Ads by Google Ads by Google

Tala I Vaifanua: Saunoa Fa'apitoa Kovana Lolo Fu'a a Manu'a 2019


[ata: foa'i]

Na malaga fa'apitoa le afioga le Kovana Sili Lolo Moliga i le Manu'atele ina ia auai i le fa'amanatuina o le 115 tausaga talu ona avea Manu’a ma veaga o le malo tele ia Iulai 16, 1904.

 

O le aumalaga fa'apitoa mo le sisigafu'a sa malaga i le MV Manu’atele i le aso Sa ua te’a. Peita'i o malo fa'aaloalogia o ta'ita'i o le Malo ma ona soatau, sa malaga i le va'alele i le aso Gafua mo lea fa'amoemoe i le taeao o le aso Lua, Iulai 16, 2019.

 

O le fa'amanatuina o lea aso taua i le Manu'atele, na lafo fo'i i le tupulaga talavou e latou te saunia fa'afiafiaga.

 

E o'o fo'i la i le sisiga o le tagavai a Manu'atele, sa fa'atino e le tupulaga talavou. Peita'i i le sauniga mamalu, sa faitauina ai le Poloaiga Fa'alaua'itele e le tama'ita'i o Letaua Olive Tagaloa, ma sa tolaulauina i le Gagana Samoa e Melody Vee. Peita'i o le fu'a a le Malo Tele, Fu'a Amerika Samoa ma le Fu'a Manu'atele sa sisi a'e ai e Brian Vivao, Salatielu Milo ma Gideon Mageo.

 

Na ta'ita'ia lea sauniga e le susuga le Faife'au Iosefo Autele, ae peseina viiga e le Aufaipese a Laumua i Fitiuta ma Faleasao i le Faleta'u.

 

E lua avanoa sa tu'uina fa'apitoa i le Kovana, faapea ma le Kovana Itumalo Laolagi Savali Vaeao, e tima'ia ai le mamalu na sasao i le fa'amoemoe, i se upu fa'amalosi mo tupulaga faia'e o le Manu'atele.

 

O fa'afiafiaga sa tapena i ai fo'i nei laumua e lua, Aoga Tulaga Muamua i Faleasao ma Fitiuta, fa'atasi ai ma le a'oga maualuga a Manu’a High.

 

Sa fa'ailoa mai ua le faia le tauvaga fagota lea sa fa'avasega e le DMWR mo le vaitau tonu lenei o le sisigafu'a a Manu’a ona ua leaga le tau, ae ua mae'a galuega lipea a le matagaluega o le pulega o le Gatafale o nei vaa uma e tapena ai mo lenei fu'a i Manu'a.

 

FAALELEIA SO'OTAGA TAUTUA & OFISA O FEMALAGA'IGA PUIPUIA TUAOI

 

Ua fa'ailoa mai, ua taumafai nei le Ofisa o Femalaga'iga ina ia mautu lelei ona toe fa'amalosia le va'ai toto'a i fa'amaumauga tusitusia i luga o pepa fa'atumu a i latou femalaga'i i le va o le  teritori ma isi malo tuaoi, ina ia mautinoa le saogalemu o le tatou atunu'u.

 

Ua matauina sa i ai se tasi na ulufale mai Pakisitana, ae leai sona pasese e toe fo'i ai, ma ua fa'amauina o ia o se tasi e asiasi mai e maimoa, ae emo ane le ata, o se tasi na malaga mai e sailia sona nofomau ai i Amerika Samoa po'o Amerika foi e ala i polokalama o tagata sulufa'i mai le tele o omiga o lo'o feagai ma i latou i lo latou malo.

 

Ua fa'aleleia atili polokalama i masini komipiuta ua fa'aaogaina i le malae va’alele ma le uafu i le teritori, ina ia mafai ona so'otaga ma isi ofisa uma o tiute, Ofisa o le Loia Sili lea e fa'auluulu i ai latou galuega, ae maise le latou Ofisa Autu i Utulei.

 

O le toe fa'aleleia atili o lea polokalama mo galuega saili a le Ofisa o Femalaga'iga na fa'atupeina la i se tasi o vaega tupe mai American Samoa Venture Fund, o se polokalama a le malo o Ameirka Samoa e fa’aaogaina ai se vaega tupe mai le fetarale.

 

Na fa'amanino atili e le susuga le Loia Sili i lana tautalaga i le fonotaga a le VASA, "I le taimi nei o lo ua fa'atulaga le toe fa'aleleia a'ia'i o le polokalama lea e talia ai e le matou Ofisa o talosaga mo pemita e malaga mai ai nisi mai le Malaeva'alele i Hawaii pe mai so'o se atunu'u lava ina ia mafai ona faia lea tulaga i le 24 itula o aso e 7 o le vaiaso, pe so'o se taimi lava."

 

"Peita'i ua i ai nei le ali'i IT e mafai ona ia fa'aleleia atili le polokalama ia mafai ona fa'ae'e lea si'itaga ina ia mafai ona faia lea suiga ma mafai ai ona talosaga mai e so'o se tasi pemita e ulufale ai i Amerika Samoa i so'o se taimi, o le ali'i lea o Keith Dalle."

 

Mai lea lava fo'i suiga i le polokalama o le a mataituina ai ituaiga o tusi folau e le mafai ona ulufale mai ai se tasi ma isi fa'amaumauga uma e tatau ona iloa lelei e tagata uma i lona fia ulufale mai i Amerika Samoa.

 

E le gata fo'i i lea, ae o le a maua ai fo'i ma i latou ua ulufale mai, ua umi fo'i o alaala iinei nai lo le taimi na atofa ia i latou e alaala ai i Amerika Samoa. Pe afai ae mae'a lelei ona fa'atulai lea suiga fou i le polokalama feso'ota'i a le Immigration Office, o le a fa'afaigofie atili ai lava ona faia le galuega o le siakiga o tagata femalaga'i a lea Ofisa o le tatou malo.

 

O lo ua faia nei mea uma, i suiga ua taumafai i ai le Ofisa o Femalaga'iga, ae saunoa mai le afioga le Loia Sili, ae le o suia ai le feagaiga osia e ese ai lava le fa'atautaiga o pemita ma le talosagaina o pepa nofo mau mo tagata uma mai le usoga i Samoa i Sisifo.

 

"O lo ua fautuaina lava le vasega o pisinisi, ina ia uia sa'o aiaiga o pemita e ulufale mai ai tagata faigaluega ma talosagaina fo'i fa'alelei o latou pepa e nonofo ai ma faigaluega i le tatou nei malo, pe afai ua le gafatia ona maua nisi e i ai tomai fa'apitoa e faigaluega ai i a latou pisinisi. O lea faiga ua mataituina ai le pemita faapitoa mo tagata faigaluega uma i le Kamupani I'a a le Star Kist ma le polokalama o loo faia ai latou pepa iinei,” o se saunoaga fa'apitoa lea a le Loia Sili.

 

FAUSIA TANE VAI MO A'OGA - MAUTINOA MAMA O LE SUAVAI TALI MAI TIMUGA

 

Ua i ai nei a'oga ua mae'a fa'atulaga latou Tane Vai Tetele e tali ai le Suavai Manino mai timuga ina ia fa'aaoga e le fanau a'oga i taimi uma i totonu o lotoa a latou a'oga. O le Manulele Tausala Elementary i Nuuuli, le a'oga a Lauli'i Elementary, ma Fagaitua High ua tofu ma tane vai e ta'i lua. O ituaiga o Tane Vai lea e fausia fa'apitoa mai e le Tank Guy of Pago Pago i Tafuna.

 

Peita'i o lo ua fa'ailoa mai, ua fa'auia i le Polokalama a le Ekalesia a Iesu o le Au Pa'ia o Aso e Gata Ai, le totogia o nei tane Vai mo a'oga uma e fia maua lea manuia, peita'i o so'otga o paipa ma tulaga o nei tane, o le a faia lea e le Aoga lava ia.

 

"Ua le toe i ai lava ni tamaiti e toe inu i le paipa i fafo o le falea'oga, ae ua gasolo lelei lava i latou e inu mai tanevai nei ua fa'atula'ia, ua le toe popole fo'i le matou i le palapala mai o le suavai i paipa,” o se tala lea a le tama'ita'i faia'oga mai le Lauli'i Elementary.