ia fa'atasi ma le fanau, fa'ataunu'u polokalama uma ua mae'a fa'ataotooto mo lea fa'amoemoe, ae maise o le va'aiga toto'a o fanau talavou.

 

O le ulua'i aso, i le aso Lulu i le taeao lava, o le aso lea sa atofaina e le polokalama fa'ataoto e faia uma ai a'oa'oga tatau mo le fanau, ia latou iloa lelei lo latou Siosiomaga.

 

E le gata i lea, ae ua faamatala ma fa'apupula atili i le fanau, a'afiaga o le Siomaga o i ai nei ona o tulaga o fa'alapisi, tulaga o fesuia'iga tuga o le tau, ae maise fo'i o le so'ona fagotaina o ogasami, ma isi fo'i afaina fa'anatura e i ai le Alamea e aina le tele o amu ola o le alititai ma a'au.

 

Ua fa'amatala fo'i i le fanau le tele o ala ua mafai ona taumafai mai le Malo tele ina ia toe fa'aleleia nei fa'aletonu o a'afia ai le tatou gataifale.

 

Ona o lea fa'ato'a mae'a atu le fonotaga a le US Coral Reefi Task Force i le teritori, o lea sa latou talanoa ai ma avatu i le fanau le tele o ala o lo'o ua fa'atupeina e vaega eseese o le fetarale ina ia va'aia toto'a tatou amu ma a'au e le malo tele i a latou polokalama fa'atautaia mo le gataifale. O le isi itu o le so'ona fagota, lea la ua galuea'ina ai vaega o tatou ogasami e fa'asao e le fagotaina mo se vaitau, ae a mae'a lea fa'asa ona tatala lea e fagota ai le paia o aiga, mo latou fofoga taumafa.

 

O le otaota ma le fa'alapisi i luga o le laueleele i tuamaota ma tafafale, ua fa'ailoa mai, o ala ia e maua ai le tele o le Lapisi fa'apea e ofaga atu i le gataifale, aua e le'i to'a'aga tagata uma e lafoa'i lapisi i kalone mo le la'u ese atu ai, nai lo le tatafe aga'i atu ma fa'afaula'i mai i le sami po'o le gataifale.

 

Ina ua mae'a nei a'oa'oga aoga i le ulua'i aso, na faia loa ata tifaga a le fanau e masani ona fa'afiafiaina ai i latou i fe'au taua e tima'ia ai i latou mai nei ata tifaga.

 

Sa alu foi le asiasiga i nofoaga fa'apitoa nei: National Park Service i Pago Pago i le latou Ofisa Autu, soso'o lea ma le asiga i le Scrap Metal a le Royal Trucking; soso'o lea ma le Asiasiga i le ASCC Land Grant lea e totoina ai fa'atoaga ma tausia lafumanu.

 

Na tomuli le latou asiasiga i le NMS Tauese Pita Sunia Center i Utulei.

 

O le toe aso na fa'ataunu'u ai loa le toe siakiga o le fanau, poo le a se mea ua latou maua mai lea fa'atasiga aoga. O latou fa'atalanoaga sa faia i luga o le KVZK-TV.