Ads by Google Ads by Google

Tala I Vaifanua


O le ali’i fitafita tuai SFC- E7[Ret] Juni Save’ena Maeva ma fanau a lana fanau i le aso na fa’amanatu ai Vetereni uma a le Vaega Au i Amerika Samoa, Novema 11, 2019 ma o ia na sisia le Fu’a a le USArmy. [ata: Leua Aiono Frost]

Le Fitafita Tuai, SFC -E7[Ret] Juni Saveena Maeva mai le Manu’atele, 23 tausaga o le tautua, ua atoa fo’i le 89 tausga o le soifua, ae o lo’o soifua fiafia pea ma si ona aiga i Tafuna. [ata: Leua Aiono Frost]

FITAFITA TUAI JUNI SAVE’ENA MAEVA - 89 TAUSAGA & 24 TAUSAGA TAUTUA

 

O le susuga  le Fitafita Tuai, ao le afioga le “Lealaisalanoa” i le pa’ia o le Aiga Sa Sagapolutele i Ulutogia Aleipata, SFC-E7 [RET.] Juni Save’ena Maeva mai Olosega, Manu’atele ua avea nei ma fitafita tuai sili ona matua na auai i le sauniga a le malo i le Aso mo Veterni, Novema 11.

 

O nisi na o mea taua lava o lo’o ua tamau nei i le soifuaga o le ali’i fitafita tuai, ma o ni fa’aeaga fo’i ua mae’a fa’auia e le pa’ia o aiga, ona o le tautua au a ali’i fitafita a le Malo tele.

 

Na soifua a’e lenei tama Vetereni i lona aiga i Siufaga, Ta’u i le Manu’atele, i ona matua Maeva Save’ena ma To’asa McMoore- Save’ena mai le afio’aga o Utulei. Na a’oga o ia i le a’oga amata a le Felela i Atu’u ae fa’ai’u mai ai i le A’oga Maualuga a Samoana lea na uma loa lana vasega 9, ae su’e ai i le suega ma ua pasi e tauto i le US Army.

 

“O lena tausaga na malaga i matou i Hawaii i va’a folau. Na o’o atu i Hawaii ma ulufale ai i le Army ia Aukuso 1951, le taimi ua vevela mai le taua i Vietnam,” o sana tala lea e tusa o lona ulufale i le vaega au ae le’i uma tausaga e a’oga ai i a’oga maualuga.

 

E fa’alua ona tauto e tau i Vietnam, ma o lana malaga muamua na fa’amanu’alia ai ma toe fa’afo’i mai ai o ia e fai ona taotoga i falema’i i Amerika ma sa lavea ai le isi ona fatuga’o, peita’i e 4 tausaga na faia ai ona togafitiga, ae toe mafai ona fo’i e tautua i vaega au.

 

O le malaga lona lua i Vietnam, sa iloga ai ona maua o ia i le sasao a’e a le afi, ma sa mu atoa lana vaega ma maliliu ai, ae o le ali’i fitafita Samoa, sa mu lona tino, ae ua na’o ia ua fa’asaoina mai ona ua mu atoa o ia ae le’i afaina ogaoga o ia i lea afi ina ua pa lea kesi. E toe ala ane o ia, ua i San Francisco i le falema’i ua pei o ia o se mummy, ua saisai atoa lona tino i fusi papa’e ma ua toe o ona mata e le’i saisaitia.

 

“Pau le mea na ou manatua ina ua te’i ane, o le kesi na pa ae ua le mafai ona fa’asaoina mai nisi e to’atele o le matou vaega ua i totonu o le nofoaga lea, ma na ou lagonaina fo’i o le fa’asaoina o a’u mai le afi, ona o le alofa o le Atua ia te a’u, ma atonu o lo’o i ai fo’i nisi galuega e manatu ai le Atua i lo’u tagata fa’atauva’a,” o se tala lea a le tama, o se tasi e matua pa’epa’e le tino, ae matua loto Samoa lava ma o se tasi e le fesiligia e lona aiga, lona aoga, tausi aiga ma taua’u malosi i mea a lona aiga e fai.

 

Ina ua mae’a toe malosi mai ona manu’aga uma i le afi, ae fa’ato’a fetaui ma le tina o le aiga o lo’o la’ua mafuta mai pea i le taimi nei, le afioga Galumalemana Salaevalu Onesemo - Maeva. Na fetaui i Kalefonia a’o fa’ato’a toe amata tiute o le tama ina ua mae’a togafitia ona manu’aga mai Vietnam, ma sa faaalia e le tina, “Se o la’u uo teine sa ma a’o’oga lea na mafua ai ona ma fetaui.”

 

Na faaipoipo i la’ua i le tausaga e 1972, ma ua atoa nei le to’a lima o le fanau, ma ua matutua uma fo’i i latou, 2 teine ma tama e to’atolu.

 

Peta’i na muamua fo’i fa’aipoipo le tama i se tasi o tama’ita’i Siamani, ma e to’atolu ai nai ona alo, lea e ulumatua ai le ali’i e 66 ona tausaga, o lo’o ua alaala uma fo’i i latou i Amerika.

 

“O lenei tausaga o le a atoa ai le 47 tausaga talu ona fa’aipoipo i ma’ua pe a o’o ia Tesema 30, 2019. O se mafutaga e leai se mea e toe faitioina ai se mea, ua matutua ma ua na’o le agaga o le fa’afetai ona o nei tausaga e tele ua mafuta ai ma le tama, e le faigofie fo’i aua e aulelei le tama o le aiga, o le afuaga fo’i lena o le tu’u o mea uma na alu atu i Amerika e tausaili, ae oso fai le fa’aipoipoga.” O se tala fa’aulaula lea a le tina o le aiga, ae leaga ua tamau fo’i le agalelei o aiga o le faletua, ina ua latou fa’apale le tama fitafita tuai i le suafa Lealaisalanoa i le tausaga e 1976, fa’ato’a fa tausaga talu ona fa’aipoipo i la’ua.

 

O le afioga Galumalemana Salaevalu Onsemo - Maeva o se alo e fa’asino i le tama o Lemusuitauotofaigaofaleupolu ma Vaoiva Leau Onesemo mai Solosolo ma Ulutogia Aleipata.

 

I le fa’amanatuina o le Aso o Vetereni, Veterans Day, ia Novema 11, 2019 o Maeva na sisiina le Fu’a a le US Army. Ua alaalata’i fo’i i la’ua ma le faletua ma le aiga i Tafuna.

 

ANETONE FOALIMA FUGA - FAIAOGA 33 TAUSAGA; VETERENI & TAMA FAIPISINISI

 

O le vaiaso na te’a i le aso Sa na fa’atasia ai le pa’ia o aiga na lua, ae maise fo’i o paolo na sausausema o le ali’i Faia’oga, a’o le Fitafita tuai fo’i mai Amerika Samoa, ma o se faipisnisi tumaoti o ia, peita’i o se tama fo’i o lona aiga, ina ia latou toe manatu i ona uiga, o ana amioga masani, ae maise lava o ona tiute sa tula’i ma fa’atino a’o soifua fa’atasi i latou, i lona toe sauniga na fa’atautaia lea i le Malumalu o le falema’i tele i Faga’alu, Novema 14, 2019.

 

“O lenei tama e tali mea uma i le ata, e te le iloa ona ita ia te ia i se mea, ona o ona uiga fa’aalia na i taimi uma o talanoaga, feiloa’iga ma mafutaga,” o se tala lea a se tasi o ali’i faia’oga ua 11 tausaga o la’ua faia’oga fa’atasi i le Nuuuli Voctech High.

 

E le’i faigofie i le faletua, Josephine Lam Yuen Fuga ma le fanau le toesea o le tama, ao taumafai o ia e fa’amae’a lelei lo latou fale i Olosega i le Manu’atele.

 

I molimau na fa’afofogaina e le to’atele sa auai i lona toe sauniga, ua manino atoa ai mata o le vai, i uiga o lea tama, a’o fitafita tuai fo’i, aua sa tautua i le US Army.

 

Sa avea o ia ma Faia’oga o le Uela i le A’oga Maualuga Matata Eseese i Nuuuli lea na atoa lelei ai le 33 tausaga o lana tautua ma litaea mai ai i le 2018. O ia fo’i sana mauaina le fa’ailoga o le Faiaoga o le Tausaga a le Malo o Amerika Samoa i lea tausaga i le taimi o le Fa’au’uga a le Vasega 12 a le Voctech High 2018. O ia o se faipisinisi fa’akonekarate e le ASPA mo le aoina o le Lapisi.

 

Na molimauina e se tasi, “E i ai uiga o le tama lenei, e aga ona fiafia i ai le fanau talavou. E mafai lelei lava ona ia ola feso’ota’i mo tamaiti faigata, ma o se tasi o mea na aoga tele ai o ia i le soifua a’oa’oina fa’amatata eseese o le fanau na gasolo i le Nuuuli VocTech High, ao faia’oga ai.”

 

O ia o se alo e fa’asino ia Foalima Fuga mai Pago Pago ma Saumolia Foalima Fuga mai Manu’a ma Pago Pago.

 

Mai lana fanau na molimau, ua iloga ai se tama e maua lona taimi e mafuta atu ai, ma tali i so’o se mana’omia i o latou olaga, ae maise lava i le fanau matutua i Hawaii. O se tama e fa’agalo gata, ae o ia e ona le igoa, sa faigata tele ona ou fa’amatalaina lona uiga.

 

O uiga o le tama i le mafutaga, na molimauina lona tama e talimana’o i le fanau i o latou mana’omia, e tausi fanau ma e fiafia uma i ai le fanau. dO se tama e alofa tele i lona tina, ma lona aiga atoa, ma ua fa’asolo atu ai fo’i ona lima malosi i mea mo si o matou aiga.”