Ads by Google Ads by Google

Tala I Vaifanua


O le tolauapi a le fanau talavou ua faia nei a le EFKAS i Maugaoali'i Fagaitua. [ata: Leua Aiono Frost]

TOLAUAPI AUTALAVOU EFKAS I FAGAITUA - IULAI 11 - 13

 

E to'a 80 fanau talavou mai le 5 tausaga i le 18 tausaga ua aofia i le Tolauapi a le Autalavou EFKAS i Fagaitua i le latou Maota o le Galuega. O lo'o galulue malosi ai le susuga le Fa'afeaiga Rev Johnny Fano ma le faletua ma ua ta'ita'ia lea fa'amoemoe e le susuga Tunufa'i Le'iato, o le ali'i faia'oga i le Kolisi Tu'ufa'atasi o Amerika Samoa, peita'i o lo'o faamoemoe i le taita'iga lelei ale ali'i Foma'i Apera'amo Le'iato, e nate fa'atamo'ea le fa'amoemoe i aso ta'itasi.

 

I le taeao ananafi sa sau ai le solo fa'aaloalo mai le falea'oga o le A'oga Maualuga i Fagaitua ma o'o atu ai i le Maota o le Galuega, ma faia ai fa'amalositino a i latou uma lava.

 

Ua aofia fa'atasi le autalavou mai le vasega laiti se'ia o'o i le feololo ma le vasega matutua, ina ia mafai ona fefaasoa'i lagona ma iloa e aoga mo le fanau.

 

Ina ua mae'a le malu taeao fa'atasi ma matua fa'aleagaga, ona alo loa lea o fanau i le ulua'i a'oa'oga o le aso, "Tino Maloloina Lelei."  Lea sa talanoaina ai ala e tele ua lamatia ai le soifua maloloina lelei o le fanau, ona o vaila'au o'ona ma fuala'au fa'asaina. Ua avea fo'i le ali'i foma'i ma fofoga fa'asoa i le fanau, aua o iina fo'i, o lo'o taoto ai le anoanoa'i o vaila'au e tele, ua fa'asoa mai e togafitia ai gasegase, ae lamatia ai fo'i le soifua o fanau, pe a latou inu seseina.

 

O le auau o le fa'amoemoe ua fa'aigoaina, "Toe Afua se Taeao Fou!" O se auau e taua mo le fanau, pe afai o a'afia i ni faiga tuai e leaga ai le soifua maloloina i le tino atoa ma le Mafaufau, ae maise lava i le agaga, e afio ai le Atua..

 

Mai lea to'atele o le fanau, o lo'o fiafia le vasega o faia'oga eseese, o tina fo'i o le Ekaelsia, e saunia lelei e i latou mea taumafa aoga i le tino maloloina i taimi uma. Ia manuia le faiva o e fa'asoa, o le a maua atu ni sui mai le Ofisa o le Soifua Maloloina mo a latou folasaga i le aso lona lua, ae maise fo'i o ni a latou asiasiga i nofoaga eseese e taua i le soifua talavou ona latou iloa, e aoga mo le silafia o tupulaga talavou, e saili i ai pe a mana'omia fa'apitoa i o latou olaga. O le ASCC Land Grant ua fuafua fo'i e asiasi i ai, maua vala'au sui eseese e fa'amatala auiliili afuaga o gasegase tuga e ono lamatia ai le soifua talavou.

 

TAOFIA LEOLEO TA'AVALE LAITI (TAXI) SA LAISENE MO LE TOA STAND

 

E lua ni ta'avale la’upasese laiti (taxi) sa fa'atautaia mai latou auaunaga i le Toa Taxi Stand ua taofia e leoleo, aua ua latou toe tutu nei i nisi o Taxi Stand i le taulaga ma isi fo'i i Tafuna.

 

Ina ua fesiligia pe aisea, ona o lo ua le toe tutu i latou i lea nofoaga na tapunia fa'amalosi e le Komiti Fa'afoe o le Matagaluega o Fefa'ataua'iga. O le tala mai, "Ona ua fa'aleaogaina e le Komiti Fa'afoe a le Matagaluega o Fefa'ataua'iga le Laisene o le Toa Taxi Stand, ua fa'apea fo'i ona leai se laisene na pasia ai i latou e fa'atautaia le tautua lea, o le fela'ua'iga o tagata lautele.”

 

Lona lua, "Ona ua auau fa'atasi i latou uma e solituina le fa'atonuga ma fa'atulagaga o Pasese e totogia e tagata lautele e femalaga'i ai i luga o ta'avale laiti, o lea ua aofia fa'atasi ai ma i latou i lea solitulafono ua fa'atino i tagata lautele."

 

Ua fa'ailoa mai fo'i, "Ana latou ave'esea lava pepa fa'ailo sa fa'apipii i a latou ta'avale laiti, atonu e le alu fo'i i ai se sailiga a le Komiti Fa'afoe o le Matagaluega o Fefa'ataua'iga e taofia ma latou laisene, peita'i o le to'atele o i latou nei e fai taavale laiti sa tutu i le Toa Taxi, ua le aveesea e i latou sitika a le TOA Taxi sa fa'apipi'i i faitoto'a o latou ta'avale.”

 

I le taimi nei, ua tatau ona toe fa'afou e i latou nei o fai ta'avale laiti, ma talosaga mai nisi taxi stand, ona latou fa'aauau ai lea o le tautua, pe a mae'a pasia mai e le Matagaluega o Fefa'ataua'iga a latou laisene fou.

 

O le masina o Setema lea ua fa'atulaga e le Komiti Fa'afoe o le Matagaluega o Fefa'ataua'iga e faia ai le iloiloga patino mo le TOA Taxi Stand ona o le latou solituina o le tulafono o si'itaga o pasese o ta'avale laiti laupasese.

 

MANUIA TAUMAFAIGA FANAU JUNIOR SOLAR SPRINT - TULAGA FITU

 

Mai le aumalaga na masi'i atu mo le tauvaga a le STEAM, lea na avea ai le autauva mai le a'oga a le Pacific Horizon School ma sui o Amerika Samoa ina ua latou manumalo i le tauvaga a le STEAM i le teritori, ua tulaga fitu i latou mai le to'a 500+ o fanau tauva mai le to'a 100 mai a'oga eseese o setete ma teritori sa auai.

 

"O le tausaga lenei ua silisili ona taua, aua o se tulaga sili lea ona maualuga ua ausia e se tatou aumalaga e tauva i le STEAM talu ona tatou auai. O le fa'afetai e tatau ona tatou si'i a'e fa'atasi aua, o ai na manatu o le a tatou maua lea tulaga,” o se tala lea a le sui sa faufautua i le aumalaga, Edna Asalele Noga mai le ASPA.

 

O fanau aoga nei o Edrik Scanlan Gaisoa, Daniel Hyuk Wang, Bianca Alenna Serrano ma Petania Fou Sagaga mai le Pacific Horizon School sa avea ma sui o Amerika Samoa.

 

“Ua avea lenei tulaga taua ua maua mai e nei fanau e toe fa'amalosi'au matagofie i le STEAM atoa ma fanau a'oga maualuluga uma, aua ua iloga nei, e mafaia fo'i ona tulaga muamua se tasi au malaga e tauva, i se tasi o tausaga o lumana'i i lenei fa'amoemoe,” o se toe fa'ailoa mai lea a Noga.

 

O le tauvaga sa faia ia Iuni 28 e o’o ia Iulai 2, 2019.

 

"O le avanoa na maua, ua tele nisi mea aoga ua maua ai, e fai o le tele o uo ua fa'amasani ma ua fetufa'i i poloketi sa fa'atauva ai, ae o le naunau fo'i ina ia toe fa'aleleia atili le iloa i lea fo'i vaega o ituaiga o a'oa'oga fa'atekonolosi, ia fa'afaigofie atili ona si'itia le iloa e tauva ai i nisi tauvaga o lumana'i,” o tala fiafia lea a le ali'i o Petania.

 

Ua matua fa'afetai mai i latou na malaga i le avanoa sa latou maua, e tauva ai ma fa'aleleia atili fo'i le atamai ina ia savali ma le toto'a e aga atu i le tele o ituaiga o tekonolosi o le talutalu fou ua tatou maua i lenei vaitau, ma aga'i atu i le lumana'i.

 

O le isi vaega o le latou fa'afetai ua tu'uina atu i le STEAM ma i latou sa avea ma latou pa'aga na sapaia le tauvaga ae maise o le fa'atupega mo le fa'amoemoe sa malaga i ai.