Ads by Google Ads by Google

Tala I Vaifanua


O se va'aiga i le Pulega a le Blyesky Communications ma le Pulega fo'i a le Pacific Islands Foundation i le aso Lua na fa'amautu ai le foa'i a le Bluesky o masini komipiuta e fa'aaogaina e le fanau, fa'atasi ai ma le so'otaga fa'ainiteneti ma telefoni ma se tino i tupe. [ata: Leua Aiono Frost]

FOAI BLUESKY $20,600.00 I LE PACIFIC ISLAND FOUNDATION

 

O le afiafi o le aso Lua na te'a nei, sa o'o atu ai le Pulega a le Bluesky Communications i le ofisa o lo'o ua fa'atautaia ai a'oa'oga ka'akomipiuta a le Pacific Island Foundation i le Falefa'apisinisi Moso'oi ll, ina ia fa'alauiloa ma fa'amautu a'ia'i le latou fesoasoani ua ofoinamo fanau talavou a le atunu'u.

 

O le Pacific Island Foundation ua fa'atula'ia ina ia a'oa'o ai le fanau talavou nei i le fa'aaogaina o masini Komipiuta e tu'ufa'atasia ai latou poloketi, o latou folasaga, pu'ea latou pese ma tapena fo'i ni a latou polokalama e fa'auia i le tauvaga pese tusi ma fatu fa'asamoa e fa'atagia ai le aganu'u a Samoa.

 

O le o'o atu o le pulega a le Bluesky i lea afiafi, aua ua mae'a fa'amautu e i latou so latou agaga fia fesoasoani atili i so'o se taumafaiga lava e aga i le a'oa'oina o fanau talavou i ituaiga tekonolosi fa'aonaponei ma le lumana'i, o tulaga atina'e o latou tomai i ta'aloga o so'o se ituaiga, ae maise fo'i o le a'oa'oga fa'apitoa o fanau i tu ma agaifanua a Samoa. Ae fa'asilisilia lava e le Bluesky, o ala eseese e fa'auia ai tomai ma a'oa'oga fou e faaleleia atili ai le atamai o tupulaga o Amerika Samoa ae a le lumana'i o le tatou atunu'u.

 

Na tula'i le susuga le ali'i pulesili o le Bluesky Pacific Group, Toleafoa Douglas Creevey, ma ia fa'amanatu i le fanau talavou o aofia i lenei vasega, lea fa'anaunauga o le latou Kamupani i taimi uma. Ona ua filifilia fo'i i latou e avea ma le Kamupani o telefoni ma feso'ota'iga tau initeneti mo lea vasega, ua atili ai ona fa'afiafiaina i latou e faipa'aga fa'atasi ma le Pacific Island Foundation, ina ia mautu le taumafaiga e a'oa'o i latou ia iloa ona fa'aaogaina Komipiuta e tapena ai latou folasaga, pu'ea latou ata fa'asolo mo le fa'amoemoe e tauva ai i le tauvaga o lo'o ofo mai e le Troy & Theodora Polamalu Fa'asamoa Initiative Tauvaga Musika, lea e filifilia ai le to'asefulu e mafai ona tauva ma sailia le sui e malaga fa'apitoa i Niu Ioka mo le fa'aaliga tele e tauva ai i lena a'ai tele.

 

"Ou te fiafia ina ua maua e le Bluesky Comunications lenei avanoa, e avea ai ma Kamupani e sapalaia le vasega lenei i a latou telefoni ma feso'ota'iga tau initeneti mo le fa'amoemoe e fa'aaogaina e i latou fo'i nei mea uma e fa'aulu ai latou folasaga ma ata fa'asolo mo le tauvaga lenei,” o se tala lea a Toleafoa.

 

Sa ia toe fa'apupula atili mai, "Ua fiafia i matou e a'oa'oina le fanau i le fa'aaogaina o latou telefoni o le a taua'aoina, fa'ailoa ia i latou polokalama eseese ua fa'aofi i a latou telefoni ina ia mafai ona latou fa'aaogaina ma le toto'a. O nei tomai uma e mafai ona matou fa'asoa atu i le fanau i le vasega fa'apitoa lea ua a'oa'oina ai nei."

 

"O le tau aofa'i o telefoni, o le totogi fo'i o le so'otaga fa'ainiteneti mo le taimi atoa o le a fa'atautaia ai le vasega fa'apea ma le tapenaga a le fanau uma e tauva ai, o lo'o ua aofia uma i lenei foa'i ua fa'alauiloa nei e le Bluesky Communications,” se tala lea a le tama'ita'i o Sherry Sele mai le Bluesky.

 

Pe a o'o ina mautu le a'oa'oga o le fanau i ala o feso'ota'iga fa'ainiteneti a lana telefoni ua taua'aoina ma le fa'aaogaina o polokalama ua fa'aofi i a latou telefoni e fa'atino ai lana poloketi po'o le folasaga mo le tauvaga lenei a Troy Polamalu, o le a fesoasoani i ai le ali'i atisi lauiloa o Tony Black i lana taumafaiga, ae maise fo'i o le a fa'afiafiaina lea alo o Amerika Samoa, aua o le a mautu nei tomai ia te ia, a'o fa'agasolo lona soifua a'oa'oina e fa'aaogaina ai lana lea telefoni ua taua'aoina.

 

O a'oa'oga uma o lo'o fa'atautaia e le susuga Ethan Lake, le failautusi o le ASNOC, ma tusa ma le 30 le fanau ua aofia i lea vasega.

 

MANUMALO TAMAITITI SAMOA TAUVAGA PESE I NIU SILA

 

I lipotia fa’asalalau mai Niu Sila, ua tula'i mai se tasi o alo e tupuga atu i ona matua Samoa i le tauvaga pese na fa'atautaia i Aukilani, Niu Sila, ma e le na'o ni fanau a Samoa sa tauva ai.

 

O le susuga Joel Amosa ua avea nei ma igoa lauiloa i tupulaga talavou i Niu Sila, talu ona suipi lana pese na usuina i le tauvaga pese tele, le 2018 Lexus Song Quest.

 

Ua fa'alauiloa mai lona igoa atoa Niuafolau Joel Amosa, ma o ia o se alo e fa'asino ia Tevaga Mailo Sione ma le faletua o Joyce Amosa Leavasa i Aukilani.

 

O lenei ali'i na soifua a'e i Niu Sila ma e tele fo'i o lana a'oa'oga ma ana taleni, o le musika lava.

 

O lana fa'amatalaga, o si ona tama matua, o ia lava lea na ala ai ona fiafia lenei atali'i i le musika, ma sa fa'ailoa mai na auai o ia i le taimi na fa'alauiloa ai le manumalo a Jsoel Amosa i lea tauvaga pese, ma sa tutula'i fo'i le toeaina ina ua o'o i lea taimi ona o le titi faitama ma pelega o fanau ma latou taumafaiga ua a'e manumalo.

 

Mafai ona e fa'afofoga i lea tauvaga pese atoa i le Upega Tafailagi: http://www.radionz.co.nz/…/a-star-is-born-joel-amosa-takes-…

 

TAUAU MANUIA SAMOA AIRWAYS VA'ALELE FOU FA’AIUGA 2018

 

I lipoti fa’asalalau mai Samoa, taua ai se saunoaga fa'alaua'itele a Palemia Tuilaepa Malielegaoi e fa'apea, "Ua tatau ona va'ai mamao i ala e fa'aleleia atili ai le sailiga o le tamaoaiga ina ia mautu le tupe maua e fa'agaoioi ai le malo i le lumana'i."

 

Ua ia fa'ailoa fo'i, e tele na'ua isi alava'a e le o uia e vaalele tetele i le taimi nei, ma e tatau lava ona va'ai i ai le Samoa Airways ia tautuaina nei alava'a i va o le malo Samoa ma isi malo fa'aatumotu i le pasefika lava ia.

 

"O lena fa'amoemoe e le mafai ona tupu pe afai e na'o le tasi le va'alele tele mo feoa'iga. E tatau ona i ai se isi va'alele e lua a'i va'alele. O lea fo'i ua fa'atalosaga mai Brisbane ina ia mafai ona fa'aa'e se malaga e sau sa'o mai Brisbane i Faleolo. Ae a fa'apefea la isi alava'a ia na fa'atulaga muamua? O le ala lea e tatau ai ona va'ai toto'a i le mafai ona tautuaina le mamalu o le atunu'u ma isi fo'i pasese i le lumana'i."

 

Ina ua fesiligia fo'i le Palemia e tusa ai o le feagaiga ma le Fiji Air, ae ua ia fa'ailoa mai, "Ua fa'aauau lava lena faiga faapa'aga ma le Fiji Air, ma ua i ai fo'i le avanoa e fa'aleleia ma fa'ateleina avanoa e faia e i latou ma lea Kamupani Va'alele i le lumana'i, ina ia mautinoa le saogalemu o feoa'iga ma tali mana'o o e femalaga'i."

 

O le fa'atupega o lea poloketi mo se isi va'alele fou e lua a'i va'a a le Samoa Airways, ua fa'ailoa mai e toina mai se nogatupe mai le UTOS e $12miliona e fa'atino ai le fa'amoemoe.