USUFONO TALAVOU ALE & REP MELEISEA - FONOTAGA PALEMENE PASEFIKA

I le fonotaga a Taitai o Fono Faitulafono po’o Palemene a le Pasefika, o lo’o au ai le Fofoga Fetalai Savali Talavou Ale ma le ali’i Faipule Samuel Ioka Meleisea e usufono mo Amerika Samoa.

E to’a 14 ta’ita’i o atunu’u i le fonotaga i Tahiti ia Setema 10 ma le 11.

O le ‘au’au o le fonotaga ua fa’ailoa mai “O le toe fa’aleleia o Puna’oa o le tatou Alamoana!” Ona o le tatou Malo o le pau lea o le tatou Oloa fa’atau atu i fafo, o le I’a Tu’uapa maketi i fafo, o le isi lea ala e le tatau ai ona misia avanoa fa’apenei.

Fa’ailoa e Meleisea, “O le fonotaga lenei ua sili ona aoga tele mo ta’ita’i o atumotu o le Paseefika, aua o lo’o aofia fa’atasi i tatou i pagatia o lo’o feagai ma atumotu ona o fagotaga o latou ogasami e va’a i’a mai isi malo tetele o Asia ma isi konetineta.”

“O ala na soalaupule ai aiaiga o tulafono malilie fa’atasi a ta’ita’i o atumotu o le Pasefika, ina ia saogalemu o tatou ogasamia ma ia fa’atuputeleina pea ona sosia po’o puna’oa, o le isi lea mea taua tele mo se tatou leo i nei aiaiga uma. Fa’afetai tele lo’u sui ua mafai ona ou maua lea avanoa e fefa’asoa’i ai ma ta’ita’i o nei malo uma i le tatou alamoana, e to’a 14 lelei malo na auai i lenei tausaga.”

O le pepa na saunoa i ai le sui mai Samoa, Kosi Latu, o ala ua mafai ona toe fa’aleleia ai le tele o puna’oa o le tatou alamoana, ina ia mautinoa, e fa’atumauina pea ona sosia mo augatupulaga o soloa’i mai.

O se tasi o mea na fa’amauina i le fonotaga, a tutula’i i latou uma na usufono mo sina 3 minute latou te manatua ai le fa’alavelave na tupito i le Malo o le Iunaite Setete o Amerika i le a’ai tele i Niu Ioka, lea na faatama’ia ai nisi o fale tetele na tautuaina le tele o atunu’u o le lalolagi e ala i fefa’ataua’iga. O le aso 11 o Setema lea fa’amanatuga i Amerika.

O le agaga o loo mataituina pea i nei so’otaga fa’ata’ita’i o Malo o le atumotu, ua tasi i tatou i le tatou Alamoana, ua tasi o tatou loto ina ia so’ofa’atasi i lo tatou vasa ia puipuia lelei ona puna’oa, ina ia le fa’alolo tupulaga faia’e o le atuvasa.

SIAKI O LAFOGA TUFATUFA I LE TAEAO NEI

O le taeao o le aso Faraile na te'a nei, na fa’atulaga e le Matagaluega o Tupe a le malo e tufatufaina siaki mo lafoga toe maua (tax refund checks) a i latou e agava’a. O ia siaki o lafoga mo i latou sa faila a latou lafoga i le va o le aso muamua o Aperika ma Iuni 12.

I se pepa o fa’amatalaga i le aso Lulu o le vaiaso lenei sa fa’ailoa ai e le Teutupe a le malo, Uelinitone Tonumaipe’a, e fa’apea e 1,833 tagata totogi lafoga e maua a latou siaki o lafoga i le taeao nei.

O le aofaiga o le tupe o lafoga e tufatufaina i lenei aso e silia ma le $1.88 miliona. Mai lea aofaiga e silia ma le $1.06 milion le lafoga mo fanau iti (ACTC) - lea a totogi e le fetarale - ae $814,695 mo lafoga lotoifale.

Ua talosagaina i latou o lo’o agava’a e maua lafoga ina ia siaki muamua le Ofisa o Lafoga, ae le’i tu i le laina e maua ai lau siaki. A i ai se fesili fa’afeso’otai le Ofisa o Lafoga i le 633-4181.

MALIU TAMAITAI 19 TAUSAGA ONA O LE DENGUE FEVER

Ua fa’amaonia e le CEO o le falema’i o le LBJ, Faumuina John Faumuina ma se tasi o Foma’i na va’aia le gasegase tamaitai e 19 tausaga le matua, o le mafuaga o le maliu o lea tama’ita’i talavou, ona o le Dengue Fever.

Fa’ailoa e Dr. Seakerise Tuatoo, “O le talavou na aumaia lava i le falema’i ma ua matauina o auga ia o le Dengue Fever. E maualuga lava le fiva, ma e tiga sooga o ivi o le tino, ma gagase le tino atoa.”

“E le’i i ai se isi na manatu o le a vave ona tu’ua le mafutaga a lenei tama’ita’i talavou ma lona aiga, peita’i, 5 aso talu ai, ae tupu lea mea, ona o le ma’i ua matele ina masani le atunu’u i ona auga, ae o lo’o tumau foi le i ai pea o namu i le tatou atunuu,” o se tala lea a Dr. Tuatoo.

O lenei talavou mai Pago Pago, e aoga i le Kolisi Tu’ufa’atasi i Malaeimi, ma sa fa’aalia e nisi o ana uo mamae i le Kolisi, e le’i i ai lava se tino ma’i na va’aia e i latou i s latou uo mamae, pau o le mea e malosi lava ia e ta’alo ma le ola fiafia laumata ataata, ae ua faate’ia i latou ina ua le toe aulia mai e ia lenei vaiaso atoa i le a’oga.

Ua le gata i lea, ua lapata’ia mai le mamalu o matua ina ia avatu fanauiti e fa’aatoa o latou tui puipuia ona o lea ua matauina ua amata fo’i ona pepesi mai ma le misela i le taimi nei. O auga masani lava fo’i o le Misela latou e i ai fo’i le maualuga o le fiva ma e va’aia le pata fa’asolo atoa o le tino o le fanau.

TOE FA’AFO’I I SAMOA - TALI MOLIGA TIA’IA O LANA PEPE

Mai Samoa o lo’o lipotia ai le tama’ita’i Samoa lea na malaga i Melesia e auai ise kosi fa’afoma’i, peita’i ua fanaua lana pepe, i le aso na soso’o ai ma le aso na tulaueleele ai i Melesia, ma ua ia tia’ia lana pepe i le lapisi i Kuala Liumpur.

E mafai ona molia lenei tamaita’i i le tulafono a le malo o Melesia, peita’i, ua feutaga’i ta’ita’i o malo, ma ua maua ai le fa’aiuga, e toe fa’afo’i lelei mai lava le tamaita’i Samoa, e tali i ona moliga ua fa’asaga ia te ia, e tusa ma lona tia’ia o lana pepe, ae le’i iloa pe na ola fo’i pe leai.

Ua fa’ailoa fo’i fa’alaua’itele e le alii Palemia, Tuilaepa Sailele Malielegaoi, “O lea ua faia le fa’aiuga a malo na lua, e sili ai le toe fa’afo’i mai o lenei tama’ita’i, ina ia tali i ona moliga i lona lava malo, o lo’o i ai fo’i ma lona aiga ma ona lava tagata, e tauau e malamalama atu ai o ia i le sese ua fai ma lona fa’asalaga e feagai ma ia.”

Ua le mafai lava ona fa’alauiloa le suafa o le tamaitai, aua o lenei tu’ua’iga ua fa’asaga i lenei tama’ita’i, ua a’afia ai le pepe. Sa malaga fa’apitoa le Konesula o Samoa i Ausetalia, Auseugaefa Poloma Komiti, e molita’i lenei tamaitai i Samoa mo lona fa’amasinoga.