Ads by Google Ads by Google

Tala I Vaifanua

SUAVAI TAUMAFA I AUNUU - TUFA 100 PUSAVAI I AIGA & AOGA

 

Ua tali mai le ASPA e tusa o le tulaga o le suavai taumafa o lo’o ta’ia atu e le ASPA mo Aunu’u.

 

Ua fa’ailoa e le ASPA e maualuga le pasene o le masima i le suavai pe a o’o i taimi e umi ai na la Aunuu ma ua le toulu uaga i Aunu’u. O nei ituaiga suavai puna e maua i Aunuu, e laititi le motu e fa’apea fo’i ona itiiti le suavai timu e maua ai, ma ua matele ina maualuga le sualua ma atili ai ona faigata ona inumia.

 

I le taimi nei, ua uta atu le 100 pusa vai i vaiaso ta’itasi mo aiga ma le aoga a le A.P. Lutali mai le ASPA, e leai ma se totogi.  “O Aunuu e 20% e maulalo ai le latou suavai timu e toulu ai nai lo le tele o timuga e toulu i Tutuila nei,” ose tala lea a le ASPA.

 

Ona o le tulaga malosi tele o le sualua o le suavai taumafa i Aunuu, o lea sa faia ai se isi fo’i suiga ina ia fa’aleleia ai le tofo o le suavai taumafa i lea motu.  O le masini e fa’ate’a ai le maualuga i le sualua o le suavai taumafai na fa’atula’ia i tausaga ua te’a , ma sa matauina e mana’omia se masini tele atu. Lea la na toe faatula’ia ai le isi masini fou i le tausaga e 2016, ma o lea na faaaogaina mai lava i lena vaitau se’ia o’o ina fa’aleagaina se totoga o lea masini, lea la ua toe sailia atu le Kamupani na fa’atau mai ai le masini tele lea, ae ua le toe gaosia e i latou ni totoga nei masini vai. O lona uiga o le toe fa’atau mai sa’o fo’i o le isi masini fou lea ua fa’atalia nei. O le galuega o lo ua faia nei e le ASPA mo Aunuu ua fa’ailoa mai, “Ua fa’atalia nei le masini fou e tusa ma le $100,000. lona tau, e tatau ona o’o mai a’o le’i o’o ia Fepuari 2020.

 

Ona o le tulaga fa’aletonu o le suavai, o lea ua faia ai le faaiuga a le ASPA e le totogi le pili o vai a aiga i Aunu’u i lenei vaitaimi.  Ua fa’ailoa e le ASPA lo latou agaga fa’afetai i le galulue fa’atasi mai o tagatanu’u o Aunuu i le taumafaiga e fa’afo’ia lenei fa’afitauli.

 

Ua fa’ailoa mai fo’i e le Tank Guy of Pago Pago, ua mae’a fa’atuina nei le tane vai o utufia ai le suavai timu i le a’oga i Aunuu. O lea galuega ua mafai ona galulue fa’atasi i ai lea Kamupani Fai Tane Vai ma le DMWR.

 

MUA “LIAM WILSON” - TULAGA LIMA AMERIKA SAMOA TU’UGA I SAVAII

 

O le ali’i talavou o Liam Wilson, e nofo i Hawaii, ua na’o ia lava na malaga i tu’uga fa’ase’e a le Oceania sa faia i Aganoa Resort i Savaii Samoa.

 

I le vaega o Ali’i 17 tausaga le matutua na tauva ai Liam fa’atasi ma se tasi o ali’i fa’ase’e mai Samoa, Puleiata Martin, ma o iina sa manumalo ai le ali’i mai Amerika Samoa.

 

O nei tu’uga uma sa faia ae fa’ai’uina i le aso Lua o le vaiaso na te’a nei. Ua lisia mai fo’i le aotelega o togi o e na tutu’u ma ua maua ai le fa’aiuga: Manumalo Niu Sila lea na latou mauaina le tele o mua i tu’uga a ali’i, tu’uga a tama’ita’i ma tu’uga fo’i a tama’ita’i e i lalo mai o le 18 tausaga le matutua.

 

Na tulaga lua ai Samoa, tulaga tolu Tahiti ma Ausetalia, ae tulaga lima ai Amerika Samoa ma Vanuatu e tulaga 6.

 

Ua na’o Liam lava o le au tutu’u a Amerika Samoa o le a mafai ona ulufale atu i le tu’uga a le Olimipeka i Iapani i le 2020.