Ads by Google Ads by Google

Tala I Vaifanua


O le vasega fa'au'u mai le Pacific Horizon School i Tafuna. [ata: Leua AIono Frost]

O le ali'i togisilia i le Manumalo Baptsit Academy 2019 i le vasega fa'aiuaso, Hewlett De Lara ma lona aiga atoa, fa'atasi ma ana uo mamae ma latou aiga. [ata: Leua Aiono Frost]

8 AU FAAU'U MAI LE PACIFIC HORIZON HIGH SCHOOL

 

O le afiafi o le aso Lua i le Fatuoaiga Theatre na faia ai le fa'au'uga o le a'oga maualuga a le Pacific Horizon.

 

E to'avalu le fa'au'u, ae to'alua i la'ua sa tutusa togi na ausia e avea ai ma Togisilia tausaga 2019 -  Gloria Park ma Meida Lin.

 

O le tulaga lua na maua e Alia Tuiolosega ma sa maua fo'i lona avanoa e saunoa fa'apitoa ai mai le amataga o le latou sauniga o le fa'au'uga.  Sa ia tima'i i le vasega, "Tatou tumau i le faamoemoe ia tausaili le atamai, ia maua ni o tatou faiva lelei e tautua ai matua, aiga ma le malo. E le faigofie le ala, ae faigofie pe afai e tatou te tatalo i le Atua e fa'amalosi mai ia i tatou, ae maise i taimi e le taugalemu ai. Ia manuia outou sailiga, aua ne'i galo le Laumua na tatou mua'i tausaili mai ai."

 

O le fofoga o le latou aso na toe aumaia mamao ai le latou faia'oga a'o vasega 5, Mrs. Amy Dale, na toe sau mai Canada. "Ia manatua le mea na outou amata mai ai, lau taumafaiga ma i latou na fesoasoani ia te oe i taimi uma, ma le mea e te aga'i atu i ai. Ua mae'a nei vaega e lua, ma ua fa'asaga atu lau folauga na'o oe, ia e iloa lelei, tauave lau sini na mafua ai ona e tu'ua le aiga ma lou malo, ia e toe taliu mai ma le manumalo."

 

"Ia e alu mamao i au sailiga, ia e va'ai ma ia fa'atumu lau ato i tomai e mo'omia ona e tautua ai. Ia faia ma le fiafia mea uma, ae a o'o ina mae'a au sailiga, ia e manatua le mea na e sau ai, ma le fa'amoemoe na e tu'ua ai, toe taliu mai i fanua, ma ia fa'amatagofie ou ala uma. Ia faia se suiga lelei i lo tatou siomaga, e fai ma sao o lau sailiga."

 

I le saunoaga a Meida Lin e fa’apea, e amata mai lana a'oga i le vasega 3, e matua ia leiloa lava se fa'aperetania, e le'i mafai ona ia talanoa i lea gagana i tamaiti uma o lana vasega. E leai se faigofie i lana taumafaiga ma sa ia tagi i lona tina, e le fia a'oga aua e le mafai ona ia feso'ota'i ma lona faia'oga, faitau se tusi pe iloa fo'i se mea o ia alu i ai e a'oa'o ai o ia. O lana fa'afetai sa ia avea i le Pacific Horizons School, e ui ina faigata, ae sa latou taumafai e faia se suiga i lona ola taumafai i a'oga fa'aperetania.

 

“Na i ai se polokalama na fa'aaogaina, ina ia vave ai la'u faitau ma lo'u malamalama i le gagana Igilisi, fa'afetai o lenei ua ou tu atu i lou toe taimi o le Pacific Horizons, ua avea a'u ma se tasi e saunia se fa'afetai ma le lauga mo le vasega fa'aiuaso,” o sana tala lea.

 

Mo Gloria Park, sa ia fa'ailoa ai, ua fa'ato'a fo'i mai o ia i lana malaga sa avea ai o ia ma sui e tau'avea lana galuega fa'atino ina ia fa'aalia i le Fa'aaliga o Galuega Fa'atino Fa'asaeanisi a a'oga maualuluga i Amerika. O se fa'aeaga sili ua ia maua mai le taumafaiga sa fesoasoani i ai le to'atele o ana faia'oga i le PHS, ma ua ia iloa, ua lava tapena fo'i o ia mo le fa'amoemoe i Iunivesite ma Kolisi i fafo.

 

"O se lu'iga e le faigofie le ala o i luma atu. Ia iloa le mea na e sau ai, fa'aaoga uma fesaosoani i so'o se mea e te maua ai ina ia ausia le fa'amoemoe, ma toe taliu mai e fa'aleleia ma fa'amatagofie le nu'u ua avea ma ou nu'u, le malo ua avea ma ou malo."

 

Na tutula'i le sui mai le Ofisa o Aumua Amata e tolaulau suafa mo tusi pasi fa'apitoa mai le Konekeresi a le fanau fa'au'u. Na fa'apea fo'i ona tutula'i Senatoa Faiivae Alexander Godinet mo le fa'alauioaga o le sui ua ausia togi ma agava'a mo le sikolasipi a le Malo o Amerika Samoa, le tama'ita'i o Alia Tuiolosega i lona togi GPA 3.87.

 

8 AU FA'AU'U - MANUMALO BAPTIST ACADEMY

 

E to'avalu le fa'au'u mai le A'oga Maualuga a le Manumalo Baptist Academy lea na faia le latou fa'au'uga i le taeao o le aso Lulu, i le malumalu i lea lava Laumua i Malaeimi.

 

O le vasega fa'au'u lenei a Manumalo, ua silisili ona ta'uleleia ma togisilia ai Manumalo Baptist i le tele o galuega fa'atauva i le va o a'oga maualuluga i le teritori.

 

Sa tula'i le afioga le Sui Kovana, Lemanu Peleti Mauga ma ia talatala le fa’auuga, ma fa'apea foi ona molimauina e le tama'ita'i Fa'atonusili o A'oga Dr Ruth Matagi-Tofiga, ma ia fa'apea ai, "O le Manumalo le a'oga ua fa'amaumau i faila a le Matagaluega o A'oga, ua maoa'e fo'i ana galuega fa'atino i taumafaiga a sui tauva i fa'aaliga eseese ua fa'atauva ai fanau a'goa maualuluga. Ua fai lava latou sui o lo ua malaga i fafo e fa'aalia latou galuega fa'atino Fa'asaeanisi, tau le Tala Fa'asolopito, Tusiaga ata ma isi, aua ua maoa'e lava lo latou tula'i mai i lenei vaitausaga, lea na a'o'oga mai ai.”

 

"E le gata i lea, ae ua mautinoa lava ua latalata i le miliona tala le aotelega o fa'atupega fa'asikolasipi ua ofoina nei i le fanau fa'au'u e na'o le to'avalu. O se isi lea matati'a ua iloga ai, ua le faia na'o le fanau le sailiga, ae ua mau loto o le vasega o faia'oga, faufautua ma le pulega, ia fesoasoani i fanau e fa'aauau a'oa'oga i fafo. E to lo'u pulou ia te outou le Laumua i Manumalo Baptist Academy,” o se tala lea a Matagi-Tofiga.

 

O i latou na maua togi maualuluga: Aitulagi Alofa GPA 3.91, Ben Schuster 3.92; ma le togisilia Hewlette De Lara GPA 3.96 ma lana SAT e 1390.

 

Sa saunoa Hewlette De Lara mo lana upu fa'amalosi i le latou vasega fa'atasi ai ma le fa'afetai mo matua ma aiga i le latou fesoasoani atoa ai ma faia'oga.

 

"E ui ina louloua le ala i le atamai, la'u vasega fa'au'u, lea ua tatou gafatia ona fa'amae'a, ma ua fa'afiafiaina fo'i nai o tatou matua ma aiga, ae maise le Laumua nei i faia'oga ma le pulega, ina ua tatou fai le faiva ma ua mafai. Faamalo ia i tatou uma le tausuai i mea lelei, e ui ina tautiga i le taumafaiga, ae o fua o galuega e toe faafo'i mai ai le agaga fa'agaeetia i le fiafia, aua ua tatou fai ma ua mafai,” o sana tala lea.

 

O le sao o Aitulagi Alofa sa ia molimauina ai, "So'o se taumafaiga e tatau lava ona amata mai le lotoifale o le aiga o e mua'i tapena mai ai. O le fa'asili ma le fa'amua e tatau ona si'itia i le Atua, aua e leai se taumafaiga e a'e manumalo pe afai e le au ma le Atua i mea uma. O le fa'afetai ma le fa'amalo i matua ma aiga, o le PTA ma le vasega o faia'oga uma, ae maise lava le latou vasega e to'avalu. Folau la'ia e taumafai mai ni sao mo a taeao! O le aso lenei o le a tatou valavala ai, o se fa'anoanoaga lenei, ae ua mausali le tatou mafutaga, e tatou te to'eseanu'u potopoto.”

 

Na tula'i le susuga le Fa'atonu o A'oga a le Manumalo, o le ta'itaifono fo'i o le Komiti Fa'afoe o le Manumalo Baptist Academy, Papali'i Lauli'i Alofa, ma ia fa'aoo ai le fa'afetai i le mamalu o sui mai le faigamalo ma le Matagaluega o A'oga, "Aua o a ni fua ua tatou molimauina i le aso, o fua nei o galuega na galulue fa'atasi i ai le Malo ma taupulega a lenei a'oga tumaoti. Ua tatou iloa fua o galuega lelei, e fua mai pea i mea lelei."

 

I matua sa ia fa'afetaia lo latou nopia'i i le taumafaiga e fa'aa'oga latou fanau pele i le Manumalo, e ui ina taugata pili o a'oga. "Ou te fa'afetai pe afai ua outou va'ai i le aso ma ona 'ai, talosia ae ua fa'amalieina outou i fua o a outou pili totogi, e mafai ai ona matou tali atu, ua a'oa'oina a outou fanau. Ua tali fo'i i lo outou tautiga."

 

Na taua'aoina fo'i tusi pasi fa'apitoa mai le Sui i le Konekeresi, le afioga Pulu Ae Ae Jr ma Lemanu.

 

O Donna Gurr o le Komiti Fa'apitoa mo Sikolasipi a le Malo o Amerika Samoa sa ia tula'i e fa'alauiloa fo'i i latou ua maua sikolasipi mai le tatou malo: Hewlett De Lara; Aitulagi Alofa; Komisi Suani ma Yolanda Masunu. Ua tele fo'i Iunivesite ma Kolisi i fafo ua faia i ai filifiliga a le fanau fa'au'u lenei, ae maise o lo'o ua mae'a mautu fo'i le avanoa a le USAir Force Academy e malaga atu ai Ben Schuster, ma le USNavy Academy mo le tama'ita'i o Aitulagi Alofa.

 

(Tagai i le lomiga a le Samoa News i le aso ananafi ma le aso Lulu i suafa o le au fa’au’u mai aoga a Manumalo ma Pacific Horizons. O lo’o lagolagoina nei lipotia a le Samoa News e le Paramount Builders.)