Ads by Google Ads by Google

Tala I Vaifanua


[ata: SN]

Pago Pago, AMERIKA SAMOA

 

FAAFETAIA KOVANA TAUTUA A TAGATA FAIGALUEGA UMA I AMERIKA SAMOA

 

Mai le agaga o le fa’afetai i lenei tausaga atoa i le fa’atinoga o tiute eseese ua mae’a fa’atino e le lautele o tagata faigaluega uma a le Malo, ae maise fo’i o pisinisi ma kamupani tumaoti i le atunuu, ua faafetaia ai e le ta’ita’i o le tatou Malo le aufaigaluega uma lava, mai tofiga maualuluga fa’ataita’i seia oo i tofiga eseese o loo tautua ai i latou uma.

 

O lenei le aso malolo faapitoa mo aufaigaluega a le Malo, peita’i ua le fa’atinoa ai le aso faaitoa e Masani ona fa’atasia uma ai I le aufalgaluega a le malo ma latou fiafia fa’atasi.

 

“E mautinoa lava, so’o se tagata faigaluega fiafia, mata’alia ma e fiafia e fa’atino ona tiute ona ua mautu lona avanoa faigaluega, e mafai ona fa’atinoa tiute uma ma le fa’amaoni. Ua le na’o tagata faigaluega a le Malo ua o’o i ai lea tulaga, ae ua fa’apea fo’i ma tagata faigaluega a pisinisi ma kamupani tumaoti i le atunuu.”

 

“Talu mai le fitu tausaga ua tuana’i nei ua mafai ona fa’atautaia le tatou Malo e ala i le auaunaga a tagata faigaluega uma lava a le tatou Malo i ana tautua eseese, ua fa’amalieina foi le to’atele, peita’i e i ai lava lape i so’o se auaunaga. Peita’i o le aga’i i luma o le auaunaga ma ala e fa’atino ai mo ona tagata lautele, e fa’amoemoe tele lea i le fa’atinoga a’ia’i o tiute o tagata uma o faigaluega i le Malo. Ua le tatau lava ona fa’amoemoe le fa’atinoga o nei tiute uma i le itiiti po’o le tele o le taui o lo’o tuuina atu mol au auaunaga.”

 

Sa ia fa’ailoa atu fo’i lona faanoanoaga pe afai o i ai se tasi o le aufaigaluega a le Malo o lo’o lagona le o’otia ona o a’afiaga o le Covid-19 ua mafua ai ona vaea ma fa’aitiitia avanoa e faigaluega ai ma sailia pea le tamaoaiga tausi mo latou aiga.”

 

E ese mai nei mea uma, ae ua fa’anoanoa fo’i le ta’ita’iga o le faigamalo ona  o loo ua a’afia le fa’atinoga o le tatou aso malolo fa’apitoa mo le aufaigaluega uma a le atunuu ona o le Covd-19.

 

“Ia manuia le aso Malolo mo i tatou uma o tagata faigaluega, ma ia fiafia ae ia matua fa’autauta lava, ia tausia pea le va fealoa’i ma ia fa’aiu ane le aso malolo i le manuia o tagata uma.”

 

FA’AMALAMALAMA MAI TAGATA FAIGALUEGA FOU A LE MATAGALUEGA O A’OGA:

 

Ua toatele i latou ua mae’a feoa’i ma pepa ua fa’amaonia ai ua mae’a fa’afaigaluega e le matagaluega o a’oga, peita’i ua toe fa’ailoa mai ia i latou, e le amata se’ia mae’a ona toe fa’atulaga mai e le matagaluega o tagata faigaluega a le malo. 

 

Peita’i, ua iloga ua fa’atuai ona amata faigaluega nisi o i latou ae toe taumafai ona fa’atautaia latou kilia faigaluega ia mae’a lelei.

 

Ua fa’ailoa mai e le tamaitai fa’atonusili o A’oga, Dr Ruth Matagi-Tofiga, o le vaega tupe na maua mai le CARES Act ua mafai ai e le Matagaluega ona fa’afaigaluegaina nisi e fesoasoani i faia’oga e faamamaina le potu a’oga ma falea’oga uma ina ia le pesia nisi o le fanau a’oga i le fa’ama’I pipisi, pe a o’o ina lutia le atunuu i le Covid-19. Ua fa’atulaga le isi vaega no tagata faigaluega ia e fesoasoani i faia’oga ia fa’avalavala le nofoaga o fanau i totonu o potu a’oga.

 

I le vasega o faia’oga, ua taua’aoina ia i latou galuega e le tatau ona faia e le vasega o e ua fa’afaigaluega e fesoasoani ia i latou i potu aoga.”Ua fa’ailoa mai ia i matou e le mafai ona faia e i latou nei se lesona a le fanau a’oga. E na’o le nofonofo lava i latou nei e latou te le faia lesona pe ta’ia’ia fo’i aoga a le fanau i potu a’oga. E le mafai fo’i ona latou togia ni pepa o mea a’oga a le fanau. Pau lava se mea e mafai ona latou faia o le fa’atautaia le tatalo ma pese a le fanau i nisi taimi ma ia to’aga latou e fa’amama mea uma i totonu o potu aoga mo le fanau ma faia’oga fo’i.”

 

Lea la ua mafai nei ona faigaluega nisi, ua fa’agasolo pea le faiga o kilia ina ia mafai ona faigaluega nisi, ina ia maua le 100 o i latou o le a fa’afaigaluega mo nei tofiga fou.

 

Peita’i, ua le fa’ailoa maia, pe mata o le a le umi ole a mafai ona fa’afaigaluegaina ai i latou nei, aua o le a muta fo’i le faatupega mo lea alagamanuia. Peita’i ua fa’ailoa mai e nisi o i latou ua maua ai galuega, “Ua fa’ailoa mai e i le va o le 3 masina ma le 6 masina e matou te faigaluega ona toe fa’ailoa mai lea o se isi fa’aiuga o le a faia mo i matou.”

 

TUUMALO SE TASI O TUSIUPU, FAILAUGA & TAMA O LE AIGA – AEOAINUU TOOTOO ALEKI TUALA TAMAALELAGI:

 

O le aso Faraile na te’a nei sa fa’atautaia ai le toe sauniga o le maliu o le susuga le Aeoainuu a le Malietoa Tootoo Aleki Tuala Tamaalelagi Sosene Feagai i lana Ekalesia sa tautua ai i lona tofi Faife’au Fesoasoani i Lauli’i, Amerika Samoa. Na tu’ua e ia le mafutaga ma le fanau a’o i ai o ia i Hawaii ia Iuni 27, 2020. Peita’i na taumafai mai lona Sa i fanua nei mo ona toe sauniga ma lagomau ai i lona aiga i Lauli’i. 

 

Na soifua ae o ia i le Falema’i i Poutasi Falealili ia Tesema 04, 1943 i ona matua o Tuala Tamaalelagi Dr Ipuauro Soseen Feagai ma lona tina o Fa’alagilagi Isabella Lutu Forsythe o Lufilufi, Samoa ma Lauli’I ma Fagatogo.

 

Fa’aipoipo atu o ia I le tina o Elisapeta  Tuala Tamaalelagi ia Iuni 15, 1977. E to’a lima ona tuafafine ma ona uso e to’atolu. 

 

I ana aoaoga ua fa’ailoa ai le mae’a o ana a’oga i le Kolisi o Samoa ma ulufale atu i le Waitaki Boy’s College i Niu Sila, ma ulufale atu ai i le Iunivesite o  Victoria i Niu Sila fo’i ae faaiu mai ai i nisi ana kosi na tauavea lea i Amerika Samoa Community College.

 

I ana galuega sa galue ai i Amerika Samoa i lona to’ai taunuu mai i le tausaga 1974 ma amata ai lona olaga inau a mae’a mai ana a’oga mai Niu Sila. Na avea o ia ma tusitala i le Nusipepa a le Samoa News, ma sa i ai fo’i taimi na avea ai o ia ma fofoga o le Leito fa’asalalau i le tatou nei malo. 

 

Sa avea fo’i o ia ma sa avea o se tasi e faufautua i le Polokalama o le gagana Samoa e fa’asalalauina atu i fa’asalalauga a le Leitio. Na galue o ia e avea ma Peresetene o le Amosa i lona taumafai ai e fa’atula’ia i Amerika Samoa.

 

Sa avea fo’i ma fa’auluuluga o le Kosi Tau le Faigamalo Fa’ateritori o Amerika Samoa i le Kolisi Tuufa’atasi o Amerika Samoa.

 

Sa tautua fo’i o le faiaoga i kosi o lo’o tauavea ai le Gagana Samoa fa’apea ma Agaifanua a Samoa i le tatou Kolisi Tuufa’atasi.

 

O lona tofi foi na tautua ai i lona Atua sa amata mai lava i le laua tautua ma le faletua ma le fanau i le tofiga tiakono. Peita’i, e maliu nei o ia, ua mae’a avea o ia ma Faife’au Fesoasoani o le Ekalesia Fa’apotopotoga Kerisiano i Amerika Samoa i Lauli’i.

 

O se tasi o ana taleni ua molimauina o le avea lea ma fatu pese Samoa, peita’I ua lisia fo’I o ia i le tofi o le tusitala, e le gata inau a mae’a lelei lana tusi sa tusia I le gagana Samoa, “Ati ma Lona Fa’amanuiaga.”

 

O lana tusi lea sa manatu o ia e mafai ona fa’atauina e le Matagaluega o Aoga, peita’i e le’i taulau lena fa’amoemoe. Ua lisia foi e le fanau nisi o ana fatuga ua mae’a tusia ma fatu, ma ua Masani ona fa’alogoina o pesepese ai le to’atele.

 

Mai molimau sa fa’afofogaina i lona toe sauniga, sa tutula’i ai le afioga le Faipule o Amerika Samoa  i le Konekeresi Tali Aumua Amata  ma ia fa’ailoa fo’I nisi o mea ua ia fia fa’ailoa atu e tusa o le la’ua sootaga ma le susuga Aeoainuu Tootoo.

 

“E! ua maliliu Toa, ua maumau ai Au’upega o le Taua!”

 

O le taua lea, o le taua o le gagana Samoa, o le taua o le aganuu a Samoa, o le taua o le faiva o tusiupu, ma o le taua o le alofa fa’amaoni i le tofi o Samoa, ina ne’i mou atu i le fa’alogo, i le va’ai, ae maise mai le loto. 

 

O lana toe tima’i, “Aumua, ia u’u mau i le I’umaea o le agaga o le tagata Samoa moni. Aua ne’i galo ia te oe lou faiva, ia e seu le manu, ae taga’i i le galu. Le atunu’u pele lele, e tapua’ia ou faiva i le Laumua o loo tafili ai le na, i tai loloto  fa’aupufai o malo fa’asetete ma teritori o le Malo tele o Amerika. Ia manuia ou faiva!”

 

“E moni a le Upu, o suli tamaitai o Samoa, o I’omata o aloali’i o le atunuu, ua e teu ua matua teu, ua e fa’a’ula fo’i ua matua manogi ma matagofie. Fa’afetai manatu  mai.”

 

E le tau fa’amatala le sosia o le tofa tau le vagana fetalai sa o’a ai le suli o le Tuala Tamaalelagi. Sa iloga i lona soifua fa’asoa ma le lafolafo ae tainane fo’i le tusitusi i gagana e lua, sa fa’aaogaina a’o tusitala i le tatou nusipepa o le Samoa News mai le taimi o le pulega a Jake ma Rowena King.

 

O i latou nei ma Magele Apelu Aitaoto, Eti Sa’aga, Palauni Tuiasosopo, Aleni Ripine ma Tootoo Aleki, o nisi sa pei o le Foueki a le  Manu Samoa na ulua’i tulaueleele ma sosofa le vaomatua iinei. Lele lava e malu le Aitu le Aoa o nei faiva, le tofa le Tootoo Fofo Iosefa Fiti Sunia, aua o tamaiti o le Samoa Kolei, po’o le Kolisi o Samoa, sa nafa ma le manulauti “Saili le Atamai e Tautua lou atunuu.”

 

“E Ua Malie Toa, Ua Malo Tau!” E le tau sulaina le Toga lelei! E le a’ua’u fo’i i sa’u upu, aua ua tofe itu o le susuga le Aeoainuu.

 

Le fanau, tau ina tu’ulima faiva o Tupu. Ia so’o le fau ma le fau. Ua iloga lo outou tausi matua, fa’amalo le tausi matua; aua e le’i umi atu ona malaga le tina, ae o lea ua tu’ua le malo e le susuga le Aeoainuu a le Malietoa.