Ads by Google Ads by Google

Tala I Vaifanua


Le susuga Opetaia ma le aufaigaluega a le Kamupani a Rey Mallori Construction i luga o le alatele lea ua oo mai i ai le latou fa’asologa o le suiga o paipa mo le Suavai Taumafa Mama a le ASPA. [ata: Leua Aiono Frost]

Pago Pago, AMERIKA SAMOA

 

FA’ATAOTO PAIPA SUAVAI MAI AOLOAU SE’IA PA’IA ALATELE I PAVAIAI

 

O le galuega ua va’aia le galulue ai o le aufaigaluega a Ray Mallori Construction i le alatele agai atu i Aoloau ma Aasu, ua latalata nei ina mae’a. O lea galuega ua fa’ailoa mai, o le suiga atoa o le paipa o le suavai mama mai paipa sima ma le u’amea sa iai, ae ua suia nei i paipa una po’o le PVC.

 

E tusa ai ma le fa’amatalaga a le ali’i ta’ita’i o le galuega lea, le Fomeni o Opetaia, “O le galuega ua leva ona fai mai, ona e tele na’ua fo’i le galuega mai lava i luga i Aoloau ma Aasu, e fa’asolo i aiga ta’itasi ua ta’ia le Suavai Taumafa i o latou maota ma laoa e fa’aaoga ai ituaiga paipa sima po’o le u’amea, ua suia atoa nei i le ituaiga paipa Una po’o le PVC lea e silafia ai e le to’atele.”

 

“Ua i ai nisi o lo’o manatu o le paipa lea o lo’o matou leia nei o le Paipa Sua po’o le Suavai Lafoa’I, e leai, o le paipa lea o le Suavai Taumafa Mama.”

 

E tusa ai ma le fa’amatalaga a le ali’i fomeni, “O le galuega lenei, o lona tele lea ua mae’a nei, aua ua oo uma le PVC i aiga, o le galuega ia mautinoa o mama le suavai o lo’o auina atu mot agata uma e ala i tautua a le ASPA i lona vaega o le suavai taumafa mama. Peita’i ua manatu nisi o matou lea e elia le laina paipa o le suavaii lafoa’i, ae leai o le galuega ia mautinoa o mama le suavai taumafa mo lea vaega atoa o le atunuu.”

 

O le galuega na amata mai i luga i Aoloai ma Aasu ma aga’I mai ai i Tafeta, Mapusaga ma Pavaiai e oo loa i le laina tele o le suavai i le magatolu i le alatele aga’i i Leone, o iina e muta ai lea vaega o lo’o nafa ma le Ray Mallori Construction.

 

Ina ua fesiligia se taimi e tuga tele ai lea galuega, ae fa’ailoa mai e Opetaia, “O le taimi o timuga e leai se faigofie o le galuega lenei. E fai o le fa’asea mai o tagata i le Alatele lava latou, aua o lo’o manatu nisi o matou lea e tatau ona fa’asa’oa le tatafe mai o le suavai mai timuga mai luga o le mauga seia pa’ia lalo i Faleniu ma Pavaiai fo’i. A o le isi lea toe toso i tua i galuega uma e tau fa’aleleia ai le ta’ia atu o le suavai mama i aiga, ona o le tetele o timuga ma toe lolovaia uma ai autu o paipa o lo’o eli.”

 

Ua fa’ailoa mai o le pasi ane lava o nisi ta’avale ua laulauvavale atu tagata, ma le manatu o nei fo’ galuega o loo faia, o lo ua afua ai ona so’ona tatafe ma pupu ai le alatele, Peita’i, o se galuega alofa i lou soifua maloloina lea e taumafaia e nei tama o le atunuu. “Ua masani ai fo’i, ona o le le’i silafia fo’I e le mamalu lautele, ae o i ai lava aiga ua oo i ai le tautua, ua latou iloa lelei, e matua eseese lava mea e faia nei, ma le tatafe o vai mai luga i Aoloau ma Aasu ae selefutia ai afio’aga o lo’o fa’amautu mai i ai nei tafega.”

 

I le galuega ua fa’atonutonu lava e le Inisinia faigaluega a le Ray Mallori Construction, Roland, ina ia mautinoa fo’i afai e asia e le Inisinia a le ASPA le galuega, ua lelei ma pasia a’ia’i ai.

 

FA’ATULAGA ISI MALAGA VA’ALELE E LUA MAI SAMOA

 

Na fa’ailoa atu muamua ua mae’a malaga na fa’atulaga mo le aumaia o tatou tagata o lo’o opea i Samoa ona o le fa’asa, fa’atasi ai ma le taumafaiga ina ia aumaia ni si o tagata o i ai tomai ma agava’a i galuega o fa’atino i le tatou nei malo. ma ua saili ae ua le maua nisi i le tatou malo mo ia avanoa faigaluega.

 

Peita’i i le fonotaga mulimuli a le Kovana ma le Komiti Faafoe o le Covid-19 ua fa’ailoa ai, e lua isi malaga ua afuafua nei e aumaia ai le to’a 55 o tagata agava’a i galuega i le tatou nei malo. Peia’i i le lipoti na faailoa mai, ua amata ai malaga a va’alele mai Samoa ia Aukuso Muamua se’ia oo ia Aukuso 30, ae le o Aukuso 17 e pei ona sa tamau ai.

 

O lea ua fa’amauina ai le to’a 55 o tagata na malaga mai i lea masina i totonu o Amerika Samoa e uia ai va’alele a le Samoa Airways ma le Talofa Air.

 

Peita’i i le fonotaga i le aso Sa na te’a nei, ua toe fa’ailoa atu ai e Kovana Lolo Moliga e mana’omia lea isi lua malaga a va’alele e aumaia ai isi fo’I tagata faigaluega o lo’o mana’omia tele i galuega iinei.

 

Ua fa’ailoa mai e le ali’I fa’atonu o le Matagaluega o le Soifua Maloloina, Motusa Tuileama Nua, “Ua le mautinoa pe ua aumaia e le Kovana le aofaiga o i latou o manatu e aumaia e nei malaga e lua a va’alele mai Samoa. Ua mae’a fa’atagaina I latou nei e malaga mai e le Ofisa o le Loia Sili.”

 

TU’UMALO LE ALI’I VETERENI – UTAGAMAMAO TAISI STEFFANY

 

O le aso Faraile ua te’a na fa’atautaia ai le toe sauniga o le tuua le malo e le alii vetereni Utagamamao Taisi Alo Steffany i le malumalu Siona le Mauga Pa’ia i Leone EFKAS i le taeao. 

 

Ma sa fa’afofogaina ai le molimau a le tina o le aiga Laloasi M. Fa’amausili – Steffany ma ta’ita’i o Aiga na lua, ae maise o ali’i fa’afeagaiga sa ala atu ai lana tautua i lona Atua.

 

Sa amata ana a’oa’oga i le a’oga tulaga muamua a Leone Midkiff, soso’o ai ma le aoga maualuga i Leone ma aga’i atu i fafo ma fa’auma le aoga maualuga i Carson High, Kalefonia i le 1988. O le amata lea na ulufale i le USArmy ma atoa le 20 tausaga o lana lea tautua 1988 – 2008. Na maua fo’i lona fa’ailoga i AScience i le ITT Technical Institute sa ia sailia mai le 2008 – 2011.

 

E to’atele na’ua ai ana uo mamae ia i latou uma i fanau a Amerika Samoa ma Samoa sa tautua i le vaega au, ae maise i nisi fo’i o i latou um ana latou tautua fa’atasi mai isi setete uma o Amerika.

 

I lona soifuaga i lona aiga e to’afitu ona tuafafine ae to’alua ona uso, peita’i e to’a valu lana fanau. 

 

I le molimau a le tina i le aiga ia Lalolasi, “O ia o se tama e tumama, e le mana’o i se mea e fa’aletonu i totonu o le aiga, e fai mea mafai, e fai mea lelei, e ola tapenapena ia mae’a lelei mea e fa’atino. O ia o se tasi e fuafua mamao ana mea uma e fa’atino ina ia taunuu ma lelei. Peita’i, e le’i i ai se manatu o le taimi lenei o le a fa’apuupuuina ai le mafutaga mafana i le alofa ma le fa’amaoni.”

 

“O lona taimi fiafia o aso ta’itasi, ina ua ma’i nei, o le taimi ou te manava atu ai, aua o le taimi lea ou te tapenaina ai lana mea’ai. Peita’i i lona toe vaiaso na ia faatauina ai le afi moli mo le fale, sa ia fa’ailoa ai, lona ola tapenapena ina ia mautu le matou nonofo ai ma tamaiti pe a pe le paoa a le ASPA i le fale. O le fale foi o matou nonofo ai ma le fanau, sa ia fausia lava e ia, mai lona iloa e fausia se matou fale. O lo’u olaga atoa, ou te fa’afetaia ai le Atua, aua o ia lava sa ia fa’auia mai se tasi e alofa fa’amaoni ia te a’u ma le fanau.”

 

O Taisi o se alo e fa’asino ia Utagamamao Rudolf Alo Steffany ma Patosina Tuitau- Steffany ua maliliu uma i la’ua.