Ads by Google Ads by Google

Tala I Vaifanua


Dr Eminoni Naveno, o le foma’i fa’apitoa o le Ma’i Suka ma le Toto Maualuga i le Matagaluega o le Soifua Maloloina i le aoaoga ananafi a le DOH Tobacco Diabetes. [ata: Leua Aiono Frost]

AMATALIA AOAOGA FAAPITOA MA’I SUKA MA ALA MAFAI ONA SOIFUA & LOU SUKA

 

O le auau o le fa’amoemoe maualuga o le Komiti Fa’afoe a le DOH Tobacco/Diabetes, ina ia gafataulima e le tagata ma’i suka ona pulea lona ma’i suka, ia mafai ona umi lona soifua a’o maua ai pea i lea gasegase. Lua e le na’o le Ma’i Suka e ao ina e mataituina, a’o e maua ai i lea gasegase. E ao fo’i ona e va’ai toto’a i lou soloa’i atu e maua i le Mai o le Toto Maualuga, fa’asolo ane ai i lou maua i le Ma’i Fatu, ae mulimuli ane ai loa, ona soloa’i atu lou soifua ina maua i le Ma’i o le Fa’amama lou Toto. Ese mai lea e ao fo’i ona mataituina lelei le tele o le ga’o i lou tino, po’o le Cholesterol.

 

O le aso ananafi o le ulua’i aso mo le faamoemoe o le DOH Tobacco Diabetes ina ia matua unaia le fa’amoemoe e fa’ailoa atu i le mamalu lautele le a’afiaga o lou Ma’i Suka ia te oe pe afai o le a le mafai ona e pulea lelei.

 

I folasaga sa mafai ona fa’asoa mo le Komito Fa’afoe, ua aofia ai le foma’i fa’apitoa Dr Eminoni Naveno, o le foma’i fa’apitoa o le Ma’i Suka ma le Toto Maualuga i le tatou Matagaluega o le Soifua Maloloina.

 

I lana folasaga sa ia fa’ailoa patino ai, “O le ulua’i 7 tausaga o le soifua o so’o se tagata soifua, o iina e fafaga ai le tagata i ala eseese e maua ai e ia le a’oa’oga lelei e fa’apena fo’i i le tulaga o le tausiga lelei o lou soifua Maloloina. O le taimi lea o lo’o mafuta ai le tamaititi i lona tina ma o ia lea o le ulua’i faia’oga i so’o se mea i le olaga o le fanau. Ua alu fo’i i le a’oga e fa’aopoopo mai ai nisi mea uma i lona soifuaga, ae o oe e taua ia te ia i le tulaga tau ana mea e ‘ai, o le taumafaiga ina ia aloalo ese mai fa’aletonu ina ne’i lavea ai lona tino, ma isi mea uma i le olaga mulimuli mai o le fanau.”

 

Na fa’ailoa e ia le itu tau le eseesega o le tagata soifua ma le manu ua ola i lona siomaga e leai sana filifiliga e faia, ae ua ola i lona natura ua mae’a fa’aofi i ai e le Atua foafoa. Afai e i ai se mea e ao ina fia silafia e le tagata soifua e tusa o natura o le soifua, e tatau ona tatou matau ma va’ava’ai toto’a i le ola o meaola. O iina e mafai ai ona iloa patino e i tatou, o latou soifuaga ua leai so latou manatu e faia i ai. O mea’ai mo le povi, o le vao. O mea’ai mo le isumu o momoi mea’ai e tufitufi solo e mafai ona fa’aigoaina ai, e aoina e i latou o lapisi, ma ua tutusa lelei ma le pua’a i le laueleele.”

 

O le folasaga na soso’o ai o le tama’ita’i Dietian a le Falemai LBJ i Faga’alu, Ianeta Ah Ping RD, lea sa ia fa’amatalatala mai le ituaiga o mea tausami e ao lava ina va’ai toto’a i ai i tatou uma ua mai suka, ma i tatou fo’i e to’atele o lo ua amata ona soloa’i atu e maua i le ma’i suka #2, lea e i ai lava le inisulini i lou toto, ae ua le lava e mafai ai ona fa’auia le suka mai lou toto i sela o lou tino, ina ia mafai ona maua e oe le malosi.

 

O le folasaga lona tolu o le tama’ita’i Fapisinisi Paula Stevenson - McDonald lea sa ia aumaia le fe’au sili ona taua, “Fa’amu le ga’o i lou tino, ia matua e fa’aaogaina lou malosi e faia ai au galuega ia e afu, pe o le matua fa’amalositino fa’atolu i le vaiaso e ta’i 50 minute o e fa’amalositino, aua le so’ona matua taumafa, ae ia mata’i lau ‘aiga ia fa’aitiitia.”

 

Afai e i ai se mea lelei e te fia faia mo oe i le taimi nei, “Fa’amuta nei se mea e tasi lava ua e silafia e mafua ai ona e ma’i, afai o le ulaula tapa’a, fa’amuta nei loa, afai o le so’ona taumafai fa’amuta loa, pe afai fo’i o lou paie, fa’amuta nei loa, ia fa’ailoa ai, ua aoga ia te oe le a’oa’oga, ma ia fa’amalositino  i taimi ua e lagona ai le mafatia i ni avega mamafa i lou mafaufau, e taofia ai le lagona omia.”