Ads by Google Ads by Google

Tala I Vaifanua


O se va’aiga i le Toa Samoa i Korea Saute, Jalen Mamea ma si ona tina i le ma’a fa’amanatu o lona tua’a “Tupuola” i se tasi o la’ua mafutaga i Amerika. [ata: Foa’i]

JALEN MAMEA - 498TH COMMAND SUPPORT SUSTAINMENT BRIGADE SOLDIER I KOREA

 

O le ali’i Toa o Samoa, Jalen Mamea mai le afio’aga o Fagasa, ua ia fa’ailoa mai lona agaga fa’afetai i le tapua’iga a Matua, Marty Mamea ma Tafaimamao Tua-Tupuola, ona ua filifilia o ia e avea ma Fitafita o le 498th Command Support Sustainment Brigade i lenei kuata ua fa’ato’a mae’a atu, Iulai - Setema 2019.

 

“O se fa’aeaga sa ou le moemiti ou te maua, aua e to’atele i matou i lenei auaunaga i Korea i Saute, peit’ai ua filifilia lo’u nei sui fa’atauva’a, o le fa’afetai e fa’afo’i i le Atua ae maise le tapua’iga mau a nai ou matua ma aiga uma lava. Lo’u nu’u pele o Fagasa, malo le tapua’i mo la outou fitafita e taumafai lava le mea sili,” o se saunoaga lea na tusia mai e le susuga Mamea e fa’afetaia ai lona aiga ma lona afio’aga ona o le tapua’iga alofa ma talosaga molia mo i latou uma o e tupuga mai i le latou nu’u o lo’o tausaili manuia i fafo.

 

O lo ua ia fa’ailoa mai, na aoga o ia i Samoana High ma faau’u mai ai i le tausaga e 2012. Na maua lana sikolasipi e a’oga ai i le Iunivesite o Kalefonia i Berkeley ma sa fa’amanuiaina lana taumafaiga ma maua lona fa’ailoga i le Criminology i le 2017.

 

Ona soso’o lea ma lona ulufale i le USArmy ia Setema 04, 2018. I le taimi nei o lana MOS o le 36B lea e tu’uina ai o ia i le vaega o Tupe lea ua avea ai o ia IT. Na fa’ai’u lelei lana BCT ma soso’o fo’i ma lana AIT i Fort Jackson, South Carolina.

 

Ua o’o nei o ia i Sotuh Korea e tiute ai ma ua tautua o se MilPay Operations Section Leader. Peita’i ua lautogia o ia i lea fo’i fa’aeaga ua avea ai o ia ma se fitafita o lenei kuata. E tolu ona tusi pasi ua mae’a taua’aoina ua lua fo’i ana pine ua mae’a fa’apine ai o ia ma le pine faapitoa ua taua’aoina e taualoa ai lana auaunaga i lenei vaitau o lona soifua tautua.

 

2 FITAFITA AMERIKA SAMOA - FA’AU’U AIT MAI FORT LEE, VIRGINIA

 

E to’alua alo fo’i o Amerika Samoa sa tulia la’ua AIT - po’o koleniga ma aoaoga fa’apitoa mo latou tiute o le a galulue tumau ai i le USArmy i le nofoaga a le Vaega Au i Fort Lee, Virginia. O i la’ua nei o Jacob Malauulu mai Taputimu ma le ali’i o Iopu Kaleopa mai Utulei.

 

O i la’ua na mua’i fa’atautaia la’ua Koleniga fa’apitoa e pasia ai le la’ua BCT i Fort Jackson, South Carolina, ona faato’a si’itia lea i Fort Lee mo le la’ua AIT lea ua fa’au’u mai ai nei. O le a malaga le ali’i o Jacob Malauulu i South Korea peita’i o Iopu Kaleopa lea o le a se’e mai i Hawaii e tiute ai.

 

Fa’amalo le tauata’i ma le taumafai ia te oulua Toa o Samoa.