Ads by Google Ads by Google

Tala I Vaifanua

TA’AVALE A LE MALO LISI MA FA’ASOLO ATU INA FA’ATAU MOTU

 

O se poloaiga fa’alaua’itele a le afioga le Kovana Sili, Lolo Matalasi Moliga, i matagaluega a le malo ina ia taofia le toe faia o fa’atauga ta’avale lea e masani ona faia fa’alisi ae uma ane ua faatau motu ai le ta’avale, le avea o se mea totino a le Malo, ae ua fa’aalu aga’i i le igoa o le sui o loo fa’aaogaina le ta’avale e faigaluega ai.

 

I le tusi a le kovana ia Oketopa 22, sa ia fa’atonuina ai fa’atonusili o matagaluega “O le a taofia lea faiga i le taimi nei lava!”

 

“Afai e le’i mae’a totogia nei ta’avale ua fa’alisi, e ao ina fa’afo’i ta’avale uma nei, pe afai e le’i mae’a le tau, ae le o gafatia foi e le matagaluega ona totogia uma le tau o le taavale o totoe. A mafai foi ona totogia fa’auma e le Matagaluega lenei ta’avale, ia fa’amaumau uma nei ta’avale o ta’avale a le Matagaluega o loo fa’auia atu ai le tupe mo peimeni.”

 

“O se mea leaga tele pe afai o le a le aofia i lisi o mea totino a le malo nisi o taavale ae le taugofie nei ta’avale i matagaluega ta’itasi, ae o le tele o ta’avale o loo faatau i tupe mai le Malo tele.”

 

Ua fa’atonuina fo’i e le Kovana le ali’i fa’atonu o le Ofisa o Oloa a le malo, ina ia tu’ufa’atasia atoa se lisi o ta’avale ua fa’atauina e matagaluega ta’itasi e aafia i lea ituaiga o faatauga, ma ia taua’aoina mai ia te ia i le isi lua vaiaso o lumanai nei, e afua lea i le aso ananafi.

 

Mai le suesuega lea na fa’atautaia e le Office of Inspector General i le 2018 ua faamauina ai le aofaiga o ta’avale a le Malo e 519, peita’i e uma ane le toe iloiloga, ua o’o i le 637 ta’avale a le Malo ae maua ane lava e le o sa’o lava lea faitauga.

 

Ua fa’amaonia mulimuli ane e le’o sa’o fa’amaumauga nei, ae ua fa’ailoa mai e 143 ta’avale ua aofia i lea faitauga, ae le’o i ai lena aofaiga o taavale le 143 o ta’avale, o ta’avale la na o loo aiaia fa’alisi lo latou fa’atauga.

 

AMATA SAILIILIGA “GAO” - A’AFIAGA FA’AMAMALU TOTOGI MAULALO MALO TELE IINEI

 

E afua mai le aso 17 -24 Oketopa, 2019, o lo ua fa’atulaga ina ia faia ai le sailiiliga auiliili a le Government Accountabilty Office (GAO) i Amerika Samoa, po’o le a tonu se a’afiaga o le tatou tamaoaiga fa’alotoifale, pe afai o le a fa’amalosia e si’itaga o totogi o tagata faigaluega ina ia talafeagai ma le totogi maulalo fa’atulagaina e le malo fetarale mo Amerika Smaoa.

 

Fa’ailoa e Kovana Lolo Moliga i le GAO, “Ona o le tulaga fitaituga o le tupe fa’asoa a le matou malo, e le a’ua’u atili pe afai o le a fa’amalosia i Amerika Samoa le totogi maulalo a le fetarale. Ua le gata i le lava ai le fa’asoa, ae o le isi itu, e le gafatia ona fa’aauau ona totogia ai pea tagata faigaluega i pisinisi ma le Malo i le lumana’i, ina ia fa’atumauina nei ituaiga o totogi mo tagata faigaluega uma lava.”

 

Ua ia fa’ailoa manino, “E sili ai ona matou galulue punouai pea ina ia atina’e atili pea le matou atunuu i nisi ala e fa’aleleia atili ai le tamaoaiga tausi, ona fa’ato’a si’itia lea o totogi o tagata faigaluega i se tulaga e gafatia pea ona faaauau ona totogia ai i latou e tusa o tiute sa fa’atino ma galulue ai.”

 

Ua mae’a tofia fo’i e le afioga le Kovana sana Komiti Fa’afoe Fa’apitoa e galulue atili e fa’ataoto se alafua manino e fesoasoani e faatulaga se si’itaga ua alagatatau ona fa’amalosia mo le tatou teritori ma ona tagata faigaluega.

 

I le taimi nei, pe a fua atu i le si’itaga o totogi pe a fa’amalosia mai le totogi maualalo a le Iunaite Setete, e matua le gafatia lava e le tupe fa’asoa ua mae’a fa’atulaga a le Malo na ituaiga o totogi mo ona tagata faigaluega faapea foi ma pisinisi ma totogi o latou tagata faigaluega.

 

O le Komiti Fa’afoe fa’apitoa ua tofia e le Kovana o loo ta’ita’ifono ai le Fa’atonu o Fefa’ataua’iga, Keniseli Lafaele ma e sui ta’ita’ifono ai le Fesaosoani Sili a le Kovana Iulogologo Joe Pereira, ma ona sui totino e aofia ai: Port Director Taimalelagi Dr. Claire Tuia Poumele,  Treasurer Ueligitone Tonumaipea, Budget Director Catherine Saelua,  Director of Human Resources Eseneiaso Liu, ma le fa’atonu o Galuega Lautele Faleosina Voigt.

 

E le gata i lea ae ua fa’ailoa atu fo’i e Kovana Lolo Moliga i le vasega o faipisinisi uma i le teritori ina ia faatula’i fo’i sa latou Komiti Fa’afoe e taga’i toto’a i totogi o tagata faigaluega i totonu o pisinisi ma ua fa’ailoa mai ua fa’atula’ia nei a’o sui totino ua i ai o Solip Hong, Taotasi  Archie Soliai, Ella Gurr ma Leilua Stevenson. O le matagaluega o fefa’ataua’iga o le a ta’ita’ia lenei fonotaga tele.

 

TAUALOA KOVANA FA’ATE’A FOMA’I MANU -MATAGALUEGA O FA’ATOAGA:

 

Ua talia lelei e le afioga le kovana sili, Lolo Moliga, le fa’aiuga a le Loia Sili, Talauega Eleasalo Ale, ua fautuaina ai o ia ina ia fa’ate’a le Foma’i Manu a le Matagaluega o Fa’ato’aga, Dr Ken Lameta, ona ua fa’amaonia nisi o fa’asea ua mae’a fa’aoo atu mo le sailiga a le Ofisa o le Loia Sili e tusa ai o le fa’atinoga o ona tiute.

 

“Ua fautuaina lava lau afioga le Kovana ua alagatatau ona fa’ate’a ese le susuga Dr Ken Lameta mai le tofiga o el Foma’i Manu a le Matagaluega o Faato’aga i le taimi nei lava, ae mafai ona ofo atu ia te ia se isi galuega e mafai ona galue ai i lea lava matagaluega, ae le aofia ai lona togafitia o meaola mai o latou gasegase ma tui puipuia fo’i mai ni fa’ama’i, pe faia fo’i taotoga o meaola e taofia ai le so’ona toloa’i,” o vaega lea o le tusi na fa’auia i le Kovana mai ia Talauega.

 

Ua fa’ailoa atu fo’i e Talauega i le faatonu o le Matagaluega o Fa’ato’aga, Filifa’atali Mike Fuiava, “Pe afai e fia fesiligia e Dr Lameta le fa’aiuga ua fa’ailoa atu i le Ofisa o le Kovana ina ia fa’amaonia ai le fa’ate’a ese mai o lona tofiga, e mafai.”

 

Ia Oketopa 18, 2019, na fa’amaonia ai loa e le Kovana Sili, lea lava fa’aiuga a le Loia sili.