Ads by Google Ads by Google

Tala I Vaifanua


[ata: foa'i]

3 MASINA O TOTOE MAE'A FALEMA'I HOPE DIALYSIS CENTER

 

Ua fa'ailoa e le susuga Chris Fisher, sui o lo'o va'aia le fausaga o le falema'i Hope Dialysis Center i Iliili, fa'afesaga'i tonu lava ma le Malae Tapolo, "Ua toe tolu lava masina ona mae'a lea o le fausaga o le falema'i lenei. O le fausaga le o le fale, peita'i e ao ina tapena mai uma i ai mea faigaluega e fa'atulaga ina ia talafeagai mo le pasiga a le Centers for Medicaid and Medicare Services (CMS) a le Malo tele. A pasia, ona laisene ai lea o le galuega atoa, ona fa'ato'a mafai ai lea ona pasia e va'aia ni gasegase mo togafitiga."

 

O se tala fiafia lenei ua leva ona moemiti i ai le to'atele, aua ua le mafai ona malaga mai nisi o matua matutua ma nisi fo'i ua litaea mai galuega o lo'o ua fa'amama o latou toto i le tele o fa'alavelave e faia i Samoa nei, ona o le le lava o avanoa e mafai ai ona fa'amama o latou toto i le tatou falema'i tele i Faga'alu. Ua mana'omia lava ona toe fa'aopoopo nisi masini fa'amama toto ina ia avanoa ai mo nisi e femalaga'i.

 

Saunoa Fisher, "O lo'o mana'omia ona i ai se Foma'i Fa'apitoa mo gasegase tau Fatuga'o, ma ou te fa'afetaia fo'i aua o lea ua maua mai se tasi ua mae'a ona fa'atalanoa ma ua fiafia e tautua i le tatou falema'i fou lenei. O le a mafai fo'i ona o'o mai i le taimi tonu e fa'atulaga atoatoa ai le Hope Dialysis Center."

 

Ua fa'ailoa e Fisher, "Ua silia ma le lima masina talu ona amatalia le galuega o le falema'i fou, peita'i ua mae'a fo'i ona fa'atauina mea faigaluega e fa'ameafale ai le falema'i. O mea faigaluega uma lava ua mae'a pasia lelei e fa'aaoga i falema'i i Amerika, o lona uiga, e leai lava se tuai ona mae'a fa'atulaga o le anofale o le Hope Dialysis Center, pe a mae'a loa ona fausia o le fale atoa."

 

E lima Kamupani o galulue ina ia fausia le falema'i lenei e tusa o aiaiga uma o fausaga o falema'i i Amerika, ma afai e o mai le pasiga a le CMS, e ao ina mautinoa lelei e i latou uma, ua agavaa le fausaga ma lona anofale atoa mo le togafitiga o gasegase fa'amama toto.

 

E $300,000 le tupe o lo’o maua e le Hope Dialysis, i lalo o le polokalama o le nonogatupe a le ASG Venture Funds - e fa’atupeina e le malo fetarale.

 

Ua galulue fa'atasi fo'i le vasega o kamupani faufale ma le ASPA i ana tautua lautele, le Bluesky Communications i ana laina o feso'ota'iga, ae maise o le DOC ma le Matgaluega o Galuega Lautele a le Malo ina ia mautinoa ua vagaia le galuega ia atoatoa mo le pasiga.

 

Ua fa'ailoa mai e Fisher, "O falema'i i fafo e matele ina fausia mo le 12-18 masina o faia, peita'i ona o lea e laititi le falema'i lea ua amata ai le tautua a le Hope Dialysis Center, lea ua itiiti ai fo'i le taimi, ae ua i ai le isi falema'i tele e soso'o lava lona fausaga ma le falema'i lea pe a mae'a pasia. O le a fa'atele atili ai le Talavai Fa'amama Toto lava ma soso'o mai ai loa ma se falema'i tele mo talavai eseese e pei ona mua'i mana'omia e o tatou tagatanu'u uma ua va'aia foma'i fa'apitoa na aumalaga mai a le Hope Ministries i tausaga taitasi mo le 7 ai lenei o tausaga."

 

O Fisher o se tasi ua masani i le fa'atula'ia ma fausia o falema'i fou i Amerika ua fa'apea fo'i ona lava lona silafia i le taumafaiga e sailia tupe e fausia ai galuega fa'apea. Ina ua fesiligia i tulaga tau le seleni, ae fa'ailoa mai e ia, "E leai se mea e popole ai, ua lava ma totoe le sailiga, ma e le faigata fo'i ona toe fa'aopoopo le fa'atupega pe a i ai se mana'omia mulimuli ane."

 

E le gata ina aumaia fa'apitoa e le Hope Dialysis Center le Foma'i Fa'apitoa o Fatuga'o, ae ua fa'apena fo'i ona aumaia fa'atasi ai ma le Dietician po'o le Foma'i Fa'apitoa o Mea'ai Paleni ma le Tatau mo le Soifua Maloloina o le tagata.

 

Ona o lona agava'a i le sailiga o Kamupani Faufale e mafai ona galulue fa'apitoa i poloketi fa'apenei, ae o lona silafia fo'i i aiaiga a le CMS ina ia mautu o fausia ai le falema'i fou, ua ia fa'ailoa mai ai, "Ou te mautinoa e le mafai ona ela le pasiga ua aga mai i ai le CMS mo le tatou galuega lenei. O le mea o naunau i ai, ia vave ona toe fa'atu ma le isi fa'alautelega atili o le falema'i pe a mae'a pasia le galuega muamua lenei."

 

Ina ua talanoa atu i nisi o nai o tatou tagata matutua o lo'o fitaituga i le fa'amama toto i le tatou falema'i, ae fa'ailoa mai e se tasi o tina matua, ua atoa le lima tausaga o fa'amama lona toto, "Se fa'afetai, o le tatalo, ia maua atu lena vaitaimi, se'i va'ai atu ua tula'i lena falema'i fou, pe a mai ni togafitiga o gasegase. E le fa'apea o leaga ona togafitia i tatou i le taimi nei, ae fa'alogo i tala mai a nisi, o lenei togafitiga e le tigaina ai se tasi, e pei lava e leai se mea o tupu a'o fa'amama lota toto. Peitai e i ai taimi e tigaina tele ai, ma toe pa mai le toto. E o'ono lava le tiga, aua e mana'omia ona fa'amama le toto. I ita ai foma'i tiute ma le toe fa'amamaina ai lota toto i lena aso. Ae o lo'o faia lava le mea sili e i latou o tiute ma tausia i matou."

 

FA'AILOA I TAGATA - E LE O INISUAINA LE FALETUPE O AMERIKA SAMOA (TBAS)

 

O le ta'ita’i komiti, o le Komiti o Tupe Fa’asoasoa a le Senate, Senatoa Magalei Logovi'i, sa ia tama'ia lea ta’ita’ifono o le komiti fa’afoe a le Territorial Bank of American Samoa (TBAS) e fa'ailoa i tagata lautele, "E le o inisiuaina le tatou faletupe lea ma ona teugatupe uma lava o i ai. E tatau ona outou fa'ailoa atu lea tulaga, ae maise lava i nai tagata e vaivai le tamaoaiga lea o lo'o fa'aaogaina le tatou faletupe lea.”

 

O le saunoga a Magalei sa faia i le taimi o le iloiloga a le Senate totino fou o le komiti fa’afoe a le faletupe ua ma’ea ona tofia e le kovana. O ia tofiga e aofai ai le ta’ita’i  komiti o le TBAS, le susuga ia Steven Watson.

 

O le aotelega o le tupe o lo'o mumu ai pea le faletupe mo le tolu tausaga talu ona fa'atula'ia mai e $3.7miliona. O le fa'atupega o le faletupe lea sa maua mai i le fa'atauga o Pone mai le Tupe sa fa’atauina e le ASEDA.

 

O lea ua toe va'ai atu e le o toe mamao ae fa'aofi mai le isi pili e fuafua mo le toe totogia o nei Pone, ma ua alagatatau lava ona fa'afofoga le Fono Faitulafono i se Lipoti atoatoa mai le aluga o le faletupe TBAS ua i ai nei.