Ads by Google Ads by Google

Tala I Vaifanua

AMATA VA'AIA E FOMA'I SHRINERS GASEGASE I LE ASO LULU NEI

 

Ua talia nei e Foma'i mai le Shriners i Honolulu nisi o gasegase tau le Ponaivi e amata i le aso Lulu nei, Me 15, 2019.

 

E mafai ona fa'atulaga taimi e te va'aia ai le foma'i, ae sili ai lava le susu ane i le falema'i Surgical Ward mo lea fa'amoemoe. Ua fautuaina matua ina ia o'o ane ma le fanau o lo'o matauina o i ai ni fa'aletonu tau le ponaivi i so'o se totoga o lona tino, pe afai e le atoa le 18 tausaga o le tamaititi.

 

Ua amata nei ona faia talavai a nei fo'i mai le aso Lulu se'ia o'o i le aso Faraile, ae o'o ane e fa'atulaga muamua lou taimi e avanoa ai le foma'i ina ia va'aia oe ma lou alo. Ua mafai fo'i ona nonofo lava foma'i nei se'ia o'o i le aso Gafua, Me 20, pe afai ae to'atele na'ua gasegase e fia va'aia foma'i faapitoa nei a le Shriners.

 

Ua tima'ia mai e le susuga Taotasi Archie Soliai, o le Shriners Club o Amerika Samoa, le mamalu o matua ina ia tautuana, o lo'o faia fo'i le Ta'amilosaga Tapolo a le Shriners Club e saili tupe ai mo le pasese o foma'i nei ma le latou nonofo ai iinei, ma e mafai fo'i ona fa'ailoa lou loto fa'afetai e ala i sou sapaia o lea taumafaiga aua fo'i se alo o se isi aiga o lo'o afaina, e mafai ona totogia ai le malaga mai a nei foma'i mo nisi gasegase ia togafitia o le tatou atunu'u, po'o le auina atu fo'i i fafo o tatou gasegase e faia ai taotoga fa'apitoa.

 

FOAIA LE TA'AVALE MO LE ASCC TRADES & TECH DEPT

 

O le Polokalama o A'oa'oga mo Matata Eseese a le Kolisi Tu’ufatasi a Amerika Samoa (ASCC) na foa'ia atu i ai se ta'avale o loo ola lelei ae mautinoa e i ai ni galuega toe faaleleia e ao ina faia i ai, aua o le tausaga ma le ituaiga o lea ta'avale lea o le 2003 Ford Explorer.

 

O lea foa'i taua na tua'aoina lea e le Ofisa o le Natural Resources Conservation Services a le Matagaluega o Faato'aga a le fetarale (USDA).

 

"O lona uiga o le a fa'aaoga tatau lenei meaalofa taua e le fanau a'oga i lea ituaiga o kosi, e fa'aaoga i ai latou tomai e fa'aleleia ai atili ia matagofie le tino mai o le ta'avale lea, ma ia fa'aauau ona olaola lelei pea,” o se tala lea a le susuga Fres Suisala, le fa'atonu o le TTD a le ASCC.

 

O le fa'afetai a le ali'i fa'atonu o Aoaoga Matata Eseese a le Kolisi Tuufa'atasi Fred Suisala, sa fa'aleo lea ia Joe Uiagalelei, e faigaluega fo'i o se tasi o ali'i inisinia a le USDA-NCRS, fa'apea ma le Regional Director Richard Haris ma le latou Ofisa atoa, ona o le manatu fo'i ina ia fa'amatu'u atu lea Taavale e avea ma se auupega e fa'atuputele ai le iloa ma fa'alautele suesuega lelei o tomai o le fanau a'oga matata eseese i le tatou nei kolisi.

 

Ua fa'ailoa fo'i e Suisala, "E matele lava ina fa'amoemoe matou uma i ta'avale a nisi o fanau a'oga, po'o faia'oga fo'i o le Kolisi, e aumai i le matou falea'oga, ma matou fetagofi e toe fau fa'alelei le tino, pe toe fa'apipi'i totoga tuai ae suia i totoga fou, ae o se taimi muamua lenei ua foa'ia mai ai se meaalofa o se ta'avale o atoa lelei, mana'omia ni galuega toe fa'aleleia ma lipea e faia i ai, ae o lo'o ola lelei ma fealua'i."

 

"O se fiafiaga la ua i ai nei i le matou vasega, aua ua i ai se matou lava ta'avale e matou te fetagofi e toe fausia lelei le tino ma fa'aleleia atili totoga, ma ia fa'apasi ai fo'i vasega a le fanau o le a fa'au'u i lenei tausaga,” o se toe tala lea a Suisala.

 

Ua fa'ailoa fo'i e Suisala, i le to'atele o tagata lautele o lo'o tele ta'avale ae leai se isi e toe fa'aaoga i ai, e mafai ona foa'ia mo le a'oga, ae maise o Pisinisi fo'i i le atunu'u. "E i ai lava ta'avale na ua tuai, e tatau ona toe fa'alelei tino, ae maise o nai mea lava o tau fa'aletonu i isi totoga, e mafai ona foa'ia mo i matou e faia ai a'oga a le fanau, poo le aumai fo'i, a maea ona faia le tino, ona totogia lea o le pili ae toe avatu lau ta'avale, ae ua mae'a faia ai a'oga a le fanau."

 

"O le a fuafua tatau lava, e mafai ona fa'atalanoa muamua se avanoa, ae le mafai ona la'u uma mai ni ta'avale se tele e fa'atino atu i le lotoa a'oga ni galuega pei o se faleinisinia. Ua na'o se ituaiga o ta'avale e aumai e fa'aaoga e faia ai a'oa'oga mana'omia ona fa'atino e le fanau a'oga, ma fa'aleleia ai, e mafai fo'i ona foa'ia ma le matou vasega atoa, pe toe avatu a'o se totogi fo'i mo le tautua sa fa'atino ai,” o se toe fa'amalamalama lelei lea a Suisala e tusa o lea mataupu.

 

TAULA LE "MV WISE HONEST" - MAUA TUPE ASG

 

O lo’o maua le tupe a le malo o Amerika Samoa mai le fetarale e ala lea i le totogi ina o le taulaina o le va’a oloa, “Wise Honest” i le uafu i Fagatogo a le malo o Korea i Saute, sa taunu’u mai i le atunu’u i le fa’aiuga o le vaiaso ua te’a.

 

E le’i mautinoa i le taimi nei le aofaiga o le tupe a le malo o Amerika Samoa o lo’o maua mai i le fetarale, ae ua fa’ailoa mai e nisi e fa’apea pe tusa o Tesema o lenei tausaga fa'ato'a toe tu'uva'a ese atu ai le va’a.

 

Fa’ailoa e le so’oupu a le Coast Guard, Amanda Wyrick, e fa’apea o le umi e i ai le va’a i le teritori, e fuafua lava i le taimi e ma’ea ai suesuega a le US Justice Department, lea o lo’o faia i le taimi nei.

 

Saunoa le sui o le Coast Guard i le teritori, Lt. Al Blaisdell, "E le o fa'atamala le USCoast Guard i le leoleoina o le uafu. O lo'o mataalia lava le matou vaega i o latou tiute uma e ao ina fai ia mautinoa le saogalemu o mea uma.”

 

"O le taimi nei, o le so'otaga o le fa'atinoga o tiute a le vasega o Leoleo Uafu a Amerika Samoa, le Us Coast Guard ma le au suesue fa'apitoa a le US Justice Dept. ua matua lelei lava, e leai ma se fa'aletonu o toe matauina i le fa'atinoga o latou tiute, ia mautinoa le saogalemu o le va'a ma tagata ma le Uafu atoa ma le atunuu,” o se tala lea Blaisdell.

 

O lo’o i ai fuafuaga e se’e atu i se isi vaega o le uafu le Wise Honest e taula ai ae fa’aavanoa lea vaega o le uafu mo isi va’a oloa.

 

O le Wise Honest sa taofia e Amerika ia Aperila 2018 i le malo o Indonesia ona o le masalomia o lo’o fa’aaoga la’u ai oloa a Korea i Matu, i isi atunu’u o le lalolagi, ae o se solitulafono foi lea i nisi o vaega o se Iugafono a le Li’o o Malo Aufa’atasi, fa’asaga ia Korea i Matu.