Ads by Google Ads by Google

Tala I Vaifanua

VAIASO MULIMULI LENEI FA’AINUGA FUALA’AU MO LE MUMU TUTUPA

 

Ua fa’ailoa mai e le Matagaluega o le Soifua Maloloina (DOH) e fa’apea o Novema 9, o le aso muamua lea mo le fa’ainuga fuala’au mo le Mumu Tutupa. Ma O le a fa’ataunu’uina lenei fa’amoemoe i le Malae o le Talu i Fagatogo.

 

O le a le toe iai ni fuala’au mo le Mumu Tutupa e toe fa’ainuina pe a mae’a le aso 9 o Novema. Ua fautuaina le mamalu o le atunu’u, afai e le’i inu ina ni au fuala’au mo le mumu tutupa mo lenei tausaga 2019, fa’amolemole maliu mai e inu ina a outou fuala’au mo le mumu tutupa ae le’i fa’amutaina lenei auaunaga.

 

Ua fa’ailoa i pepa o fa’amatalaga a le DoH, o lo’o asia e le aufaigaluega a le DoH nofoaga ese’ese e iai ofisa o le malo, pisinisi tumaoti, ma nisi o alalafaga mai le 8 i le taeao seia o’o atu ile 4 i le afiafi.

 

Fautuaina le mamalu o le atunu’u, asiasi ane i falema’i itumalo o lo’o i Leone, Amouli ma Tafuna ina ia inu ai fuala’au mo le mumu tutupa i itula masani e amata mai i le 8 i le taeao seia o’o atu i le 4 ile afiafi fa’apea fo’i ma le ofisa tutotonu i Faga’alu.

 

O lo’o matala pea le falema’i itumalo o lo’o i Tafuna mai le Aso Gafua seia o’o atu ile Aso Faraile e amata mai i le 8 i le taeao seia o’o atu i le 8 i le afiafi.

 

E i ai se fesili telefoni i le 633 633-5871 po o le 633-5872.

 

TAUNUU AUMALAGA FOMA’I FATU MAI OREGON

 

Ua taunu’u mai le aumalaga o Foma’i fa’apitoa o le Fatu mo a latou suesuega o a tatou fanau i gasegase eseese o le fatu [RHD].

 

O lea aumalaga e o mai le Iunivesite o suesuega fa’asaeanisi i Gasegase Tau le Fatu, le Oregon Health & Science Univeristy, ma e o mai lava i tausaga ta’itasi e faia latou suesuega nei i fanau a le tatou atunu’u, ina ia nofouta i auga amata o le Ma’i Fatu e aofia ai le fa’ai’i tiga ma le tau le mafai ona manava.

 

O Dr Laurie Armsby lea e ta’ita’ia mai lea aumalaga o foma’i fa’apitoa mo fanauiti, toatolu foma’i fa’apitoa o ma’i fatu ma ali’i e fa’apitoa mo le fa’atulagaga o masini mo suesuega ma nisi e to’atolu fo’i e fesoasoani i talavai.

 

Ua le manatu ina ia faia na’o talavai i lenei taimi ua malaga mai ai, ae o le a fa’atautaia fo’i ma siakiga mo fanau sa mua’i togafitia muamua, o fanau ua mae’a mautinoa o lo’o ua maua i le mai fatu RHD.

 

I le latou ulua’i aso na fa’asolo ai latou va’aiga o fanau i Amerika Samoa ua latou auai atu ai mo talavai a le fanau a’oga i Manumalo Baptist. O le totogi o le malaga mai o lenei vaega o foma’i fa’apitoa ma latou fesoasoani uma i lenei tausaga, na totogia lea e le Manumalo Baptist ma le Paramount Builders, lea sa faia le foa’i lea e $10,000.

 

Na soso’o lea ma le fa’asolo ane a latou suesuega i le a’oga a Iakina Academy ma Peteli Academy. Ua fa’aaogaina fo’i lenei avanoa e le vasega o foma’i fa’apitoa mo suesuega o Ma’i Fatu a le LBJ, e galulue fa’atasi ai ma nei ali’i foma’i ae maise o sui o lo’o galuea’ina fa’apitoa masini mo suesuega, ina ia latou gafatia ona fa’atino ia tiute pe a tu’ua e nei foma’i fa’apitoa ma latou fesoasoani le atunu’u.

 

Faailoa e Dr Armsby, “Ua le na’o Amerika Samoa ua fa’ao’o i ai sailiiliga o gasegase tau le fatu i fanauiti, ae ua fa’alauteleina nei suesuega uma i le tele o malo o le lalolagi. O lea afai ae tu’ufa’atasia uma nei sailiiliga ma faitauga fa’amaumau i lea gasegase, o le a aotelega fo’i se fesoasoani ina ia fa’aleleia atili suesuega mo ni togafitiga e tatau ona faia mo i latou ua maua i lea gasegase, ma ia vave maua.”

 

O lo’o faia nei tautua e le aumalaga o foma’i fa’apitoa o le fatu e aunoa ma se totogi, ma ua latou fa’afetaia tele le fesoasoani tau tupe na faia e le Manumalo ma le Paramount Builders ua mafai ai ona o mai le latou asiasiga i Amerika Samoa