FONOTAGA MO GASEGASE O LE MAFAUFAU - MO LE MAFAUFAU & LE TINO

Ua tauaofia nei le fonotaga e talanoaina ai ituaiga gasegase eseese o le Mafaufau o lo'o faia lea i le LDS Malaeimi Hall ma e faia mo aso e lua, ananafi ma le aso.

O le ulutala o lea tauaofiaga, "Mo le Mafaufau, Mo le Tino!" Aua ua matauina lava, e matele tagata ina vave sulufa'i e saili togafitiga mo latou gasegase o le soifua maloloina, ae ua le anoano tele e saili togafitiga o gasegase tau le mafaufau, pe a o'o ina lagona e i latou ua i ai ni suiga i o latou mafaufau. Ua aoga tele fa'asoa o lo'o tima'ia ai le mamalu lautele, i mea e ao fo'i ona nofouta i ai, e ao ai loa ona e amata saili togafiti pe afai ua e fa'alogoina.

O le galogalo o mea, ma ua afua ai ona tiga lou mafaufau, maitaita gofie fo'i ma isi mea uma fa'apena, ua tau le mafai ona taofiofi mamau lou ita vave ma mana'o e fa'atupu loa se fa'alavelave e ono a'afia ai nisi o lo'o fa'atasi ma oe.

O auga na e mafai ai ona iloa, ua tatau ona sailia togafiti ua i ai se fa'aletonu i lou mafaufau, ma afai e vave fa'afo'ia e ala i togafitiga, e mafai lava ona umi se taimi o soifua pea, ao tumau le malosi atoatoa o le mafaufau.

O lo'o i ai foma'i fa'apitoa ma nisi o le 'aumalaga mai fafo ua mae'a fa'atulaga e faia folasaga i lenei semina, ma ua tatau fo'i ona fa'afofogaina e le mamalu lautele nei tima'iga aoga. Ua matala fo'i le faitoto'a o lenei semina i le mamalu lautele, e le tau fa'atalitalia se vala'aulia fa'apitoa e te fa'afofoga ai i lenei fonotaga.

Ona o le tatou atunu'u ua to'atele i tatou o lo ua mae'a tautua i vaega eseese o le Militeri, o lea ua matele ina togafitia ai tatou fitafita tuai ua litaea mai le vaega au, i gasegase o le Mafaufau lea e fa'aigoaina o le PTSD, peitai e le na'o fitafita sa tautua i le vaega au e maua i le PTSD, e i ai fo'i le to'atele sa tigaina o latou soifua mai galuega mamafa, tele taimi sa faigaluega ai e leai se malolo, i latou e matele ina itaitagofie ma latou fia fa'atupuina vave se fa'afitauli, o i latou na e maua ai fo'i.

Faailoa mai e le tama'ita'i foma'i o le mafaufau Dr McCutcheon, "O le to'atele lena e manatu ua na'o fitafita tuai e maua ai lea ituaiga gasegase o le Mafaufau, leai, e iloga lava i le to'atele o isi e le'i o lava i ni tautua fa'apena, o lo ua maua ai fo'i.”

"Ua tele fo'i a'afiaga e tutupu mai ona ua amata ona vaivai taofiofi e lou mafaufau ma onosa'ia le tele o mau mea, e mafua ai ona e fa'apea ane, ua leai sou aoga. Pe ua e le toe fia ola i lenei olaga. O mea fa'apena e afua ai ona taumafai le isi tagata e pule i lona soifua. O isi na a'afiaga o le Mafaufua ua fa'agasegasea,” o se toe fa'aopoopo mai lea a le tama'ita'i foma'i.

FA'ATAUA AUAUNAGA FAIAOGA MA TAUSIMA'I I LENEI VAIASO ATOA

O lo’o pisi le atunu’u i le taimi nei, aua ua pa'u fa'atasi mai le Vaiaso e Fa'ataua ai le Auaunaga a Ali'i ma Tama'ita'i Faia'oga ae ua fa'apea fo'i ma le Vaiaso Fa'apitoa mo Ali'i ma Tama'ita'i Tausima'i.

Ona o le vaiaso fo'i ua fa'asino e fa'ataua ai le Aoga o Tina, ua tolu ai mea tetele fa'ataua i le teritori. Ua taumafai atu la e su'ia sou ofu fou, ua matua faigata lava. Ua fa'apea fo'i ma se taumafaiga e faia sau Fofo ma teuteu nai ou atigilima ma atigivae, e le o toe faigofie ona e maua se avanoa, se'i vagana ua e matua nofonofo ai i le taeao atoa, e afua atu i le taimi nei.

O le lapata'iga ua tu'uina atu, alofagia nai tina ua litaea ma ua lava o latou taimi aua ua nofo fale, ia amata ona gasolo tatou e teuteu le lauao, faia atigilima ma atigivae ae maise vave ave lou ofu e su'i, ae se'i fa'amatu'u mai nai toe taimi o le tatou vaiaso atoa, se'i oo atu ai nai tina faigaluega, e faia sina teuteu i toe aso o lenei vaiaso.

Peita'i o le fa'ataua o galuega a Faia'oga, o se mea taua i le li'o o le aiga. Aua o le lumana'i o aiga uma, ua fa'amoemoe lea i le matafaioi tau'ave a Faia'oga i aso ta'itasi.

Ua fa'apena fo'i le auaunaga a le vasega o Tausima'i, i latou ua fa'amoemoe atu i ai le mamalu o le atunu'u pe a o'o ina lutia le folauga i gasegase o le tino ma le mafaufau.

Ua iloga o le vaiaso fo'i lenei e fa'ataua ai ma galuega fa'atina i totonu o le Aiga, lea e tau'ave e le Tina.  O ai se a le manatu i lona tina, e moni ai fo'i le upu, "A leai se Atua i lenei lalolagi, a'o i ai se tina i lona aiga, e avea ma to'omaga."

O lo'o fa'asolosolo mai pea ata o le vaiaso o Faia'oga ua tapena i ai le PTA ma latou a'oga e fa'afetaia.

I le vasega o Tausima'i ua fa'asolo le latou polokalama sa mua'i faia le sauniga i le Aso Sa e amatalia ai le fa'amoemoe. Ona soso'o lea ma le aso Gafua ua faia le latou Fa'atasiga i le Latou Malumalu i le Falema'i e tufatufaina ai latou fa'ailoga mo i latou o tausima'i ua agava'a ai.

Soso'o ma le aso Lua ua faia le latou savaliga fa'amalositino mai Nuuuli se'ia pa'ia le Paka i Faga'alu, ma faia ai le latou talotaloga i le mamalu fegasoloa'i, ma tapu'e ai latou ata. 

Aso Lulu ua fa'ae'e i latou uma ua avanoa i pasi ma malaga atu i Aunu'u mo le latou asiasiga. O le taeao nei ua faia ai le latou fa'amalositino i le Falema'i i Fagaalu ae o le aso Faraile e toe fa'atasi ai fo'i i Faga'alu lava ma faia ai teuteuga o atigivae ma atigilima ma fofo ai latou tino.

Ona sami fo'i lea o le latou vaiaso atoa i le latou siva e faia i le afiafi o le aso Faraile.

FA'ASA E SAMOA ONA FA'AULUFALE ATU - TEUFUGALA'AU MAI AMERIKA SAMOA

Ona ua mautinoa nei ua matua tele lava le ituaiga o Loi lea e fa'aigoaina o le "Fire Ant" i Amerika Samoa, o lea ua fa'amalosia ai se taofi mai le Matagaluega o Fa'ato'aga a Samoa, ua le toe mafai ai ona avatua ni fugala'au moni mo ula ma teu mai Amerika Samoa.

O lenei fa'asa na fa'amamalu mai i le masina o Ianuari 2019.

Ona o lea fa'asa, ua le mafai ai nei ona faia nisi o oka e masani ona fa'atutu mai i Amerika Samoa a le vasega o Pisinisi mo Ula ma Pale Fugala'au manogi, ae ua o'o fo'i i le vaitau e mana'omia ai tele, i le aso o Tina ua loma nei.

I le masina ua te'a na toe fa'asalalauina fa'alaua'itele ai se lipoti a le Vasega o Fa'ato'aga a le ASCC lea sa latou faia se suesuega i le fa'ateleina o le Fire Ant i Amerika Samoa, ma sa fa'amaonia e lea vasega, ua fa'ateleina afio'aga ua maua ai nei lea loi.

O le CEO o le Matagaluega o Fa'ato'aga a Samoa, Tilafono David Hunter, sa ia fa'ailoa mai, "O le fa'asa lenei e aofia uma ai atunu'u ua mautinoa ua maua ai lea ituaiga o Loi, lea e aofia ai Amerika Samoa, Hawaii ua mae'a fa'ailoa mai o lo ua maua ai le Fire Ant i o latou laufanua."