Ads by Google Ads by Google

Tala I Vaifanua


O nisi o ali’i ma tamaitai faia’oga fa’apea le susuga Danielle Mose o le Sui Pule Aoga i Fagaitua ua matua lava saunia mo le fa’amoemoe o le vasega fa’aiuaso i le aso Faraile na te’a nei. Malo le limalima i mea lelei. [ata: leua Aiono Frost]

O le vasega o fanau a’oga i le latoy NHS i Fagaitua High lea ua faatasi ma le tamaitai faia’oga o Tolu ina ia fesoasoaini i le fa’avasegaina o tipilioma i le taimi e taua’aoina ai i le fanau fa’au’u. Malo le galulue. [ata: Leua Aiono Frost]

Pago Pago, AMERIKA SAMOA - 

 

100 LE FANAU FA’AU’U MAI LE AOGA MAUALUGA A FAGAITUA - ASO FARAILE IUNI 19, 2020:

 

“O le Tofa Mamao e tapena ai le Lumana’i,” Le auau o le fa’amoemoe ua tuu atu nei le to’a 100 o le fanau fa’au’u mai Fagaitua e o ma i latou e avea ma latou ta’iala e tausaili ai latou taleni, e aoaoina ai ia galulue ai aua le lumana’i o latou olaga ma aoga ai i aiga pele ma  Amerika Samoa i le lumana’i.

 

O le polokalama na toe fesuia’i lava le fa’atulagaga ina ua va’aia ua suia le tau i le taeao a’ena o le aso Faraile talu ai, ma ua le fa’aaogaina ai taavale e fela’ua’i ai le fanau fa’au’u mo le tufatufaga o latou fa’ailoga Tipiloma, ae ua faia loa le sauniga i le latou faleta’alo, e pei ona fa’atulaga ai le fuafuaga fa’ataoto i tau ma aso fa’apenei.

 

Na amata le fa’amoemoe i le tatalo na sii’tia e le susuga le taitai na tofia, ma tatalo fa’atasi ai le tatalo a le Ali’i e le mamalu uma na sasao, o le vasega fa’aiuaso i totonu o le faleta’alo ma matua i nofoaga i le falesamoa i fafo mai o le faleta’alo.

 

Na fa’alauiloa mai e ala i le ata fa’asolo na pu’eina le taliaina aloaia e le tamaitai fa’atonusili o aoga o le vasega e to’a 100 a le Vikings i lenei tausaga, ua pasia ma ua agava’a i o latou fa’ailoga Ti[piloma.

 

Ina ua maea sa tolaulauina loa le tusi fa’amanuia mai le afioga le Kovana Sili Lolo Moliga mo le vasega fa’aiuaso i Fagaitua, lea ua tomuli i ai fa’au’uga o lenei tausaga i a’oga a le Malo.

 

O pese ma vi’iga sa usuina lava lea e le fanau fa’au’u ma sa iloga fo’i le matagofie o le latou tapenaga mo lea fa’amoemoe, e ui ina ua suia atoa le faiga o fa’au’uga ona o le Coronavirus i lenei tausaga.

 

O malo vala’aulia fa’apitoa mo le fa’amoemoe o le Vasega Fa’aiuaso 2020, na vala’auina ina ia tutula’i latou te taua’aoina aloaia fa’ailoga i le fanau a’o tolaulauina o latou suafa i le fa’asologa o le latou alaala ai i totonu o le latou faleta’alo.

 

O i le ua mauaina le togisilia i le vasega fa’au’u o le tamaitai o Merry Christmas Va’a mai le afio’aga o Tula. O lona togi sa fa’alauiloa mai GPA 4.0 ae o sui ua tulaga lua e tutusa ai le to’alua o Lorraine C. Faiivae ma Micah J. Faumuina.

 

MAUA TUPE MAI LE FEMA - FA’ALOLOTO LE UAFU O VA’A I FALEASAO:

 

 

Ua toina mai e le FEMA le tinoitupe e $1.5miliona ina ia toe fa’aloloto ma fa’aleleia atili ai le Uafu mo Va’a i le afio’aga o Falesao i le Manu’atele, ma ua fa’auia atu nei lea tinoitupe tele i le Matagaluega o Uafu ma Malaeva’alele.

 

 Ua fa’ailoa mai fo’i e Aumua Amata Coleman Radewagen,  Faipule o Amerika Samoa i le Konekeresi, “O lenei tinoitupe o lo ua fa’amatuu mai ina ia fa’aloloto lelei le uafu i Faleasao ma fa’aleleia fo’i mai ona afaina na mafua ona o le Afa o Gita.”

 

O le toe fa’alolotoina atili o le Uafu o le afuga tonu lea o le toina mai o lea tinoitupe e le FEMA ina ia mautinoa ua saogalemu va’a folau e taula i lea Uafu ae maise fo’i i taimi o matagi malolosi e a’afia ai le atunuu, ma o le fa’amoemoe tonu lea na mafua ai le talosagaina o se fesoasoani e fa’atupe ai le galuega lea i le tausaga e 2018.

 

Ua toina sa’o mai lenei tinoitupe e le FEMA i le Malo o Amerika Samoa, ma ua mautinoa ai e tatau lava ona fa’auia lea tinoitupega i le galuega ua ala ai ona fa’amatu’u mai lea vaega tupe.

 

Ua fa’apea fo’i ona tuuina mai le fa’amalo a le tatou sui i le Konekeresi, Aumua Amata i le fa’atonu sili o le Uafu, Taimalie Claire Salafai Poumele, ona o lea ua toina mai se tasi o ona mana’o, sa fa’aulu ai le talosaga mo se fesoasoani mai o le fa’atupega a le FEMA ia fa’aleleia le Uafu mo Va’a i Faleasao.

 

Ua ia fa’afetaia fo’i le pulega a le FEMA Adm. Peter Gaynor ma le sui Failautusi a le Homeland Security Chad Wolf, ona o le pasia mai o lea talosaga taua.

 

VA’AI I LE TOE SOFA’I MAI O LE COVID -19 - O LE TAPUNIA LAVA O FEMALAGA’IGA LE TALI 

 

I le talosaga mulimuli a Kovana Lolo Moliga i le Peresetene o le Hawaiian Air, ona o lana fa’ai’uga ia toe fa’aauau le isi masina atoa i le taofiga o femalaga’iga i le va o Pago Pago ma Honolulu, sa ia fa’ailoa atu ai, “Aua ua va’aia le toe sofa’i mai o le Coronavirus i totonu o le setete ae maise ai fo’i o isi setete uma o le Malo tele o lo’o alaala ai le to’atele o tagata Samoa, ma ua iloga mai ai, e le mafai ona le asiasi mai i Amerika Samoa pe afai e maua pea le avanoa e fia oo mai ai i aiga. O le ala lea, ua manatu ai ina ia toe fa’aauau ona tolopoina le tatala o malaga a va’alele e ulufale mai i le atunuu, se’ia toe va’ai toto’a i ai ia Aukuso 2020.”

 

O le talosaga lona fa lenei ua fa’auia atu e le tatou Kovana i le Peresetene o le Hawaiian Air ina ia taofia a latou malaga mai i Amerika Samoa, ona o le puipuiga lava o le Coronavirus ina ia le ulufale mai i le tatou teritori nei.

 

Ina ua va’aia le suiga lelei i le taumafaiga a le Setete o Hawaii e taofiofi ai le so’ona pipisi o le fa’ama’i i ona laufanua uma, sa iloga mai ai, ua tauau e tatala femalaga’iga nei i le masina o Iulai, peitai i le fa’aiuga o Iuni ua toe va’aia ai i fa’amaumauga le toe sii maualuga le aofaiga o tagata ua toe maua i le Coronavirus ma ua toe faliu ai se fa’aiuga na faia, ina ia toe fa’aauau le tapunia o femalagaiga i le va o Pago Pago ma Honolulu.

 

Ua le gata la i Hawaii lea toe oso fa’afuase’i o le to’atele e maua i le Coronavirus ae ua atili va’aia le siitia maualuga fo’i o le aofai o i latou ua maua i le covid-19 i isi setete uma o lo’o alaala ai le to’atele o aiga Samoa.

 

“O le isi lea atugaluga sili a’afia ai le fa’aiuga ina ia tatala femalaga’iga i le va o Pago Pago ma Hawaii, aua ua pau lea o le ala e mafai ai ona fa’ateleina nisi e ulufale mai i le atunuu i le taimi e tasi. O le popolega sili ona e le’i taitai ona lava nofoaga e tausia fa’apitoa ai i latou ua po’ia i le gasegase, o le togafitiga o i latou, ina ia le pesia ai nisi, ma isi mea uma e taumafai ai ona taofiofi le sasao fa’aafi o le pesia o le atunuu e to’atele i le Covid-19, e matuinoa lava e le’i taitai ona gafatia e le matou malo nei.” O se isi lea fanoga o le afioga le Kovana na fa’ailoa.

 

“O lo ua to’atele fo’i nisi o tagatanuu o le matou nei teritori o lo’o fa’ailoa mai o latou lagona ootia ona ua taofiofia ai le malaga mai o i latou i aiga. Peita’i ua fa’ailoa atu ia i latou, e sili ona puipuia le atunuu nai lo le tau togafitia o i latou e to’atele pe a ulufale mai se tasi e to’atasi lava ma le gasegase i o tatou laufanua nei.”

 

“Ua matauina fo’i e i latou ua va’ai patino i auga o lenei gasegase i setete ua alaala ai, ua latou fautuaina mai i matou ina ia tapunia alava’a ma lamaga uma e fia afea Amerika Samoa. O le mea sili ia saogalemu i latou uma i fanua ma aiga mai lenei fa’ama’i, e leaga tele. Afai fo’i e le’i i ai se togafiti e fa’afoa’ia ai lenei fa’ama’i, e le’i taitai Amerika Samoa ma lona falema’i i le tulaga e mafai ai ona latou tausia lelei ma le atoatoa o tatou tagatanuu e to’atele e ono a’afia i lenei fa’ama’i i le taimi e tasi.” O se isi lea toe fa’aopoopo mai a le afioga le Kovana i lana saunoaga e tusa ai o le fa’aiuga ia toe fa’aauau le tapunia o femalagaiga.